މިއަހަރުގެ މިހާތަނަށް އެންމެ ގިނަ އަދަދަކަށް ޑެންގީ ހުމުގައި މީހުން މަރުވި މަހަކަށް ސެޕްޓެމްބަރު މަސް ވެފައިވާއިރު، މި ހިނގާ އޮކްޓޫބަރު މަހު ބަންގްލަދޭޝްގައި ޑެންގީގެ ހާލަތު އިތުރަށް ގޯސްވެދާނެ ކަމުގެ އިންޒާރު ސިއްހީ މާހިރުން ދެއްވައިފިއެވެ.
މޫސުމަށް އަންނަމުންދާ ބަދަލުތަކާ ގުޅިގެން، އޮކްޓޫބަރު މަހުގެ ތެރޭގައި ޑެންގީ ހުން ފެތުރޭ މިންވަރު އިންތިހާއަށް އިތުރުވެދާނެ ކަމަށް މާހިރުން ލަފާކުރައްވައެވެ. މި ނުރައްކާ ކުރިމަތިވެފައި މިވަނީ، ދުނިޔޭގައި އެންމެ ހަލުވިކަމާއެކު ހިމަބިހި (މީސްލްސް) ފެތުރޭ ގައުމުތަކުގެ ތެރޭގައި ބަންގްލަދޭޝް ހިމެނި، އެ ގައުމުގެ ސިއްހީ ނިޒާމަށާއި ހަސްފަތާލުތަކަށް ބާރުބޮޑުވެފައިވާ ދަނޑިވަޅެއްގައެވެ. މި އަހަރުގެ މިހާތަނަށް ހިމަބިހި ޖެހިގެން އެ ގައުމުން 1,100 އަށް ވުރެ ގިނަ ކުޑަކުދިންގެފުރާނަ ވަނީ ގެއްލިފައެވެ.
ޖަހާންގީރުނަގަރު ޔުނިވަރސިޓީގެ ސިއްހީ މާހިރެއް ކަމުގައިވާ ކަބީރުލް ބަޝާރު ފާހަގަކުރެއްވި ގޮތުގައި، މޫސުމީ މޮޑެލްތަކުން ދައްކާ ގޮތުން މި އޮކްޓޫބަރު މަހު ޑެންގީގެ ނުރައްކާ ވަކިން ބޮޑުވާނެއެވެ. ސެޕްޓެމްބަރު މަހުގެ ވިއްސާރައާ ގުޅިގެން މަދިރި އުފެދޭ މިންވަރު ވަރަށް ބޮޑަށް އިތުރުވެފައިވާއިރު، އާންމުގޮތެއްގައި ވިއްސާރައަށް ފަހު ބަލި ފެތުރެން ފަށަނީ 45 ދުވަހާއި 60 ދުވަހާ ދެމެދުގެ މުއްދަތެއްގައެވެ. އެހެންކަމުން، ކުރިއަށް އޮތް މަހަކީ މި ބަލި އެންމެ ބޮޑަށް ފެތުރިގެންދާނެ ދުވަސްވަރެވެ. މީގެއިތުރުން، ޑެންގީ ފަތުރާ އެޑީސް މަދިރި ބޮޑެތި ސިޓީތަކުން ބޭރަށް، މުޅި ގައުމަށް ފެތުރެމުންދާތީ، މިއީ ގައުމީ ފެންވަރުގައި ކުރިމަތިވެފައިވާ ވަރަށް ބޮޑު ގޮންޖެހުމެއް ކަމަށްވެސް އޭނާ ވިދާޅުވިއެވެ.
ސިއްޙީ ވުޒާރާގެ ތަފާސްހިސާބުތައް ދައްކާގޮތުން، މި އަހަރުގެ ޖެނުއަރީ މަހުން ފެށިގެން މިހާތަނަށް މަދުވެގެން 245 މީހުން ވަނީ މި ބަލީގައި ފުރާނަ ގެއްލިފައެވެ. އަދި 79,620 މީހުންނަށް ހަސްފަތާލުތަކުގައި ބާއްވައިގެން ވަނީ ފަރުވާދީފައެވެ. ވޭތުވެދިޔަ ސެޕްޓެމްބަރު މަހު އެކަނިވެސް 148 މީހުން މަރުވެފައިވާއިރު، މިއީ ޖުލައި މަހު މަރުވި 36 މީހުންނާއި، އޮގަސްޓު މަހު މަރުވި 43 މީހުންނާ އަޅާބަލާއިރު ވަރަށް ބޮޑު އިތުރުވުމެކެވެ. މީގެއިތުރުން، ވޭތުވެދިޔަ ބުދަ ދުވަހުވެސް އިތުރު 6 މީހަކު މަރުވެ، އައު 1,948 ކޭސް ރިޕޯޓްކޮށް އެޑްމިޓްކޮށްފައިވެއެވެ.
ދުނިޔޭގެ ޞިއްޙަތު ޖަމްޢިއްޔާ (ޑަބްލިއު.އެޗް.އޯ) އިން ފާހަގަކުރާ ގޮތުގައި، މޫސުމަށް އަންނަ ބަދަލުތަކާ ގުޅިގެން ފިނިހޫނުމިނަށާއި ވާރޭވެހޭ މިންވަރަށް އަންނަ ބަދަލުތަކުގެ ސަބަބުން، އީޑީސް މަދިރި އާލާވާ މުއްދަތު ދަނީ އިތުރުވަމުންނެވެ. އެހެންކަމުން، މިކަން ކޮންޓްރޯލް ކުރުމަށް ސަރުކާރުން އަޅަމުންދާ ފިޔަވަޅުތަކުގެ އިތުރުން، އަމިއްލަ ގޯތިގެދޮރާއި ވެށީގައި ފެން ހަރުލާ ގޮތަށް ހުންނަ ތަންތަން ސާފުކޮށް، މަދިރި އުފެދޭ މާޙައުލުތައް ނައްތާލުމުގައި ޢާންމު ރައްޔިތުން ފަރުދީ ޒިންމާ އަދާކުރުމަށް ޞިއްޙީ މާހިރުން ވަނީ އިލްތިމާސްކުރައްވާފައެވެ.