ގައްދޫގައި ތަރައްޤީކުރާ 50 ހައުސިން ޔުނިޓުގެ މަސައްކަތް ކުރިއަށް

ރާއްޖޭގެ އެކި ރަށްރަށުގައި ބޯހިޔާވަހިކަމުގެ މައްސަލަ އޮތީ އެކި މިންވަރަށެވެ. ބައެއް ރަށްރަށުގައި ބިން ނެތުމުގެ ސަބަބުން ގޯތި ދޫކުރުން ދަތިވެ އަދި ސަރުކާރުން ކުރިއަށްގެންދާ މަޝްރޫޢުތަކަށްވެސް ހުރަސްއެޅެއެވެ.

އެފަދަ ރަށްރަށަށް ބިން އިތުރުކޮށްގެންވެސް ބޯހިޔާވަހިކަމުގެ މަޝްރޫޢުތައް ކުރިއަށްގެންދެއެވެ. ހަމަ އެފަދައިން އެތައް ރަށެއްގައި ގޯތި ދޫކޮށް ނަމަވެސް ފައިސާގެ ދަތިކަމާ ހުރެ އެތަންތަނުގައި ގެދޮރު ނޭޅު އަހަރުތައް ފާއިތުވެއެވެ. އަނެއް މައްސަލައަކީ ގޯތި ލިބި ނަމަވެސް އެތަންތަން ވެރިންގެ ދިރިއުޅުން އެހްނ ތަނަކަށް ބަދަލުކޮށް އެ ގޯއްޗެއް ވީރާނާވާން ދޫކޮށްލުމެވެ.

މިހެން ހުރި މައްސަލަތައް ހައްލުކުރުމަށް އެކި ފެންވަރުގައި މަސައްކަތްތައް ކުރަމުންދާއިރު މިދިޔަ އަހަރުގެ ފަހުކޮޅުގައި ސަރުކާރުން ވަނީ 12 ރަށެއްގައި 700 އަށްވުރެ ހައުސިން ޔުނިޓް ތަރައްޤީކުރުމަށް އެކި ކުންފުނިތަކާ ހަވާލުކޮށްފައެވެ. އޭގެ ތެރެއިން އެއް މަޝްރޫޢުއަކީ ގދ. ގައްދޫގައި ތަރައްޤީކުރާ 50 ހައުސިން ޔުނިޓްގެ މަސައްކަތެވެ.


ގައްދޫގައި ވެސް ތަރައްޤީގެ އެކި މަޝްރޫޢޫތައް ފަށާފައި އެބަހުއްޓެވެ. އޭގެ ތެރޭގައި މަގު ހެދުމުގެ މަސައްކަތާއި ހޮސްޕިޓަލް އިމާރާތް ކުރުމުގެ މަސައްކަތް ހިމެނެއެވެ. މީގެ އިތުރުން ފިޓްނެސް ސެންޓަރާއި ޕޮލިސް ސްޓޭޝަންއާއި ބިން ހިއްކުންފަދަ މަޝްރޫޢުތައް ވަނީ ފަށާފައެވެ. މި މަޝްރޫޢުތަކުގެ އިތުރުން މިވަގުތު އެރަށުގައި އެންމެ ބާރު ދުވެލީގައި ކުރިއަށް ދާ މަޝްރޫޢުއަކީ 50 ހައުސިން ޔުނިޓް ތަރައްޤީ ކުރުމުގެ މަސައްކަތެވެ. މިއީ މިިދިޔަ އަހަރުގެ ފަހުކޮޅު ހަވާލުކޮށް މިއަހަރުގެ ކުރީކޮޅު މަސައްކަތް ފެށި މަޝްރޫޢުއެކެވެ.

