ރަނގަޅު ޢާއިލާއެއް ބިނާކުރެވޭނީ ޤުރުޢާނާއި ސުންނަތުގެ އަލީގައި ޢާއިލާ ބިނާކޮށްގެން

ރަނގަޅު ޢާއިލާޢެއް ބިނާކުރެވޭނީ، ޤުރުޢާނާއި ސުންނަތުގެ ޢަލީގައި ޢާއިލާތައް ބިނާކޮށްގެން ކަމަށް އައްޝައިޙް މުޙައްމަދު ލަތީފް ވިދާޅުވެއްޖެއެވެ. އިސްލާމީ މަރުކަޒުގެ އިސް އިމާމު ޝެއިޙް ލަތީފް މިހެން ވިދާޅުވެފައިވަނީ މާލޭގައި ކުރިއަށްގެންދާ އިހްޔާ ފޯރަމުގެ ޖަލްސާގައި ވާހަކަ ދައްކަވަމުންނެވެ.

"ޢާއިލީ ގުޅުން ދެމެހެއްޓުން" މިމަޢުޟޫއަށް އިސްލާމީ މަރުކަޒުގައި ކުރިއަށް ގެންދިޔަ އިހްޔާ ފޯރަމުގައި ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދާއި އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް ޢަލީ ސަޢީދު ބައިވެރިވެވަޑައިގެންނެވިއެވެ.

ފޯރަމުގައި ތަޤުރީރު ކުރައްވަމުން އިސްލާމީ މަރުކަޒުގެ އިސް އިމާމު ޝައިޙް މުހައްމަދު ލަތީފް ވިދާޅުވީ ޢާއިލާއެއްގެ އެންމެ އަސާސީ އުންސުރަކީ މައިންބަފައިން ކަމަށެވެ. އަދި އިންސާނީ މުޖްތަމަޢު ބިނާކުރުމުގެ އެންމެ މުހިންމު ގުނަވަނަކީ ޢާއިލާ ކަމަށްވާއިރު ޢާއިލާ ރަނގަޅު ގޮތުގައި ބިނާކޮށް އެޢާއިލާގެ ގުޅުން ހެޔޮގޮތުގައި ދެމެހެއްޓިއްޖެނަމަ، އެ މުޖްތަމަޢެއްގެ އަފްރާދުންގެ މެދުގައި ގުޅުންތައް ބަދަހިވާނެ ކަމަށެވެ. މިކަމަށް ކީރިތި ޤުރުޢާނާއި ސުންނަތުގައި ބާރުއަޅުއްވާފައިވާކަމަށް ޝައިޚް ލަތީފް ވިދާޅުވިއެވެ.

"ޢާއިލާ ގުޅުން ލޯތްބާއި އޯގާތެރިކަމާއި ރަހުމުގެ މައްޗަށް ގުޅުން ޤާއިމްވާންޖެހޭނެ ކަމަށް. އެގުޅުން ބަދަހިވެ ވަރުގަދަ ވެގެންދާނީ އެކަކު އަނެކަކަށް އިޙްތިރާމްކޮށްގެން. އެހެން ނޫންނަމަ އެގުޅުން ބަލިކަށިވެގެންދާނެ. އިސްލާމްދީން ވަނީ ޢާއިލީ ހަޔާތް ހެޔޮގޮތުގައި ދެމެހެއްޓުމަށްޓަކައި ފުރިހަމަ ނިޒާމެއް ޤާއިމްކޮށްދީފައި، އޭގައި ޢާއިލާގެ ކޮންމެ ފަރުދެއްގެ ވެސް ޒިންމާތަކެއް ކަނޑައަޅުއްވާފައިވޭ. އަދި އެހެންމެ އެމީހުން އަދާކުރަން ޖެހޭ ހައްޤުތައްވޭ. " ޝައިޚް ލަތީފް ވިދާޅުވިއެވެ.

