ޔަހޫދީ އަސްކަރިއްޔާގެ ސީދާ ރައްކާތެރިކަމުގެ ދަށުގައި ޔަހޫދީ ވަޒަންވެރިން، އިސްތިއުމާރުކޮށްފައިވާ ހުޅަނގު އައްސޭރީގެ ޒައިތޫނި ދަނޑުތަކަށް އަމާޒުކޮށް ގިނަ ހަމަލާތަކެއް ދީފިއެވެ.
އިސްތިއުމާރުކޮށްފައިވާ ހުޅަނގު އައްސޭރީގެ އަބޫ ދީސް އަދި ޢަވާރުތާ އަވަށުގެ ޒައިތޫނި ދަނޑުތަކުގައި މަސައްކަތްކުރަމުންދިޔަ ފަލަސްޠީނުގެ ދަނޑުވެރިންނަށާއި، އެމީހުންނަށް އެހީތެރިވާ ބޭރުގެ އެހީތެރިންނަށް އަމާޒުކޮށް، މޫނު ނިވާކޮށްގެން ތިބި 50 އަށްވުރެ ގިނަ ޔަހޫދީ ވަޒަންވެރިން ހަމަލާތަކެއް ދީފައިވެއެވެ.
މި ހަމަލާތަކުގައި ވަޒަންވެރިން ވަނީ ދަނޑުވެރިންގެ ގޭގެއަށް ހިލައުކައި، ޒައިތޫނި ގަސްތަކުގައި ރޯކޮށް، ގިނަ އަދަދެއްގެ މީހުން ހިފަހައްޓާފައެވެ. މީގެ އިތުރުން ހަމަލާތަކަށްފަހު އެ ސަރަޙައްދަށް އައި ޔަހޫދީ ސިފައިން ވަނީ ބަޑި ދިއްކޮށްގެން ތިބެ ފަލަސްޠީނު މީހުންނާއި އެހީތެރިން ބިމުގައި ބައިތިއްބައި، އެ ސަރަޙައްދުން ނުކުތުމަށް މަޖުބޫރުކޮށްފައެވެ.
މި ހަމަލާތަކުގެ ތެރޭގައި ޔަހޫދީ ސިފައިން ވަނީ ނާބުލުސްގެ ދެކުނުގައިވާ އަވަށުގެ ޖަބަލް ޤަމަޞް ސަރަޙައްދުގައި ހަރަކާތްތެރިވި ނޫސްވެރިން ހިފަހައްޓައި، އެމީހުންނަށް އަނިޔާކޮށްފައެވެ. އަދި އުސާރީން އަވަށުގައި ޔަހޫދީ ވަޒަންވެރިން ވަނީ ފަލަސްޠީނު މީހުންގެ އުޅަނދުތަކަށް ގެއްލުންދީ، ގޭގެއަށް ހަމަލާދީ، ނޫސްވެރިންނާއި އާންމުންނާ ދިމާލަށް ކަރުނަ ގޭސް އުކާފައެވެ. ސެޕްޓެމްބަރު މަހުން ފެށިގެން އިތުރަށް ވަރުގަދަވެފައިވާ ޔަހޫދީ ވަޒަންވެރިންގެ މިފަދަ ނުރައްކާތެރި އުދަނގޫތަކުން ދިފާއުވުމަށް ފަލަސްޠީނުގެ އާންމުން ދަނީ މަސައްކަތްކުރަމުންނެވެ.
2023 ވަނަ އަހަރުގެ އޮކްޓޫބަރު މަހު ޣައްޒާގައި ޔަހޫދީން ޤަތުލުޢާއްމު ހިންގަން ފެށީއްސުރެ، ހުޅަނގު އައްސޭރިން އެކަނިވެސް 254 ކުޑަކުދިން ހިމެނޭހެން ފަލަސްޠީނުގެ 1,212 ރައްޔިތުން ވަނީ ޝަހީދުކޮށްލާފައެވެ. މީގެ ތެރެއިން އެންމެ ގިނަ މީހުން ޝަހީދުކޮއްލީ ޔަހޫދީ ސިފައިން ކަމުގައި ވާއިރު، ހަތަރުބައިކުޅައެކަށްވުރެ ގިނަ މީހުން ޝަހީދުކޮށްފައިވަނީ ހައްދުފަނައެޅި ޔަހޫދީ ވަޒަންވެރިންނެވެ.
ފަލަސްޠީނުގެ އިދާރާތަކުން ހާމަކުރި ގޮތުގައި 2026 ވަނަ އަހަރުގެ މިހާތަނަށް އެކަނިވެސް ޔަހޫދީ ވަޒަންވެރިންގެ ހަމަލާތަކުގައި ފަލަސްޠީނުގެ 30 މީހުން ވަނީ ޝަހީދުވެފައެވެ. މިއީ 2022 ވަނަ އަހަރަށްފަހު، އެއް އަހަރުގެ ތެރޭގައި ވަޒަންވެރިންގެ ހަމަލާތަކުގައި އެންމެ ގިނަ މީހުން ޝަހީދުވި އަހަރެވެ.