ގައްދޫ ކައުންސިލްގެ ރައީސް އިލްހާމް ރަޝީދު ވިދާޅުވީ ހައުސިން މަޝްރޫޢުގެ މަސައްކަތް ބާރުދުވެލީގައި ކުރިއަށްދާކަމަށެވެ. އެގޮތުން އެ މަޝްރޫޢޫގެ ކޮންކްރީޓްގެ މަސައްކަތްތަކުގެ ތެރެއިން ތަނބުތައް ޖެހުމުގެ މަސައްކަތް ކުރިއަށްދާކަމަށް އިލްހާމް ވިދާޅުވިއެވެ. ވިދާޅުވިއެވެ. އަދި އެ މަސައްކަތް 2027 ގެ ނިޔަލަށް ނިންމުމަށް މަސައްކަތް ކުރަމުންދާކަމަށްވެސް އޭނާ ވިދާޅުވިއެވެ.

ގައްދޫގައި ބޯހިޔަވަހިކަމުގެ މާ ބޮޑު ދައްޗެއްނެތްނަމަވެސް ރަށުގެ ރައްޔިތުން ބޭނުންވަނީ ގޯތި ދޫކުރުމުގެ ބަދަލުގައި ފްލެޓްއަޅާ އެތަންތަނުގައި ދިރިއުޅުމަށްކަމަށް އިލްހާމް ވިދާޅުވިއެވެ. އެގޮތުން މީގެ ކުރިން ކުރީގެ ރައީސް ޔާމިން ސަރުކާރުގައި ތަރައްޤީކުރި 50 ހައުސިން ޔުނިޓްގެ ހުރިހާ ޔުނިޓްކަހަލަ ގޮތަކަށް މީހުން ދިރިއުޅެމުންދާކަމަށް އިލްހާމް ވިދާޅުވިއެވެ.

ބޯހިޔާވަހިކަމުގެ ދާއިރާއިން ސަރުކާރުން މުހިއްމު މަސައްކަތްތަކެއް ކުރިއަށްގެންދާއިރު ކުރިން ފަށާފައިވާ މަޝްރޫޢުތަކާއިއެކު މިވަގުތު ރާއްޖޭގެ 54 ރަށެއްގައި ބޯހިޔާވަހިކަމުގެ މަޝްރޫޢުތައް އަންނަނީ ހިންގަމުންނެވެ އެއީ، ޖުމުލަ 8،588 ހައުސިން ޔުނިޓުގެ މަސައްކަތެވެ. މީގެ ތެރޭގައި މިސ ަރުކަރުން 36 ރަށެއްގައި ބޯހިޔާވަހިކަމުގެ މަޝްރޫޢުތައް ފަށާފައިވާއިރު އެއީ 6363 ހައުސިން ޔުނިޓްގެ މަސައްކަތެވެ.

މި ސަރުކާރުން ވަނީ ރާއްޖޭގައި ބޯހިޔާވަހިކަމަށް އެންމެ ބޮޑަށް ބޭނުންޖެހިފައިވާ 57 ރަށާއި، އެރަށްތަކުގައި އަޅާނެ ހައުސިން ޔުނިޓުގެ އަދަދުތައްވެސް އިޢުލާނުކޮށްފައެވެ. އެއީ، 12،000 އަށްވުރެ ގިނަ ހައުސިން ޔުނިޓެވެ. މި މަޝްރޫޢުތަކުގެ ތެރެއިން ގިނަ ރަށްތަކަށް ވަނީ، ކޮންޓްރެކްޓަރުން ހަމަޖައްސާފައެވެ. އަދި އެކި މަރުހަލާތަކުގައި ދަނީ މަސައްކަތްތައް ކުރަމުންނެވެ.

މީގެއިތުރުން ރައްޔިތުން ގެދޮރުވެރި ކުރުމަށް ސަރުކާރުން ފޯރުކޮށްދޭ ފުރުޞަތުތަކުގެ ތެރެއިން، ގޯތި އެޅުމަށް މާލީ ޤާބިލުކަން ނެތް މީހުންނަށް އިސްލާމީ އުސޫލުތަކުގެ ތެރެއިން ހެޔޮ އަގެއްގައި ލޯނު ހޯދުމުގެ ގިނަ ފުރުޞަތުތަކެއްވެސް ވަނީ ފަހިކޮށްދީފައެވެ.