މައުލޫމާތު ފޯރުކޮށްދިނުމުގައި ދިމާވާ ދަތިތަކަށް އދ.އާއެކު މަސައްކަތް ކުރަނީ
-
މިއަދަކީ މައުލޫމާތު ހޯދައި ލިބިގަތުމުގެ ހައްގުގެ ބައިނަލްއަގުވާމީ ދުވަސް
-
މިއަހަރުގެ މިހާތަނަށް އިންފޮމޭޝަން ކޮމިޝަނަށް 745 ކޭސް ހުށަހަޅައިފައިވޭ
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން، މައުލޫމާތު ފޯރުކޮށްދިނުމުގައި އިދާރާތަކަށް ދިމާވާ ދަތިތަކަށް ހައްލެއް ހޯދުމަށް، އދ.އާއެކު މަސައްކަތް ކުރަމުން އަންނަ ކަމަށް އިންފޮމޭޝަން ކޮމިޝަނުން ވިދާޅުވެއްޖެއެވެ.
މައުލޫމާތު ހޯދައި ލިބިގަތުމުގެ ހައްގުގެ ބައިނަލްއަގުވާމީ ދުވަހުގެ މުނާސަބަތުގައި ނެރުނު ބަޔާނުގައި އިންފޮމޭޝަން ކޮމިޝަނުން ވިދާޅުވެފައިވަނީ ދައުލަތުގެ ކަންކަން ސާފުކުރުމަށްޓަކައި މައުލޫމާތަށް އެދޭ މިންވަރު އަހަރަކަށް ވުރެ އަހަރެއް އިތުރުވަމުން އަންނަ ކަމަށެވެ.
އެކޮމިޝަނުން ވިދާޅުވީ މި އަހަރުގެ މިހާތަނަށް އެ އިދާރާއަށް 745 ކޭސް ހުށަހަޅާފައިވާކަމަށެވެ. އަދި އޭގެ ތެރެއިން 260އަށްވުރެ ގިނަ ކޭސް ނިންމާފައިވާކަމަށެވެ. މަދު މުވައްޒަފުންތަކެއް މަސައްކަތް ކުރާ އެ އޮފީހަށް އެވްރެޖުކޮށް ދުވާލަކު މަދުވެގެން ހަތަރު ހުށަހެޅުން ހުށަހަޅާކަން ކޮމިޝަނުން ފާހަގަކުރައްވައެވެ.
ހުށަހެޅުންތައް އިތުރުވުމަކީ ކާމިޔާބީއެއް ނޫންކަން ފާހަގަކޮށް ކޮމިޝަނުން ވިދާޅުވީ ކާމިޔާބީއަކަށް ވާނީ، އަމިއްލަ އިސް ނެގުމުގެ މަތީން ދައުލަތުގެ އިދާރާތަކުން މައުލޫމާތު އާންމުކުރަމުން ދިޔުމުން ރައްޔިތުން މައުލޫމާތު ހޯދުމަށް އިދާރާތަކުގައި އެދެން ޖެހޭ މިންވަރު މަދުވުންކަމަށެވެ.
"އޭރުން ރައްޔިތުންނަށާއި ދައުލަތުގެ އިދާރާތަކަށް ވެސް ވަރަށް ބޮޑު ލުއިފަސޭހައަކަށްވާނެ. އެހެންކަމުން މި ނުކުތާއަށް ސަމާލުކަން ދެއްވުމަކީ ދައުލަތުގެ ހުރިހައި އިދާރާއަކަށް ނުހަނު އިޙުތިރާމާއި އިޚުލާސްތެރިކަމާއެކު، ކުރާ އިލްތިމާސެއް" އިންފޮމޭޝަން ކޮމިޝަނުގެ ބަޔާނުގައި ވިދާޅުވިއެވެ.
އިންފޮމޭޝަން ކޮމިޝަނުން ވަނީ ފަސާދައިން ސަލާމަތްވެފައިވާ ނަޒާހަތްތެރި ދައުލަތެއް ބިނާކުރުމަށްޓަކައި މައުލޫމާތަށް އެދުމާއި ލިބިގަތުމުގެ ހައްގަކީ ވަރަށް މުހިންމު ކަމެއް ކަމުގައިވީ ނަމަވެސް، ބައެއް މުއައްސަސާތަކުން އެކަމަށް ދޭ ސަމާލުކަން އަދިވެސް ކުޑަކަން ފާހަގަކުރައްވާފައެވެ. އެއީ އެ މަސައްކަތް ކުރުމުގައި އިދާރާތަކަށް ކުރިމަތިވެފައިވާ ދަތިތަކާ ހުރެ ދިމާވާ ކަމެއް ކަމަށް ވެދާނެ ކަމަށް ވެސް ކޮމިޝަނުން ވިދާޅުވިއެވެ. އެފަދަ ދަތިތައް ހައްލުކުރުމުގައި އެހީތެރިވެވޭނެ ފަދަ އިންތިޒާމެއް ހަމަޖެއްސޭތޯ އދ.ގެ ތަރައްގީއާ ބެހޭ ޕްރޮގްރާމާ ގުޅިގެން މަސައްކަތްތަކެއް ކުރަމުން އަންނަކަމަށްވެސް ވިދާޅުވިއެވެ.
މަޢުލޫމާތު ހޯދައި ލިބިގަތުމުގެ ޙައްޤަކީ ހަމައެކަނި ޤާނޫނުއަސާސީގައި ނުވަތަ ޤާނޫނެއްގައި ލިޔެވިފައި އޮންނަން ޖެހޭ ޤާނޫނީ އުޞޫލެއްނޫންކަން ފާހަގަކޮށް އިންފޮމޭޝަން ކޮމިޝަނުން ވިދާޅުވީ އެއީ ދިމިޤްރާތީ މުސްތަޤްބަލު ބައްޓަންކުރުމަށާއި ސުލްހަވެރި އަމާން މުޖުތަމަޢެއް ބިނާކުރުމަށްޓަކައި ބޭނުން ހައްގެއްކަމަށެވެ.