ޗައިނާ އޯޕަންގެ ކުއާޓަރ ފައިނަލްގައި ޒުވަރޭވް އާއި ޖޯކޮވިޗްގެ ކުރިމަތިލުމެއް

ޗައިނާގެ ވެރިރަށް ބެއިޖިންގގައި މިހާރު ކުރިއަށްދާ ޗައިނާ އޯޕަން އޭޓީޕީ ފައިވް ހަންޑްރެޑް ޓެނިސް މުބާރާތުގެ ކުއާޓަރ ފައިނަލްގައި މިމުބާރާތުގައި އެއްވަނައަށް ސީޑު ކުރެވިފައިވާ ޖަރުމަނުވިލާތުގެ އެލެގްޒެންޑަރ ޒުވަރޭވް އާއި ހަވަނައަށް ސީޑު ކުރެވިފައިވާ ސަރބިއާގެ ނޯވަކް ޖޯކޮވިޗް ބައްދަލުކުރާ ގޮތަށް ހަމަޖެހިއްޖެއެވެ.

މިމުބާރާތުގެ ކުެއާޓަރ ފައިނަލުން ޒުވަރޭވް ޖާގަހޯދީ ފަހު 16 ކުޅުންތެރިންގެ ބުރުގައި ޗައިނާގެ ވައިންޑްކާޑް ކުޅުންތެރިއެއް ކަމަށްވާ ޖުންޗެންގ ޝާންގ އާއި ބައްދަލުކުރި މެޗު ފަސޭހަ ކަމާއެކު ސީދާ ދެސެޓުން ކާމިޔާބު ކޮށްގެންނެވެ. އެއީ ހައެއް ސުމެއް އަދި ހައެއް ތިނަކުން ދެ ސެޓުން ކާމިޔާބު ކޮށްގެންނެވެ. މިމުބާރާތުގެ ކުއާޓަރ ފައިނަލް އިން ޖޯކޮވިޗް ޖާގަހޯދީ ޗައިނާގެ ޔުންޗާއޮކެޓޭ ބޫ އާއި ބައްދަލުކުރި މެޗު ދެ ސެޓު އެއް ސެޓުން ކާމިޔާބު ކޮށްގެންނެވެ. އެއީ ފުރަތަމަ ސެޓު ހަތަރެއް ހަޔަކުން ބޫ ކާމިޔާބު ކޮށްފައިވަނިކޮށް ޖެހިގެން އައި ދެ ސެޓު ހަތެއް ހަޔެއް އަދި ހައެއް ދެއަކުން ޖޯކޮވިޗް ކާމިޔާބު ކޮށްގެންނެވެ.

މިމުބާރާތުގައި ކުޅުނު އެހެން ބައެއް މެޗުތަކަށް ބަލާލާއިރު ތިންވަނައަށް ސީޑު ކުރެވިފައިވާ ރަޝިއާގެ ޑަނީލް މެޑްވެޑޭވް އާއި ޖަރުމަނުވިލާތުގެ ޔާން ލެނާޑް ސްޓުރަފް ބައްދަލުކުރި މެޗު ސީދާ ދެ ސެޓުން ކާމިޔާބު ކޮށް މެޑްވެޑޭވްވެސް ވަނީ މިމުބާރާތުގެ ކުއާޓަރ ފައިނަލުން ޖާގަހޯދައިފައެވެ. މިމެޗުގެ ދެ ސެޓު މެޑްވެޑޭވް ކާމިޔާބު ކޮށްފައިވަނީ ހައެއް ހަތަރެއް އަދި ހައެއް ތިނަކުންނެވެ. މިމުބާރާތުގެ ކުއާޓަރ ފައިނަލްގައި މެޑްވެޑޭވް ބައްދަލުކުރާނީ އާޖެންޓީނާގެ ފްރަންސިސްކޯ ކެރުންޑޮލޯ އާއެވެ. މިމުބާރާތުގެ ކުއާޓަރ ފައިނަލުން ސެރުންޑޮލޯ ޖާގަހޯދީ އަށްވަނައަށް ސީޑު ކުރެވިފައިވާ ޗެކިއާގެ ޔަކޫބް މެންސިކް އާއި ބައްދަލުކުރި މެޗު ހައެއް ތިނެއް އަދި ހައެއް ތިނަކުން ކާމިޔާބު ކޮށްގެންނެވެ.

މީގެއިތުރުން ފަސްވަނައަށް ސީޑު ކުރެވިފައިވާ އޮސްޓްރޭލިއާގެ އެލެކްސް ޑި މިނޯ އާއި ފަރަންސޭސިވިލާތުގެ ކުއިންޓިން ހެލިސް ބައްދަލުކުރި މެޗު ދެސެޓު އެއް ސެޓުން ކާމިޔާބު ކޮށްފައިވަނީ ޑި މިނޯއެވެ. އެއީ ތިނެއް ހަޔަކުން ފުރަތަމަ ސެޓު ހެލިސް ކާމިޔާބު ކޮށްފައިވަނިކޮށް ޖެހިގެން އައި ދެ ސެޓު ހަތެއް ހަޔެއް އަދި ހަތެއް ފަހަކުން ކާމިޔާބު ކޮށްގެންނެވެ. މިމުބާރާތުގެ ކުއާޓަރ ފައިނަލްގައި ޑި މިނޯ ބައްދަލުކުރާނީ ރަޝިއާގެ އަންޑްރޭ ރުބްލޭވް އާއެވެ. އޭނާ ކުއާޓަރ ފައިނަލުން ޖާގަހޯދީ އަމިއްލަ ޤައުމުގެ ރޯމަން ސަފިއުލިން އާއި ބައްދަލުކުރި މެޗު ހައެއް ދެއެއް، ތިނެއް ހައެއް އަދި ހައެއް ހަތަރަކުން ކާމިޔާބު ކޮށްގެންނެވެ.