ދިވެހިރާއްޖެ: ހަގީގަތުގައިވެސް ފަތުރުވެރިންގެ ހިތްތަކުގެ ވެރިޔާ

ޖަރުމަނުވިލާތުގެ ވެރިރަށް ބާލިންގައި މިހާރު ކުރިއަށްދާ އައިޓީބީ ބާލިން 2026ގައި ދިވެހިރާއްޖެ ވިދާލީ ހަމައެކަނި ރީތި ސްޓޭންޑަކާއި ކުލަގަދަ ޑިސްޕްލޭތަކުން ނޫނެވެ.

މިފަހަރުގެ މި ބައިނަލްއަޤުވާމީ ފެއަރގައި ތަފާތު ވާހަކަތަކުން ފުރިގެންވާ ސްޓޭންޑެއް ފެނިގެންދިޔަ ނަމަވެސް އެންމެ ބޮޑަށް އިވިގެންދިޔައީ ދިވެހިރާއްޖޭގެ ނަން ކިޔާލުމާއެކު ދުނިޔޭގެ ހަތަރު ބިތުން ޒިޔާރަތްކުރި ފަތުުރުުވެރިންނާއި ޓްރެވަލް ޕްރޮފެޝަނަލުންގެ ވާހަކަތަކެވެ.

މި ވާހަކަތައް އެންމެ ރަނގަޅަށް ކިޔައިދިނީ ޖަރުމަނުވިލާތުން ރާއްޖެއަށް ކަނޑައަޅުއްވާފައި ހުންނަވާ ސަފީރު އައިޝަތު ޝާން ޝާކިރެވެ.

"އަޅުގަނޑު ޑޮކްޓަރަށް ދައްކަން ދިޔަ ކަމުގައިވީނަމަވެސް ނުވަަތަ އިވެންޓަކަށް ދިޔަ ކަމުގައިވީނަމަވެސް ހަމަ ވަރަށް ގިނައިން ބުނާނެ އަޅުގަނޑަކީ ރާއްޖެ މީހެކޭ ބުނާއިރަށް ތިމަންނަވެސް ރާއްޖެ ދިޔައީމޭ. ވަރަށް ސަޅި، ހިތްގައިމު ތަނަކޭ އެއީ. އެހެން އަޅުގަނޑަށް ދިމާވެފަ އެބަހުރި ރާއްޖެއަށް 45 ފަހަރު ދިޔަ މީހެއްވެސް. އަނެއްކާ އެމީހާ އަންނަ އަހަރުގެ އެޕްރީލް މަހު ރާއްޖެއަށް ދާން އުޅޭ ވާހަކަ ބުނި އަޅުގަނޑު ގާތު ބުނި." ސަފީރު އައިޝަތު ޝާން ސާކިރު ވިދާޅުވިއެވެ.

ދިވެހިރާއްޖެ ދެކެ ލޯބިވާ ވާހަކަ ދައްކާ ހިތްވި ބަޔަކު ހޯދަންވެސް ނުޖެހުނުއެވެ. ދިވެހި ޕެވިލިއަންގެ ކައިރިން ހިނގާ ކޮންމެ ފިޔަވަޅެއް ކަހަލަ ގޮތަކަށް ދިވެހިރާއްޖޭގެ ވާހަކަ ދެކެވެމުން ދިޔައެވެ. ބައެއް ފަހަރު ދިވެހި ޕެވިލިއަންގެ ތެރޭގައި، ބައެއް ފަހަރު ކޮފީ ހިފައިގެން ހިނގާލަ ހިނގާލާ ތިބި ދެ ޓްރެވަލް އެޖެންޓެއްގެ ދެމެދުގައި، ބައެއް ފަހަރު ހޯލުގެ ކަނެއްގައި ތިބި ބަޔަކު ދައްކަމުންދިޔަ ވާހަކައިގެ ތެރޭގައިވެސް އަޑު އިވެމުންދިޔައީ ދިވެހިރާއްޖޭގެ ހިތްގައިމު ވާހަކަތަކެވެ.

