ރާއްޖޭގެ 2000އެއްހާ ތަން މާއްދީ ތަރިކައިގެ ގޮތުގައި ކަނޑައެޅިދާނެ

އާސާރީ ތަންތަން ދަފްތަރުކުރުމަށް ސަރުކާރުން ކުރާ މަސައްކަތްތަކުގެ ތެރެއިން، މުޅި ރާއްޖެއިން 2000އެއްހާ ތަން މާއްދީ ތަރިކައިގެ ގޮތުގައި ކަނޑައެޅިދާނެކަމަށް، ދިވެހިބަހާއި ސަޤާފަތާއި ތަރިކައާބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ.

ރައީސް އޮފީހުގެ ބޭއްވި ނޫސްވެރިންގެ ބައްދަލުވުމެއްގައި ވަޒީރު ވަނީ، އެ ވުޒާރާއިން ކުރައްވަމުން ގެންދަވާ މުހިންމު ބައެއް މަސައްކަތްތަކުގެ މައްޗަށް އަލިއަޅުއްވާލައްވާފައެވެ.

ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ދިވެހިބަހާއި ސަޤާފަތާއި ތަރިކައާބެހޭ ވަޒީރު އާދަމް ނަޞީރު އިބްރާހީމް ވިދާޅުވީ، ރާއްޖޭގެ އެކި ހިސާބުތަކުގައި ހުރި އާސާރީ ތަންތަން ދަފްތަރުކުރުމަށް މުހިންމު މަސައްކަތްތަކެއް ކުރަމުންދާކަމަށެވެ. އެގޮތުން، އެ މަސައްކަތް 3 ގޮތަކަށް ކުރަމުންގެންދާކަން ވަޒީރު ފާހަގަކުރެއްވިއެވެ.

ވަޒީރު ވިދާޅުވީ، މި މަސައްކަތުގެ ތެރެއިން، ސަޤާފީ ތަރިކަ ރައްކާތެރިކުރާ ޤައުމީ މަރުކަޒުން އިސްވެ ބައްލަވާ، އެކަންކަން ރެކޯޑުކުރައްވަމުން ގެންދަވާކަމަށެވެ. އަދި ބިމުން މައްޗަށް ފެންނަ ތަންތަނުގެ އިތުރުން، ބިމުގެ އަޑި ސްކޭން ކޮށްގެން ބަލަންޖެހޭ ބެލުންތައްވެސް ތަރިކަ ރައްކާތެރިކުރާ މަރުކަޒުން ކުރިއަށްގެންދަވާކަމަށެވެ.

ވަޒީރު ވިދާޅުވީ، އާސާރީ ތަންތަން ދަފްތަރުކުރުމަށް ކުރާ މަސައްކަތުގެ ތެރެއިން މިހާތަނަށް 400އެއްހާ ތަން މުޅިން ކަށަވަރުކުރެވިފައިވާކަމަށެވެ. އަދި މުޅި ރާއްޖެއިން، 2000އެއްހާ ތަން މާއްދީ ތަރިކައިގެ ގޮތުގައި ކަނޑައެޅިދާނެކަމަށް ވަޒީރު ވިދާޅުވިއެވެ.

"މިހާތަނަށް ކުރެވުނު މަސައްކަތްތަކުން މިހާތަނަށް 400އެއްހާ ތަން މުޅިން ކަށަވަރުކުރެވިފަ އެބަހުރި. އެތަންތަނެއް ނުއެއްކޮނޭ. އެކަމަކު ސްކޭންތަކުން ދައްކާ މަޢުލޫމާތުތަކުން ބައެއް ތަންތަން ކަށަވަރުކުރެވިފަ އެބަހުރި. އެކަމަކު ލަފާއެބަކުރެވޭ އެއަށްވުރެ މާގިނައިން މުޅި ރާއްޖެއިން 2000އެއްހާ ތަން މާއްދީ ތަރިކައިގެ ގޮތުގަ ކަނޑައެޅިދާނެކަމަށް. މިގޮތަށް މިހާރު އަޅުގަނޑުމެންނަށް އެބަ ލަފާކުރެވޭ". ވަޒީރު ވިދާޅުވިއެވެ.

ރާއްޖޭގައި ހުރި ދުވަސްވީ އާސާރުތައް ރައްކާތެރިކޮށް އަންނަން އޮތް ޖީލުތަކަށް ފޯރުކޮށްދިނުމަށް ސަރުކާރުން ދަނީ މަސައްކަތްކުރައްވަމުންނެވެ. އަދި މި މަސައްކަތުގައި އެކި ޤައުމުތަކުގެ އެހީތެރިކަންވެސް ދަނީ ހޯދަމުންނެވެ.