ސާޖަރީގެ ވަގުތު ނާރުތައް ބެލޭ ވަސީލަތެއް އައިޖީއެމްއެޗްގައި ތަޢާރަފްކޮށްފި
-
ނިއުރޯ މޮނިޓަރިންއަކީ ކޮންމެހެން ހުރުން މުހިންމު ވަސީލަތެއް
-
އާންމު ސާޖަރީތައް ކުރުމުގައި މިވަސީލަތުގެ ބޭނުންތެރިކަން ބޮޑު
ނިއުރޯ ސާޖަރީތަކުގައި ބޭނުންކުރާ "އިންޓްރާ އޮޕަރޭޓިވް ނިއުރޯމޮނިޓަރިން" އިންދިރާ ގާނދީ މެމޯރިއަލް ހޮސްޕިޓަލް، އައިޖީއެމްއެޗްގައި ތަޢާރަފްކޮށްފިއެވެ.
ނިއުރޯ ސާޖަރީ ނުވަތަ ނާރުގެ އޮޕަރޭޝަންތަކަށް ބޭނުންކުރާ "އިންޓްރާ އޮޕަރޭޓިވް ނިއުރޯމޮނިޓަރިން"އަކީ ސާޖަރީ ކުރަމުންދާ ވަގުތު ބަލިމީހާގެ ނާރުތަކުގެ މަސައްކަތް ކުރާ ގޮތް ވަގުތުން ބެލޭ ވަސީލަތެކެވެ. މިވަސީލަތް ބޭނުންކުރަން ފެށުމުން އޮޕަރޭޝަން ކުރަމުންދާއިރު ނާރުތަކަށް ލިބިދާނެ ގެއްލުންތައް ވަގުތުން ދެނެގަނެވި، އެފަދަ ނުރައްކާތަކުން ބަލިމީހާ ސަލާމަތްކުރުމަށް މަގުފަހިވެގެންދާނެއެވެ.
އައިޖީއެމްއެޗްގެ "ސީނިއާ ކޮންސަލްޓަންޓް ސަބް ސްޕެޝަލިސްޓް އިން ނިއުރޯ ސާޖަރީ" ޑރ އަލީ ނިޔާފް ވިދާޅުވީ އިންޓްރާ އޮޕަރޭޓިވް ނިއުރޯ މޮނިޓަރިންއަކީ ބަލިމީހާގެ ރައްކަލަށްޓަކައި ކޮންމެހެން ހުރުން މުހިންމު ވަސީލަތެއް ކަމަށެވެ. އަލީ ނިޔާފް ވިދާޅުވީ އޮޕަރޭޝަން ކުރަމުންދާ ގަޑީގައި ނާރުތައް މަސައްކަތްކުރާ ގޮތް މިމެޝިނުން ދައްކާނެކަމަށެވެ. އެގޮތުން އޮޕަރޭޝަން ކުރަމުންދާއިރު ނާރަކާ ގާތްވެ ނާރަކަށް ގެއްލުން ލިބޭފަދަ ބަދަލެއް އަންނަނަމަ އެމެޝިނުން ޕަސެންޓޭޖާއެކު ދައްކާނެކަމަށެވެ. ޑރ. އަލީ ނިޔާފްވަނީ އާންމުކޮށްކުރާ ސާޖަރީތަކުގައިވެސް މިވަސީލަތުގެ މުހިންމުކަން ފާހަގަކުރައްވާފައެވެ.
" ކޮމަން ސާޖަރީތަކުގެ ތެރޭގައި ކަނދުރާގެ ޑިސްކް ސާޖަރީ، މައިބަދައިގެ ޑިސްކް ސާޖަރީ ނޫނީ މައިބަދަޔަށް ގެއްލުން ލިބިގެން އަންނަ އޮޕަރޭޝަންތަކުގެ ތެރޭގައި އިސްކުރު ޖަހާއިރު އިސްކުރުގެ އިންޓަގްރިޓީ ނުވަތަ އިސްކުރު ޖެހެމުންދާ ތަނާ އެކީގައި އިތުރު ނާރަކަށް ފިތޭ ކަމަށް ވަންޏާވެސް އޭތި ފާހަގަ ކުރާނެ" ޑރ ނިޔާފް ވިދާޅުވިއެވެ.
ނިއުރޯ ސާޖަރީތަކަށް ބޭނުންކުރާ "އިންޓްރާ އޮޕަރޭޓިވް ނިއުރޯމޮނިޓަރިން" ގެ ހިދުމަތް އައި.ޖީ.އެމް.އެޗް އަދި ދަރުމަވަންތަ ހޮސްޕިޓަލުން މިހާރު މިވަނީ ތައާރަފުކޮށްފައެވެ.
— IGMH (@igmhmv) March 7, 2026
މި ޓެކްނޮލޮޖީގެ އަލީގައި އޮޕަރޭޝަން ކުރަމުންދާ ވަގުތު ނާރުތަކަށް ލިބިދާނެ ގެއްލުންތައް ވަގުތުން ދެނެގަނެ،… pic.twitter.com/A8ozqofLFK
އިންޓްރާ އޮޕަރޭޓިވް ނިއުރޯމޮނިޓަރިން" ތައާރަފުކުރުމާ ގުޅޭގޮތުން އައިޖީއެމްއެޗުން ވިދާޅުވީ މިއީ ސާޖަރީތަކުގައި ނާރުތަކަށް ލިބިދާނެ ގެއްލުންތައް ކުޑަކޮށް، ބަލިމީހާގެ ރައްކާތެރިކަން އިތުރަށް ކަށަވަރުކުރުމަށް އެޅުނު މުހިންމު ފިޔަވަޅެއް ކަމަށެވެ. އަދި މިއީ ރާއްޖޭގެ ޞިއްޙީ ދާއިރާގައި ނާރުގެ ބަލިތަކަށް ދެވޭ ފަރުވާގެ ފެންވަރު މަތިކުރުމަށް ކުރަމުންދާ މަސައްކަތުގެ ތެރެއިން ލިބުނު ބޮޑު ކުރިއެރުމެއްކަމަށެވެ.
އައިޖީއެމްއެޗުން އަންނަނީ ބަލިމީހުންނަށް ދޭ ޚިދުމަތްތަކުގެ ފެންވަރު ރަނަގަޅުކޮށް ޚިދުމަތަށް ޒަމާނީ ޓެކްނޮލޮޖީ ތައާރަފްކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން ދާއިމީގޮތެއްގައި ބަރުދަން ލުއިކުރުމަށް އެހީތެރިވުމަށް ކުރާ ބެރިއަޓްރިކް ސަރޖަރީގެ އިތުރުން ލޮލުގެ ފަރުވާއަށް ޚާއްސަ ވިޓްރިއޯރެޓިނަލް ސާޖަރީގެ ޚިދުމަތްވެސް އެހޮސްޕިޓަލުގައި މިދިޔަ އަހަރުތެރޭގައިވަނީ ފަށާފައެވެ.