ދުނިޔޭގެ އެންމެ ފުޅާ ދާއިރާއެއްގައި ހިންގާ ކްރިޕްޓޯކަރަންސީ އެކްސްޗޭންޖް، ބައިނޭންސްއިން 6.3 ބިލިއަން އެމެރިކާ ޑޮލަރުގެ ވަރޗުއަލް އެސެޓްސް ވަގަށް ނެގިމައްސަލައިގައި އުތުރު ކޮރެއާގެ ބައިވެރިވުން އޮތްކަމަށް އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި) އިން ބުނެފިއެވެ.
އެފްބީއައި އިން ނެރުނު ބަޔާނެއްގައި ބުނީ، މި ސައިބަރ ހަމަލާ ދީފައިވަނީ އުތުރު ކޮރެއާއަށް ނިސްބަތްވާ "ޓްރޭޑަރޓްރެއިޓަރ" ކިޔާ ހެކަރުންގެ ގްރޫޕަކުން ކަމަށެވެ.
އަދި ވަގަށް ނެގި ފައިސާގެ ބޮޑުބައި އެތީރިއަމް އަށް ބަދަލުކޮށް، އެކި ފިޔަވަހިތަކަށް ބަހާލައިގެން މަނީ ލޯންޑާކުރުމުގެ މަސައްކަތް ކުރަމުންދާ ކަމަށްވެސް އެ އިދާރާއިން ބުނެފައިވެއެވެ.
މީގެއިތުރުން، މި އޮޕަރޭޝަނާ ގުޅުންހުރި އެންމެހައި މާލީ މުއާމަލާތްތައް ވަގުތުން ހުއްޓުވުމަށް ވަރޗުއަލް އެސެޓްގެ ހިދުމަތްދޭ ފަރާތްތަކަށް އެފްބީއައި އިން ވަނީ އިލްތިމާސްކޮށްފައެވެ.
މި ހާދިސާއާ ގުޅިގެން ބައިނޭންސްގެ ސީއީއޯ ރިޗަޑް ޓެންގް ވިދާޅުވީ، މިއީ ސަލާމަތީ އުސޫލުތަކާ ހިލާފުވެފައިވާ ލެޕްޓޮޕަކާއި، ޑޭޓާ ފޮހެލާ ޒާތުގެ ނުރައްކާތެރި މެލްވެއާއެއް ބޭނުންކޮށްގެން ރާވާފައިވާ ވަރަށް ފަންނީ، ނުރައްކާތެރި ހަމަލާއެއް ކަމަށެވެ.
ނަމަވެސް، ގެއްލުނު ފައިސާގެ 90 އިންސައްތަ މިހާރު ކުންފުނީގެ އިމަޖެންސީ އިންޝުއަރެންސް ފަންޑު ބޭނުންކޮށްގެން އިއާދަކޮށްފައިވާ ކަމަށާއި، ބާކީބައިވެސް އަވަހަށް ހަމަޖައްސާނެ ކަމުގެ ޔަގީންކަން އެ ކުންފުނިން ވަނީ ދީފައެވެ.
އަދި ކަސްޓަމަރުންގެ ފައިސާއަށް އެއްވެސް އުނިކަމެއް ނާންނާނެ ކަމުގެ ޔަގީންކަން ދެމުން، ވަގުތީ ގޮތުން މެދުކަނޑާލާފައިވާ ފައިސާ ނެގުމުގެ ހިދުމަތް ވަރަށް އަވަހަށް އަލުން ފަށާނެ ކަމަށްވެސް ބައިނޭންސުން ވަނީ ބުނެފައެވެ.