މައްކާގައި ދޭ ދީނީ ދަރުސްތަކާއެކު އަޅުކަމަށް އިތުރު ހިތްވަރަކާއި ޖޯޝެއް

ރަމަޟާން މަހަކީ، ދީނީ އަޅުކަމަށް މުސްލިމުން ހުސްވެގެން ތިބޭ މަހެކެވެ. މިމަހުގެ ދަރުމައާއި ޘަވާބު އިތުރު ކުރުމަށް އަޅުކަމުގައި ގިނަ ވަގުތު ހޭދަކުރުމާއި، ދީނީ ހޭލުންތެރިކަން އިތުރު ކުރުމަށް އެކި މަސައްކަތްތައް ކުރުމަކީ ދިވެހީންގެ އާދަކާދައިގެ ތެރެއިން ހިމެނޭ ކަމެކެވެ. ޙައްޖު ކޯޕަރޭޝަންގެ ޙަވާލުގައި ޢުމްރާއަށް އައިސްފައިވާ ޢުމްރާވެރިންނަށްވެސް ދީނީ މަޢުލޫމާތު ފޯރުކޮށްދީ، ދީނީ ހޭލުންތެރިކަން އިތުރު ކުރުމަށް ކޯޕަރޭޝަނުން ޚާއްސަ އިސްކަމެއްދެއްވައެވެ.

ރަމަޟާން މަހަކީ، މާތްﷲ އަށް އެއްކައުވަންތަކޮށް، އަޅުކަމުގައި ދެމިތިބުމަށް މުސްލިމުން އެންމެ ބޮޑަށް މަސައްކަތް ކުރާ މަހެވެ. ދިވެހީންގެ ތެރެއިން ގިނަ ބަޔަކު ރަމަޟާން މަހުގެ ގިނަ ވަގުތު އަޅުކަމަށް ހުސްކުރުމަށް ދިރިއުޅުމުގެ އާދަކާދައަށްވެސް ގިނަ ބަދަލުތަކެއް ގެނެއެވެ. މީގެއިތުރުން ރަމަޟާން މަހު އަޅުކަން އިތުރު ކުރުމަށް ފަހަކަށް އައިސް ޢުމްރާގެ އަޅުކަމުގައި ރަމަޟާން މަހު ހޭދަކުރާ މީހުންވެސް ދަނީ އިތުރުވަމުންނެވެ.

އަމިއްލަ ޤައުމާއި ދުރުގައި އަމިއްލަ ބަހާއި ދުރުގައި، ނަމަވެސް ދިވެހީންގެ ދީނީ ހޭލުންތެރިކަން އިތުރު ކުރުމަށް މައްކާގެ މާތް ބިމުގައިވެސް ކުރާ މަސައްކަތް ދިވެހީން ހުއްޓައި ނުލައެވެ. ޙައްޖު ކޯޕަރޭޝަންގެ ޙަވާލުގައި ޢުމްރާގެ އަޅުކަމަށް ރަމަޟާން މަހު ގޮސް ތިބި މީހުންނަށް އަމާޒުކޮށް ކޯޕަރޭޝަނުން އަންނަނީ ކޮންމެ ދުވަހެއްގެވެސް މެންދުރު އެކި މަޢުޟޫތަކަށް ދީނީ ދަރުސްތައް ދެމުންނެވެ. މިދަރުސްތަކުގައި ބައިވެރިވާ ޢުމްރާވެރިންވެސް ގިނައެވެ.

ޕީއެސްއެމްނިއުސްއަށް މަޢުލޫމާތު ދެއްވަމުން ޙައްޖު ކޯޕަރޭޝަންގެ ޑެޕިއުޓީ މެނޭޖިންގ ޑިރެކްޓަރ، ޝެއިޚް އަލްއުސްތާޛު ޢަލީ ޝަރީފް ވިދާޅުވީ، ޢުމްރާވެރިން ރަމަޟާން މަހާ ދިމާކޮށް އަންނަނީވެސް ދީނީ ކަންކަމަށް ހުސްވުމަށްކަމުން އެކަމަށް ކޯޕަރޭޝަނުން ޚާއްސަ ސަމާލުކަމެއް ދެއްވާ ކަމަށެވެ.

"އަޅުގަނޑުމެން ކޮންމެ ދުވަހެއްގެ މެންދުރު އެބަ ދީނީ ދަރުސްތައް ކުރިއަށް ގެންދަން. އަދި ދީނީ މަޢުލޫމަތު އެބަފޯރުކޮށްދެވޭ ހޭލުންތެރިކަން އިތުރު ކުރުމަށް، ރޭގަނޑު ތަރާވީސް ނަމާދަށްފަހު އަޅުގަނޑުމެންގެ ދީނީ ޢިލްމުވެރިން ތިއްބަވާނެ ޢުމްރާވެރިން އުފެދޭ ސުވާލުތަކަށް ޖަވާބު ދެއްވުމަށް." ޑީއެމްޑީ ވިދާޅުވިއެވެ.

ޙައްޖު ކޯޕަރޭޝަންގެ ފަރާތުން މިފަހަރު ދީނީ ދަރުސް ދެއްވުމަށް، ކޯޕަރޭޝަންގެ ޗެއަރމަން ޝެއިޚް މުޙައްމަދު ރަޝީދު އިބްރާހީމާއި، ޑެޕިއުޓީ މެނޭޖިންގ ޑިރެކްޓަރ ޝެއިޚް އަލްއުސްތާޛު ޢަލީ ޝަރީފް ގެންދަވަނީ މަސައްކަތް ކުރައްވަމުންނެވެ.

ރޯދައާއި ގުޅިފައިވާ މުހިއްމު ކަންކަން ދީނީ ނަޒަރަކުން ޢުމްރާވެރިންނަށް ކިޔައިދީ، އަހަރުގެ އެންމެ މާތް ދުވަސްވަރު މައްކާގެ މާތް ބިމަށް އާދެވުމުން، މިފުރުޞަތުގެ ބޭނުން އެންމެ ރަނގަޅު ގޮތުގައި ހިފުމަށް ޢުމްރާވެރިންނަށް ހުރިހާ ކަމެއް ފަހިކޮށްދިނުމަށް ކޯޕަރޭޝަނުން ދަނީ މަސައްކަތް ކުރައްވަމުންނެވެ.