އީރާނާ ދެކޮޅަށް ރައީސް ޑޮނަލްޑް ޓްރަމްޕް ފަށްޓަވާފައިވާ ޣައިރުޤާނޫނީ ހަނގުރާމަ ހުއްޓުވުމަށް އެމެރިކާގެ ޤާނޫނު ހަދާ މަޖިލީހުގެ ތިރިގެ، ހައުސް އޮފް ރެޕްރެޒެންޓެޓިވްސްއަށް ހުށަހެޅި ޤަރާރު ނާކާމިޔާބު ކޮށްލައިފިއެވެ. މާރިޗު 5ވަނަ ދުވަހު ހައުސްގައި ނެގި ވޯޓާއެކު، ހައުސްއިން ވެސް މި ވަނީ ހަވަނަ ދުވަހަކަށް ދެމިގެން ގޮސްފައިވާ ހަނގުރާމައިގައި ރައީސް ޓްރަމްޕްގެ ސިޔާސަތުތަކަށް ތާޢީދު އޮތްކަން ހާމަކޮށްފައެވެ.
ޓްރަމްޕްގެ ހަނގުރާމަ ހުއްޓުވުމަށް ޤަރާރު ހުށަހަޅުއްވާފައި ވަނީ އިދިކޮޅު ޑިމޮކްރެޓިކް ޕާޓީގެ މެންބަރުންނެވެ. މި ޤަރާރު ފޭލުވެފައި ވަނީ ހައުސްގެ 219 މެންބަރުންގެ ވޯޓުންނެވެ. ހަނގުރާމައާ ދެކޮޅަށް ވޯޓުދެއްވީ 212 މެންބަރުންނެވެ. ޤަރާރާ މެދު ނެގި ވޯޓުން ފެނިގެން ދިޔައީ ހައުސްގައި ޕާޓީގެ ރޫހު އޮތް ގޮތެވެ. ސަބަބަކީ، ހައުސްގައި އަޣުލަބިއްޔަތު އޮތީ ޓްރަމްޕްގެ ރިޕަބްލިކަން ޕާޓީއަށެވެ. ނަމަވެސް، ޓްރަމްޕްގެ ޕާޓީގެ ދެ މެންބަރަކު ވަނީ ހަނގުރާމަ ހުއްޓުވުމަށް ތާޢީދު ކުރައްވާފައެވެ. ޑިމޮކްރެޓުންގެ ތެރެއިން ވެސް ހަތަރު މެންބަރަކު ވަނީ، ޕާޓީގެ ވިސްނުމާ ދެކޮޅަށް، ހަނގުރާމަ ކުރިއަށް ގެންދިޔުމަށް ތާޢީދުކޮށް ވޯޓު ދެއްވާފައެވެ.
ޤަރާރާ ދެކޮޅަށް ވޯޓު ދެއްވި ރިޕަބްލިކަން ޕާޓީގެ މެންބަރުން ސިފަކުރެއްވި ގޮތުގައި، މިއީ ހަނގުރާމައާ ދެކޮޅަށް ހުށަހަޅާފައިވާ ޤަރާރެއް ނޫނެވެ. މިއީ ޓްރަމްޕާ ދެކޮޅަށް ހުށަހަޅާފައިވާ ޤަރާރެއެއް ކަމުގައި ވެސް އެ މެންބަރުން ސިފަ ކުރެއްވިއެވެ. "ވެރިކަމުގައި ހުންނެވީ ޑޮނަލްޑް ޓްރަމްޕް ނޫން އެހެން ބޭފުޅެއް ނަމަ، މިއަދު އަޅުގަނޑުމެން މި ތަނުގައި ނުތިބޭނެ،" ހައުސްގެ ޖާސޫސީ ކަންކަމާ ބެހޭ ކޮމިޓީގެ މުގައްރިރު ރިކް ކްރޯފޯޑް ވިދާޅުވިއެވެ. ޚާރިޖީ ގުޅުންތަކާ ބެހޭ ކޮމިޓީގެ މެންބަރު ގްރެގަރީ މީކްސް ވިދާޅުވީ، މިއީ އެއްވެސް ހުއްދައެއް ނެތި، އަދި ސާފު އަމާޒެއް ނެތި ފަށާފައިވާ ހަނގުރާމައެއް ކަމުގައެވެ.
