ރާއްޖެއާއި ސަޢުދީގެ ގުޅުން އިތުރަށް ބަދަހިކުރުމަށް މަޝްވަރާތަކެއް

ދިވެހިރާއްޖެއާއި ސަޢުދި އަރަބިއްޔާގެ ގުޅުން އިތުރަށް ބަދަހިކުރުމާ ގުޅޭގޮތުން ދެ ޤައުމުގެ ޚާރިޖީ ވަޒީރުން މަޝްވަރާކުރައްވައިފިއެވެ.

ރާއްޖޭގެ ޚާރިޖީ ވަޒީރުކަމާއި އަލަށް ހަވާލުވެވަޑައިގެންނެވި އިރުތިޝާމް އާދަމް އާއި ސަޢުދީގެ ޚާރިޖީ ވަޒީރު ޕްރިންސް ފައިސަލް ބިން ފަރުހާން އަލް ސަޢުދު ވަނީ ފޯނުން ގުޅުއްވާ މަޝްވަރާ ކުރައްވާފައެވެ.

ދެ ވަޒީރުންގެ މި ފޯނު ކޯލުގައި ރާއްޖޭގައި ސަޢުދީގެ ޒަމާންވީ ގާތް ރަހުމަތްތެރިކަމުގެ ގުޅުމަށް އަލިއަޅުއްވާލެއްވިއެވެ. އަދި ދެ ޤައުމުގެ ދޭދޭ ގުޅުން މިހާރަށްވުރެ ބޮޑަށް ބަދަހިކުރެވޭނެ ގޮތްތަކާ ގުޅޭގޮތުން ދެ ބޭފުޅުން މަޝްވަރާކުރެއްވި ކަމަށް ޚާރިޖީ ވުޒާރާއިން ވިދާޅުވިއެވެ.

Foreign Minister @IruthishamAdam held a courtesy phone call with Foreign Minister of the Kingdom of Saudi Arabia @FaisalbinFarhan pic.twitter.com/0koZsB20X0

— Ministry of Foreign Affairs 🇲🇻 (@MoFAmv) May 17, 2026

ވަޒީރު އިރުތިޝާމް ވަނީ ރާއްޖޭގެ ތަރައްގީގައި ސައުދީގެ ހިއްސާ ފާހަގަކުރައްވައި އެ ޤައުމަށް ޝުކުރު އަދާކުރައްވާފައެވެ. އަދި ޖެހިޖެހިގެން ދެވަނަ އަހަރު މައްކާ ރޫޓު އިނިޝިއޭޓިވްގައި ރާއްޖެ ހިމަނައި ޙައްޖާޖީންނަށް ފޯރުކޮށްދެމުން އަންނަ ޚިދުމަތްތަކަށާއި އެ ޤައުމުން ދިވެހި ވަފުދުތަކަށް އަދާކުރައްވާ މެހްމާންދާރީއަށްވެސް ވަޒީރު ޝުކުރުއަދާކުރެއްވިއެވެ.

މަޝްވަރާތަކުގައި ސަރަހައްދީ ތަރައްގީގެ ދާއިރާތަކަށްވެސް ދެ ވަޒީރުން އަލިއަޅުއްވާލެއްވިއެވެ. އެގޮތުން، ގުޅިގެން ކުރެވޭ މަޝްވަރާތަކުން ސަރަހައްދީ ހަމަޖެހުމާއި ރައްކާތެރިކަން ގާއިމުކުރުމަށް ރާއްޖޭން އަބަދުވެސް ތާޢީދުކުރައްވާނެކަން ޚާރިޖީ ވަޒީރު އިރުތިޝާމް ފާހަގަކުރެއްވިއެވެ.