ގްލޯބަލް ފަންޑް ޓު ފައިޓް އެއިޑްސް، ޓީބީ އަދި މެލޭރިއާގެ ބޯޑަށް ރާއްޖެއަށް

ގްލޯބަލް ފަންޑް ޓު ފައިޓް އެއިޑްސް، ޓިއުބަކިއުލޯސިސް އަދި މެލޭރިއާގެ ބޯޑު މެންބަރެއްގެ ގޮތުގައި ތަމްސީލް ކުރުމުގެ ފުރުޞަތު ދިވެހިރާއްޖެއަށް ލިބިފައިވާ ކަމަށް ޞިއްޙަތާއި ޢާއިލާއާއި އިޖުތިމާއީ އެހީއާ ބެހޭ ވުޒާރާއިން ވިދާޅުވެއްޖެއެވެ. އެ ވުޒާރާއިން ވިދާޅުވީ މިކަމުގެ ސަބަބުން ދިވެހިރާއްޖެއަށް ބައިނަލްއަޤްވާމީ ޞިއްޙަތުގެ ސިޔާސަތު ކަނޑައެޅުމަށް މިހާރަށް ވުރެ ފުޅާ ދައުރެއް އަދާކުރެވޭނެ ކަމަށެވެ.

ސިއްޙަތާ ބެހޭ ވުޒާރާއިން މީސްމީޑިއާގައި ހިއްސާ ކުރެއްވި ޕޯސްޓެއްގައި ވިދާޅުވީ ޖެނީވާގައި ކުރިއަށްދާ 55 ވަނަ ގްލޯބަލް ފަންޑް ޓު ފައިޓް އެއިޑްސް، ޓިއުބަކިއުލޯސިސް އަދި މެލޭރިއާގެ ބޯޑު ބައްދަލުވުމުގައި ދިވެހިރާއްޖެ، ދެކުނު އިރުމަތީ އޭޝިއާ ތަމްސީލް ކުރަމުންދާ ކަމަށެވެ. މިއީ ލިބިގެން ދިޔަ ފަޚުރެއްކަމަށް ޞިއްޙީ ވުޒާރާއިން ފާހަގަކުރައްވައެވެ. އެ ވުޒާރާއިން ވިދާޅުވީ ރާއްޖެއިން މިމަޤާމު އަދާ ކުރަނީ، ސަރަޙައްދީ ފެންވަރުގައި ޞިއްޙީ ހަމަހަމަކަން ޤާއިމްކުރުމަށާއި، ދެމެހެއްޓެނިވި ގޮތެއްގައި ޞިއްޙީ ނިޒާމު ކުރިއެރުވުމަށާއި، އެޗްއައިވީ، ޓީބީ އަދި މެލޭރިއާ އާ ދެކޮޅަށް ކުރަމުންދާ މަސައްކަތްތައް އިތުރަށް ވަރުގަދަކުރުމުގެ ވަޢުދާއެކު ކަމަށެވެ.

Maldives to assume a significant role in shaping global health policy - The 55th Board Meeting of the Global Fund to Fight AIDS, Tuberculosis and Malaria is now underway in Geneva — and Maldives is honoured to be incoming as the South-East Asia constituency's Board member,… pic.twitter.com/rQ3YPesJ9v

— Ministry of Health, Family and Welfare (@MoHmv) July 11, 2026

ދެކުނު އިރުމަތީ އޭޝިއާ ދައިރާ ދިވެހިރާއްޖެއިން ތަމްސީލް ކުރާއިރު ރާއްޖެއަކީ މައިމީހާގެ ފުށުން ދަރިފުޅަށް އެޗްއައިވީ، ސިފިލިސް، އަދި ހެޕަޓައިޓިސް ބީ ވާރުތަވުން މުޅީން ހުއްޓުވައި އެކަމުގެ ކާމިޔާބީ ހާސިލްކުރި ދުނިޔޭގެ ފުރަތަމަ ޤައުމުކަން ސިއްޚީ ވުޒާރާއިން ފާހަގަކުރެއެވެ. ރާއްޖޭގެ މި ކާމިޔާބީ ދުނިޔޭގެ ސިއްޙަތު ޖަމިއްޔާއިން ރަސްމީކޮށް އިއުލާންކޮށްފައިވަނީ މިދިޔަ އަހަރު އޮކްޓޫބަރު މަހުއެވެ.

ރާއްޖެއިން ދަނީ ޞިއްޙީ ދައިރާގައި ބައިނަލްއަޤްވާމީ ގޮތުން ގިނަ ކާމިޔާބީތަކެއް ހާސިލްކުރަމުންނެވެ.

ޖެނީވާގައި ބޭއްވި 55 ވަނަ ބޯޑު ބައްދަލުވުން ކުރިއަށް ގެންގޮސްފައިވަނީ ޖުލައި މަހުގެ 9 އިން 10 އަށެވެ. އަދި އަންނަ އޮކްޓޫބަރު މަހު 56 ވަނަ ބައްދަލުވުން ބާއްވާނެއެވެ.