"ދިވެހިރާއްޖެ. އަޅެ ކީކޭތަ ނުބުނާނީ ރާއްޖޭއާ ދޭތެރޭގައި. އަޅުގަނޑު ރާއްޖެ ދިޔައީ އެއްފަހަރު. ގޮސްފަ ތިބި ރިސޯޓުވެސް ވަރަަށް ސަޅި، އަނެއްކާ އެއޮތް ވެލިގަނޑަކާ މޫދެއްދޯ، އަޅުގަނޑު ހަމަ އާޝޯހުވި. އަދިވެސް ދާން މިއުޅެނީ ރާއްޖެއަށް. އަޅުގަނޑުގެ ފިރިމީހާ ގާތުވެސް ކިޔައިފިން ހިންގާބަލާށޭ މިއަހަރު އެނިވާރސަރީއަށް ރާއްޖެއަށް ދާން." ޕީއެސްއެމް ނިއުސްއާ ވާހަކަދެއްކި ޖަރުމަނުގެ ރައްޔިތެއް ބުނިއެވެ.

އިނގިރޭސި ބަހުން ކިތަންމެ ނުފަރުތަކަމުގައިވީނަމަވެސް ބައެއް މީހުން ތިބީ ރާއްޖޭގެ ވާހަކަ ދައްކަން ކެތްމަދުވެފައިއެވެ.

"ރާއްޖެ އެއީ އަޅުގަނޑު ވަރަށް ލޯބިވާ ތަނެއް. ހަމަގޮސްފަ ރިލެކްސް ކޮށްލަންވީ. ދެން ރިލެކްސް ކޮށްލަން ބޭނުންވާ ދުވަހެއްގައި ވެއްޖެއްޔާމު ހަަމަދާނީ ވޯޓާރ ސްޕޯޓްސް ނޫނީ ކޮންމެވެސް އެކަހަލަ ކުޅިވަރެއް ކުޅެން. ދުވަހަކުވެސް ރާއްޖެއަށް ދާ ފަހަރަކު މީހާ ފޫސެެއްނުވާނެ. ހަަމަ ހުންނާނީ އަނބުރާ އަންނަ ބޮޑު ކަމަކަށް ވެފަ." ޕީއެސްއެމް ނިއުސްއާ ވަހާކަދެއްކި ޕޯލެންޑުގެ ރައްޔިތެއް ކިޔައިދިނެވެ.

"ވަރަށް ގިނަ ތަންތަނަށް ޓްރެވްލަ ކުރާ މީހެއް އަޅުގަނޑަކީ. އެކަމު އަދި ދުވަހަކުވެސް ރާއްޖެ ކަހަލަ ސަޅި ތާކަށް ނުއެއް ދެވޭ. ބީޗްތަކާއި ތަންތަން ވަރަށް ސަޅި. އަދި މީހުންވެސް ހާދަ ހިތްހެވޭ. އަޅުގަނޑު ހުރި ރިސޯޓުގައި މަސައްކަތްކުރަން ތިބި ދިވެހީންވެސް ވަރަށް ހިތްހެޔޮ. ހަމަ އަބަދުވެސް ގޮވާލާނެ. ހީވާނީ އަބަދުވެސް ދަންނަ ބައެއްހެން." މިހާތަނަށް 63 ޤައުމަކަށް ޒިޔާރާތްކޮށްފައިވާ ޖަރުމަނުގެ ރައްޔިތެއް ކިޔައިދިނެވެ.

ކޮންމެއަކަސް މިއަހަރުގެ އައިޓީބީ ފެއަރ އިން އަޅުގަނޑުމެންނަށް އެނގިގެންދިޔަ ނުވަތަ ހާމަވެގެންދިޔަ އެއްކަމަކީ ރާއްޖޭއަކީ މުޅި ދުނިޔޭގައިވެސް ބޮޑު މަގުބޫލުކަމެއް ހޯދާފައިވާ މަންޒިލެއްކަމެވެ. އަބަދުވެސް ރާއްޖެއަށް ދަތުރުކޮށްލާ ޗުއްޓީ ހޭދަކޮަށްލުމަށް ދާން ބޭނުންވާ ބައެއް ތިބިކަމެވެ. ދިވެހިރާއްޖެއަކީ ހަމަ ހަގީގަތުގައިވެސް މި ދުނިޔެމަތީގައިވާ ސުވަރުގެކަމެވެ.