ޝައިޚް ލަތީފް ވިދާޅުވީ ޢާއިލާއެއް ހެޔޮގޮތުގައި ބިނާކުރުމަށް، ފިރިމީހާ އަދި އަނބިމީހާވެސް އެމީހެއްގެ މައްޗަށް ލާޒިމްވެފައިވާ ހައްޤުތައް އަދާކުރަން ޖެހޭ ކަމަށެވެ. ޝައިޚް ވަނީ ރަސޫލާގެ ހަދީސްފުޅަކުން ދަލީލް ދައްކަވާ، އެމީހަކާއި ހަވާލުވެފައިވާ ޒިންމާތައް އަދާނުކުރާނަމަ އެކަމާއި މެދު ޤިޔާމަތް ދުވަހުން މާތް ﷲ އެމީހަކާއި ސުވާލުކުރައްވާނެކަން ހަނދުމަކޮށްދެއްވާފައެވެ. އަދި އަނބިމީހާވެސް ފިރިމީހާވެސް އެކަކު އަނެކަކަށް ހެޔޮކޮށް ހިތުމުގެ މުހިންމުކަން ޝައިޚް ފާހަގަކުރެއްވިއެވެ.

ހެޔޮގޮތުގައި ޢާއިލާއެއް ބިނާކުރުމުގައި މައިންބަފައިންގެ މައްޗަށް ހައްޤުތަކެއްވާ ފަދައިން ދަރިންގެ މައްޗަށްވެސް ހައްޤުތަކެއްވާކަން އިޙްޔާ ފޯރަމުގައި ވާހަކަ ކުރިއަށް ގެންދަވަމުން ޝައިޚް ލަތީފް ހަނދުމަކޮށްދެއްވިއެވެ. އެގޮތުން ދަރިން މައިންބަފައިންނަށް އިހުސާންތެރިވުމަށް ދީނުގައި އަންގަވާފައިވާކަން ހަނދުމަކޮށްދެއްވިއެވެ.

ޝައިޚް ލަތީފް ވަނީ ޢާއިލާތައް ރޫޅިގެންދާ ސަބަބުތަކަށްވެސް އަލިއަޅުއްވާލައްވާފައެވެ. އެގޮތުން ގިނަ ފަހަރަށް ޢާއިލާތައް ރޫޅިގެންދަނީ ދީނުގައި އަންގަވާފައިވާ ކަންކަމަށް ނުބަލާތީ ކަމަށް ޝައިޚް ލަތީފް ވިދާޅުވިއެވެ.

މިއާއެކު ހެޔޮގޮތުގައި ޢާއިލާއެއް ބިނާކުރުމަށް އިސްކަންދޭންޖެހޭ ކަންކަން ޝައިޚް ވަނީ ޤުރުޢާނާއި ސުންނަތުގެ ޢަލީގައި ހިއްސާކޮށްދެއްވާފައެވެ. ކައިވެނިކުރާއިރު ސާލިޙް ބައިވެރިން އިޙްތިޔާރުކުރުމަށް ދީން ބާރުއަޅުއްވާކަމަށް ޝައިޚް ލަތީފް ވިދާޅުވިއެވެ. އަދި ސާލިޙް ދަރިން ދެއްވުމަށް އެދި ދަރިން ލިބުމުގެ ކުރިންވެސް އަދި އޭގެ ފަހުންވެސް ދުޢާކުރުމުގެ މުހިންމުކަމަށް ޝައިޚް ލަތީފް ވަނީ އަލިއަޅުއްވާލައްވާފައެވެ. މީގެ އިތުރުން ދަރިންނަށް ދީން އުނގަންނައިދީ ރަނގަޅު ތަރުބިއްޔަތެއްދޭންޖެހޭ ކަން ފާހަގަކުރައްވާ ޢާއިލީ ގުޅުންތައް ދެމެހެއްޓުމަށް ޝައިޠާނާގެ ވަސްވާސްތަކުން ދުރުވުމަށް ޝައިޚް ލަތީފް ގޮވާލެއްވިއެވެ. މީގެ އިތުރުން ކުދި މައްސަލަތައް ޢާއިލާތެރޭގައި، ހައްލުކުރުމަށާއި ރަހިމުގެ ގުޅުން ދެމެހެއްޓުމަށް ޝައިޚް ލަތީފް ވަނީ ގޮވާލައްވާފައެވެ.

މި ފޯރަމްވެސް ނިންމާލާފައިވަނީ ފޯރަމުގެ ބައިވެރިންގެ މެދުގައި ގުރުއަތެއް ނެގުމަށްފަހުއެވެ. އަދި ގުރުއަތުން ހޮވުނު ފަރާތްތަކަށް ވަނީ އިނާމްތައް ހަވާލުކޮށްފައެވެ.