ބްރެޒިލްއިން ފަސޭހަ ކަމާއެކު އިންޑިއާ ބަލިކޮށްފި

ބްރެޒިލް އާއި އިންޑިއާގެ މެދުގައި ކުޅުނު ބައިނަލްއަޤްވާމީ ރަހްމަތްތެރިކަމުގެ މެޗު ފަސޭހަ ކަމާއެކު ބްރެޒިލް ކާމިޔާބު ކޮށްފިއެވެ.

އިންޑިއާގެ ކަލްކަތާގެ ސޯލްޓް ލޭކް ސްޑޭޑިއަމްގައި ކުޅުނު މިމެޗު ބްރެޒިލް އިން ކާމިޔާބު ކޮށްފައިވަނީ 4 ލަނޑު ސުން ލަނޑުންނެވެ. މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ ބްރެޒިލް އިން އުފައްދާފައިވާ އިރު އިންޑިއާގެ ފަރާތުންވެސް ހިތްވަރު ގަދަ ކުޅުމެއް ފެނިގެންދިޔައެވެ. ހާއްސަކޮށް މެޗުގެ ފުރަތަަމަ 27 މިނެޓްގައި އިންޑިއާގެ ފަރާތުން ރަނގަޅު ކުޅުމެއް ފެނިގެންދިޔައެވެ. މިގޮތުން ކައުންޓަރ އެޓޭކްގައި ބްރެޒިލްއަށް ނުރައްކާ ކުރިތަން ފެނިގެންދިޔައެވެ. މިމެޗުގައި އިންޑިއާއިންވަނީ 9 ހަމަލާ އުފައްދާ 3 ހަމަލާ ގޯލަށް އަމާޒުކޮށް ފޮނުވާލައިފައެވެ.

އިންޑިއާގައި ފުޓްބޯޅައިގެ އެންމެ ބޮޑު ޕާޓީގެ ގޮތުގައި ފާހަގަ ކުރެވިގެންދިޔަ މިމެޗުގައި ބްރެޒިލް އިން ކާމިޔާބު ކުރި ފުރަތަމަ ލަނޑު ޖަހާފައިވަނީ މެޗުގެ 28 ވަނަ މިނެޓުގައެވެ. މިލަނޑު އެޓީމަށް ކާމިޔާބު ކޮށްދިނީ އެސްޓެވާއޮއެވެ. އަދި ފުރަތަމަ ހާފު ނިމެން 3 މިނެޓަށް ވެފައިވަނިކޮށް ބްރެޒިލްއަށް އެޓީމުގެ ލީޑު ފުޅާކޮށްދިނީ ޕެޑްރޯއެވެ.

މިމެޗުގައި ބްރެޒިލް އިން ކާމިޔާބު ކުރި 3 ވަނަ ލަނޑު މެޗުގެ 58 ވަނަ މިނެޓްގައި ސެމިއުލް ލީނޯ ކާމިޔާބު ކޮށްދިން އިރު ފަހު ލަނޑު މެޗުގެ އިތުރު ވަގުތުގެ 5 ވަނަ މިނެޓުގައި ކާމިޔާބު ކޮށްދިނީވެސް ލީނޯއެވެ. މިމެޗުގައި ބްރެޒިލްގެ ޓީމުން އެޓީމުގެ ފާހަގަ ކޮށްލެވޭ ތަރިން ފެނިގެންދިޔައެވެ. މިގޮތުން ވިނީޝިއަސް ޖޫނިއަރ، ކެޕްޓަން މާކީނިއޯސް، ގެބްރިއެލް އަދި ބްރޫނޯ ގިނަރާއީސް ފަދަ ކުޅުންތެރިން ފެނިގެންދިޔައެވެ.

ދުނިޔޭގައި 6 ވަނައަށް ރޭންކް ކުރެވިފައިވާ ބްރެޒިލް އާއި 138 ވަނައަށް ރޭންކް ކުރެވިފައިވާ އިންޑިއާގެ މެދުގައި ކުޅުނު ރަހްމަތްތެރިކަމުގެ މިމެޗުގެ މާބޮޑު މާނައެއް ނެތްކަމަށް ގިނަ ބަޔަކަށް ހީވެގެންދިޔަ ނަމަވެސް މިއީ އިންޑިއާ އާއި އެޤައުމުގައި ފުޓްބޯޅައަށް ލޯބިކުރާ ފަރާތްތަކަށް މިއިން ދުވަހަކު ނާންނަ ވަރުގެ ބޮޑުމެޗެކެވެ. މިއީ އިންޑިއާއިން މިފެންވަރުގެ ޓީމަކާއި ދެކޮޅަށް ފަހަކަށް އައިސް ކުޅުނު ފުރަތަމަ ފަހަރެވެ. އަދި އިންޑިއާ ވެގެން ގޮސްފައިވަނީ 1998 ވަނަ އަހަރަށް ފަހު ބްރެޒިލް އިން ވާދަކުރި އެންމެ ދަށުން ރޭންކް ކުރެވިފައިވާ ޓީމަށެވެ. 1998 ވަނަ އަހަރު ބްރެޒިލް އިން ވަނީ 185 ވަނައަށް ރޭންކް ކުރެވިފައިވާ އެންޑޯރާ އާއި ދެކޮޅަށް ކުޅެފައެވެ.

މިމެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ބްރެޒިލްގެ ކޯޗު ކާލޯ އެންޗެލޯޓީ ބުނީ ކްރިކެޓަށް މަރުދޭ ރައްޔިތުން ތަކެއް ދިރިއުޅޭ އިންޑިއާގައި ފުޓްބޯޅައަށް ލޯބިކުރާ ރައްޔިތުންތަކެއްވެސް ދިރިއުޅޭކަން ހާމަވެގެންދާކަމަށެވެ. އަދި މިމެޗު ކުޅުމަށް އިންޑިއާއަށް އައުމުގެ ފުރުސަތު ލިބުމުން އުފާކުރާކަމަށްވެސް އޭނާ ފާހަގަ ކުރިއެވެ.