އޭޝިއަން ގޭމްސްގެ ކުރިން ޤައުމީ ސާފިން ޓީމު ޖަޕާނުގައި ކޭމްޕް ކުރަނީ

ޖަޕާނުގައި އަންނަ މަހު ފަށާ، އޭޝިއަން ގޭމްސްގެ ކުރިން އެ ގައުމުގައި ރާއްޖޭގެ ސާފިން ޓީމުން ކޭމްޕް ކުރުމަށް ނިންމާފައިވާ ކަމަށް މޯލްޑިވްސް ސާފިން އެސޯސިއޭޝަނުން ބުނެފިއެވެ.

ސާފިން އަކީ އޭޝިއަން ގޭމްސްގެ ކޮލިފިކޭޝަންގައި ވާދަކޮށް ގޭމްސްއަށް ކޮލިފައިވި ރާއްޖޭގެ ފުރަތަމަ ކުޅިވަރެވެ. އޭޝިއަން ގޭމްސްއަށް ރާއްޖެ ކޮލިފައިވީ، ރާއްޖޭގައި ބޭއްވި އޭޝިއަން ސާފިން ޗެމްޕިއަންޝިޕްގައި ވާދަކޮށްގެންނާއި، އިންޑިއާގައި ކުރިއަށްދިޔަ އޭޝިއަން ސާފިން ޗެމްޕިއަންޝިޕުގައި ވާދަކޮށްގެންނެވެ. އެގޮތުން ރާއްޖޭގައި ބޭއްވި މުބާރާތުގައި ވާދަކޮށް އަންހެން ދެ ސާފަރުން އޭޝިއަން ގޭމްސްއަށް ކޮލިފައިވިއިރު، އިންޑިއާގައި ކުރިއަށްދިޔަ މުބާރާތުގައި ވާދަކޮށް ފިރިހެން ދެ ސާފަރުން ވަނީ ކޮލިފައިވެފައެވެ.

އޭޝިއަން ގޭމްސްގެ ކުރިން ރާއްޖޭގެ ސާފިން ޓީމު ޖަޕާނުގައި 10 ދުވަހު ކޭމްޕް ކުރުމަށް ވަނީ ނިންމާފައެވެ. އެމްއެސްއޭ އިން ހާމަކުރި ގޮތުގައި މި ކޭމްޕްގެ މަގުސަދަކީ މުބާރާތުގެ ކުރިން ޖަޕާނުގެ މާހައުލަށް ރާއްޖޭގެ އެތުލީޓުން ހޭނުން ކަމަށެވެ.

"ކުޅިވަރު ވިންދު" ޕްރޮގްރާމްގައި ވާހަކަ ދައްކަމުން ސާފިން އެސޯސިއޭޝަންގެ ރައީސް މުހައްމަދު ސަބާހް (ޗޭ) ވިދާޅުވީ، ގައުމީ ސާފިން ޓީމުން ވަރަށް ރަނގަޅަށް މުބާރާތައް ތައްޔާރުވަމުން އަންނަ ކަމަށެވެ. އެގޮތުން ސާފިން ގައުމީ ޓީމު އެކުލަވާލުމަށް ލަންކާގައި ޓްރެއިނިންގ ކޭމްޕެއް ކުރިއަށް ގެންގޮސްފައިވާ ކަމަށެވެ. އަދި ލަންކާގައި ޓްރެއިނިން ކޭމްޕް ކުރިއަށް ގެންދިޔުމުގެ މައިގަނޑު ބޭނުމަކީ ލަންކާއަކީ ބީޗް ބްރޭކް ރާޅު ނަގާ ގައުމަކަށްވުމުން ކަމަށެވެ. މުބާރާތް ކުރިއަށް ގެންދާ ޖަޕާނަކީ ވެސް ބީޗް ބްރޭކް ރާޅު ނަގާ ގައުމެކެވެ. އެއާ ހިލާފަށް ރާއްޖެއަކީ ރީފް ބްރޭކް ރާޅު ނަގާ ގައުމެކެވެ.

ސަބާހް ވިދާޅުވީ، ލަންކާ ޓްރެއިނިންގ ކޭމްޕްގައި ބޮޑަށް ވިސްނީ ރާޅުގެ ކޮންޑިޝަނަށް ކަމަށެވެ. އެގޮތުން ގޯސް ކޮންޑިޝަންގައި އެތުލީޓުން ފަރިތަކުރުންތައް ގެންދިޔުމަށް ސަމާލުކަން ދިން ކަމަށް ސަބާހް ވިދާޅުވިއެވެ.

ސަބާހް އިތުރަށް ވިދާޅުވީ ގައުމީ ސާފިން ޓީމުގައި މި ފަހަރު ހިމެނޭނީ ޒުވާން އެތުލީޓުންތަކެއް ކަމަށެވެ. އެކަމަކު އެ އެތުލީޓުންނަކީ ޖޫނިއާސް ނޫން ކަމަށާއި، އެއީ ސީނިއާ މެންސްއާ ވާދަކޮށް ކާމިޔާބު މީގެ ކުރިން ހޯދައިފައިވާ އެތުލީޓުންކަން ސަބާހް ފާހަގަކުރިއެވެ.