ބޮޑު މޮޅަކާއެކު ހުޅުމާލެ ވެޓެރެންސް ސެމީއަށް

އެފްއޭއެމް ވެޓެރެންސް ކަޕް 2026 ގައި ބުރު ސްޕޯޓްސް ކުލަބު މައްޗަށް ބޮޑު މޮޅެއް ހޯދާ ހުޅުމާލެ ވެޓެރެންސް އިން ސެމީފައިނަލަށް ހިގައްޖެއެވެ. ހުޅުމާލެ ވެޓެރެންސް މެޗު ކާމިޔާބުކުރީ 13-0 ގެ ތަފާތު ބޮޑު ނަތީޖާއަކުންނެވެ. މެޗުގައި ހުޅުމާލެ ވެޓެރެންސް ޓމުގެ ހުސެއިން ސިމާޒް ވަނީ 5 ލަނޑުޖަހާފައެވެ. މި ނަތީޖާ އަކީ އަދި މިއަހަރުގެ މުބާރާތުގަ ރެކޯޑެކެވެ.

މާފަންނު އެއްނަންބަރު ޓާފްދަނޑުގައި ކުޅުނު މުޅިމެޗު ކަހަލަގޮތަކަށް ކުޅެފަވަނީ ހުޅުމާލެ ޓީމުންނެވެ. އެޓީމުން ބުރުގެ ގޯލު މެޗުގެ ފުރަތަމަ މިނިޓުގައި ހުޅުވާލަ ދިނީ ސިމާޒްއެވެ.

ހުޅުމާލެ ޓީމުން ލީޑު އިތުރަށް ފުޅާކުރީ އިބްރާހިމް މާޖިދު މެޗުގެ 24 ވަނަ މިނިޓުގައި އޭރިއާ ތެރެއަށް ވަދެ ކާމިޔާބު ކުރި ލަނޑުންނެވެ. ހުޅުމާލެއިން ތިންވަނަ ލަނޑު ކާމިޔާބުކޮއްދިނީ މެޗުގައި 28 ވަނަ މިނިޓުގައި ލިބުނު ކޯނަރަކުން ނާފިއު މުހައްމަދު ހާމިދު ބޮލުން ކާމިޔާބުކުރި ލަނޑުންނެވެ.

މެޗުގެ ހަތަރުވަނަ ލަނޑު ހުޅުމާލެއަށް ކާމިޔާބުކޮއްދިނީ ފުރަތަމަ ހާފު އެންމެ ފަހު މިނިޓުގައި މުހައްމަދު ޒިޔާދެވެ. މެޗުގެ ދެވަނަ ހާފު ފަށައިގެން ދެވަނަ މިނިޓުގައި ސިމާޒް ކާމިޔާބުކޮއްދިން ލަނޑުން ހުޅުމާލެއިން ފަސް ވަނަ ލަނޑު ޖެހިއިރު ހުޅުމާލެ ޓީމުން ހަވަނަ ލަނޑުޖެހީ ނާފިއު ދިން ބޯޅައއެއްގައި އޭރިއާ ތެރެއަށް ވަދެ އަހުމަދު މުއާޒްއެވެ.

ހުޅުމާލެ ޓީމުން ޖެހި ހަތްވަނަ ލަނޑު ކާމިޔާބު ކުރީ ހުސެއިން އަފްރާހް އޭރިއާ ތެރެއިން ފޮނުވާލި ބޯޅައެއް ކީޕަރު އަތުގައި ޖެހިފަ ނުކުތުމުން މުއާޒްއެވެ. މުއާޒް މި ލަނޑު ކާމިޔާބުކުރީ މެޗުގެ 39 ވަނަ މިނިޓުގައެވެ. މެޗުގެ 47 ވަނަ މިނިޓާއި 48 ވަނަ މިނިޓުގައ ކާމިޔާބު ކުރި ލަނޑުތަކުން ސިމާޒް ހެޓްރިކް ފުރިހަމަކުރިއެވެ.

މެޗުގައި ހުޅުމާލެ ޓީމުން ޖެހި ދިހަވަނަ ލަނޑު އެޓީމަށް ކާމިޔާބުކޮއްދިނީ ސިމާޒް ދިން ބޯޅައަކުން މުހައްމަދު ޒޮރީފްއެވެ. ޒޮރީފް މި ލަނޑުޖެހީ މެޗުގެ 54 ވަނަ މިނިޓުގައެވެ.
ހުޅުމާލެއިން ޖެހި 11 ވަނަ ލަނޑުޖެހީ 56 ވަނަ މިނިޓުގައި ޒިޔާދެވެ. 58 ވަނަ މިނިޓުގައި ސިމާޒް ހުޅުމާލެއަށް 12 ވަނަ ލަނޑު ކާމިޔާބުކޮއްދިން އިރު ފަހު ލަނޑު އެޓީމަށް ޖަހައިދިނީ މެޗުގެ އެންމެ ފަހު މިނިޓުގައި މާޖިދެވެ.

މެޗަށް ނުކުތް އިރު ވެސް ހުޅުމާލެއިން ސެމީގެ ޖާގަ ޔަގީންވެފަ އޮތްއިރު މި މޮޅާއެކު އެޓީމު ވަނީ 10 ޕޮއިންޓް ހޯދައިގެން އެއްވަނަ އަށް ޖެހިލާފައެވެ. ދެވަނައިގަ އޮތް ޕޮލިސް ކުލަބަށް 7 ޕޮއިންޓް ލިބިފަވާއިރު އެޓީމުން ވެސް ވަނީ ސެމީގެ ޖާގަކަށަވަރުކޮއްފައެވެ. އެއީ 3 ވަނައިގަ އޮތް ހުއްރިއްޔާ ސްޕޯޓްސް ކުލަބަކަށް ފަހު މެޗުން މޮޅުވެގެން ވެސް ޕޮލިހަށް ވުރެ ގިނައިން ޕޮއިންޓް ހޯދެން ނެތީމައެވެ.