3ވަނަ ޒަކާތު ކޮންފަރެންސްގައި ބައިވެރިވުމަށް ހުޅުވާލައިފި

ތިންވަނަ އިންޓަރނޭޝަނަލް ޒަކާތު ކޮންފަރެންސް މޯލްޑިވްސްގައި ބައިވެރިވުމުގެ ފުރުޞަތު ހުޅުވާލައިފިއެވެ.

މޯލްޑިވްސް ޒަކާތު ހައުސްއިން ވިދިވިދިގެން ތިންވަނަ އަހަރަށް ބާއްވާ "އިންޓަރނޭޝަނަލް ޒަކާތު ކޮންފަރެންސް މޯލްޑިވްސް (އިންޒެކް) 2026″ ގައި ބައިވެރިވުމަށް، މިހާރު ރަޖިސްޓްރީ ކުރެވޭނެއެވެ.

މިއަހަރުގެ ކޮންފަރެންސް ބޭއްވުމަށް ހަމަޖެހިފައިވަނީ، މިމަހުގެ 28 ވަނަ ދުވަހުއެވެ. ޒަކާތު ކޮންފަރެންސްއަކީ، މާލީ އަދި އިޖުތިމާޢީ ނާޒުކު ޙާލަތްތަކާ ގުޅިގެން ކުރިމަތިވާ ގޮންޖެހުންތަކާއި، ވިލުންވެރި މުޖުތަމަޢުތަކެއް ބިނާކުރުމުގައި ޒަކާތުގެ ދައުރާ ގުޅޭގޮތުން މަޝްވަރާކުރުމަށް ބާއްވަމުން އަންނަ ކޮންފަރެންސްއެކެވެ.

މި ކޮންފަރެންސްގައި ޢިލްމުވެރިންނާއި، އިޤުތިޞާދީ މާހިރުންނާއި، ޒަކާތުގެ ކަންކަން ބަލަހައްޓާ ފަރާތްތަކާއި، ސިޔާސަތު ކަނޑައަޅާ ފަރާތްތަކާއި، މާލީ އިދާރާތަކާއި، މަދަނީ ޖަމްޢިއްޔާތަކުގެ މަންދޫބުންގެ އިތުރުން ކަމާއި ގުޅުންހުރި އެހެނިހެން ފަރާތްތައް އެއްތަނަކުން ބައްދަލުވެ މުހިންމު މަޝްވަރާތަކެއް ކުރިއަށް ގެންދާނެއެވެ.

މި އަހަރުގެ ކޮންފަރެންސްގެ ޝިޢާރަކީ: "ރެޒިލިއަންޓް ފައުންޑޭޝަންސް: ޑިސައިފަރިންގ ވަލްނަރަބިލިޓީ، އިކޮނޮމިކް އިމްޕެކްޓް، އެންޑް ކޮލާބޮރޭޓިވް ސޭފްޓީ ނެޓްސް އިން މޮޑަން ސޮސައިޓީޒް"އެވެ.

މި ކޮންފަރެންސްގައި ކީނޯޓް އެޑްރެސްތަކާއި، އެކި ދާއިރާތަކުގެ ތަޖުރިބާކާރުން ބައިވެރިވާ ޕެނަލް ޑިސްކަޝަންތައް ކުރިއަށްދާނެއެވެ.

މިގޮތުން މަޝްވަރާކުރެވޭނެ މައުޟޫޢުތަކުގެ ތެރޭގައި ގޭބިސީތަކުގެ ނާޒުކު ޙާލަތަށް އަންނަމުންދާ ބަދަލުތަކާއި، މާލީ ދަތިކަމުގެ ސަބަބުން ކުރާ އިޤުތިޞާދީ އަސަރުތަކާއި، އެކި ދާއިރާތަކުގެ މެދުގައި މަޢުލޫމާތު ޙިއްޞާކުރުމާއި، ގުޅިފައިވާ ރައްކާތެރިކަމުގެ ނިޒާމުތަކުގެ އިތުރުން ނާޒުކު ޙާލަތްތަކުގައިވާ ޢާއިލާތަކަކީ އަމިއްލަ ފައިމައްޗަށް ތެދުވެވިފައިވާ މާލީ މިނިވަންކަން ލިބިފައިވާ ބަޔަކަށް ހެދުމަށް ބޭރު ޤައުމުތަކުގައި ބޭނުންކުރާ މޮޑެލްތައް ފަދަ މައުޟޫޢުތައް ހިމެނެއެވެ.

އިންޒެކް 2026ގައި ބައިވެރިވުމަށް ޝައުޤުވެރިވާ ފަރާތްތަކަށް މިހާރު ރަސްމީ ރަޖިސްޓްރޭޝަން ފޯމު މެދުވެރިކޮށް ރަޖިސްޓަރީ ކުރެވޭނެއެވެ.

ރަޖިސްޓްރޭޝަން ލިންކު: https://forms.gle/BnrtbMVErg1GVyZaA

ޒަކާތުގެ ދާއިރާ ހަރުދަނާ ކުރުމަށް ގިނަ މަސައްކަތްތަކެއް ކުރަމުންދާއިރު، ޒަކާތުގެ ފުރަތަމަ ޤާނޫނު މިދިޔަ އަހަރުގެ ޑިސެމްބަރު މަހު ވަނީ ތަސްދީޤު ކުރައްވާފައެވެ. އަދި ޒަކާތުގެ މަސައްކަތްތައް ފުޅާކުރުމަށް، ޒަކާތު ހައުސްވެސް ވަނީ އުފައްދަވާފައެވެ.

ޒަކާތު ފަންޑަކީ ބޭސްފަރުވާއާއި ތަޢުލީމާއި އަދި މީނުންވެސް މުހިންމު ގިނަ ދާއިރާތަކަކުން، އެކަމަށް ބޭނުންޖެހިފައިވާ އާއިލާތަކާއި މީހުންނަށް ބޮޑެތި އެހީތަކެއްވަމުންދާ ފަންޑެކެވެ.