ނަމަވެސް، ޤަރާރުގެ ފަހަތުގައި ތިއްބެވި މެންބަރުން ވަނީ ޤަރާރު ދިފާޢު ކުރައްވާފައެވެ. އެ މެންބަރުން ވިދާޅުވީ، މިއީ ޤާނޫނުއަސާސީން އެމެރިކާގެ ޤާނޫނު ހަދާ މަޖިލިސް، ކޮންގްރެސްއަށް މަތިކޮށްފައިވާ ޒިންމާއާއި ބާރުތައް އަނބުރާ ހޯދުމަށް ހުށަހެޅި ޤަރާރެއް ކަމުގައެވެ. އެ މެންބަރުން އިޝާރާތް ކުރައްވާފައި އެ ވަނީ، އެއްވެސް ޤައުމަކާ ދެކޮޅަށް ހަނގުރާމަ އިޢުލާނު ކުރުމުގެ ބާރެވެ. އެމެރިކާގެ ޤާނޫނުއަސާސީން އެ ބާރު މަތިކޮށްފައި އޮންނަނީ ކޮންގްރެސްއަށް އެކަންޏެވެ.
ފެބުރުވަރީ 28ވަނަ ދުވަހު، ކޮންގްރެސްގެ ހުއްދައާ ނުލައި ޓްރަމްޕް އިސްވެ، ޔަހޫދީންނާ ގުޅިގެން ފެށްޓެވި ހަނގުރާމައިގައި ޝަހީދު ކޮށްލާފައިވާ އީރާންގެ ރައްޔިތުންގެ އަދަދު ވަނީ 1,230އަށް އުފުލިފައެވެ. އޭގެ ތެރޭގައި ޢާންމުންގެ ގިނަ އަދަދެއްގެ ބަޔަކާއި، ކުޑަކުދިން ވެސް ހިމެނެއެވެ. އަދި، ޒަޚަމު ކޮށްލާފައިވާ މީހުންގެ އަދަދު އެތަކެއް ސަތޭކައަށް އަރައެވެ. އީރާނުން ވެސް ދަނީ، އެ ޤައުމުގެ މިނިވަންކަމާއި އިސްތިޤުލާލުގެ ދިފާޢުގައި ޙަމަލާ ދެމުންނެވެ.
އީރާންގެ ގިނަ ޙަމަލާތައް އަމާޒު ކުރަމުން ދަނީ ޔަހޫދީ ދައުލަތުގެ ރަށްތަކަށެވެ. އަދި، ގަލްފާއި ޢަރަބި ޤައުމުތަކުގައި އޮތް އެމެރިކާގެ އަސްކަރީ މަރުކަޒުތަކާއި، އެމެރިކާގެ މަސްލަަޙަތު އޮތް އިމާރާތްތަކަށް ކަމުގައި އީރާނުން ބުނެއެވެ. އެ ޙަމަލާގައި ޔަހޫދީ ދައުލަތުން 11 މީހުން ވަނީ މަރައިލާފައެވެ. އަދި، އެތަކެއް ސަތޭކަ ބަޔަކު ޒަޚަމު ކޮށްލާފައެވެ. އީރާނުން މިސައިލް ޙަމަލާތަކެއް ފޮނުވައިލާ ކޮންމެ ފަހަރަކު، ޔަހޫދީ ދައުލަތުގެ މިލިޔަނަކަށް ވުރެ ގިނަ ރައްޔިތުން ބިންގަރާސްތަކެއް ވަދެ، ފިލައެވެ. މީގެ
އިތުރުން، އީރާނުން ވަނީ އެމެރިކާ ސިފައިންގެ ހަ މީހަކު ވެސް މަރައިލާފައެވެ.