ފްލެޓާއި ގޯއްޗަށް ފޯމު ހުށައެޅުމަށްފަހު ބަދަލު ގެނައުމަށް ފުރުޞަތު ލިބޭނެ

ގޯތި އަދި ފްލެޓަށް ފޯމު ހުށައަޅާފަވާ މީހުން، ހުށައެޅުމަށްފަހު ބަދަލެއް ގެންނަން ބޭނުންވާނަމަ އެއް ފުރުޞަތު ދޭން ގެދޮރުވެރިކަމާ ބެހޭ ވުޒާރާއިން ނިންމައިފިއެވެ.

އިމާރާތް ކުރުމާއި ގެދޮރުވެރިކަމާ ބިނާރާ ބެހޭ ވުޒާރާއިން ވިދާޅުވީ، "އާއިލީ ބޯހިޔާވަހިކަން" ޕްރޮގްރާމުގެ ދަށުން، ފޯމު ހުށަހެޅުމުގައި މަޢުލޫމާތު ފުރިހަމަނުކޮށް ނުވަތަ ނުބައި މަޢުލޫމާތު ހުށަހެޅިފައިވާ ފަރާތްތަކަށް އެކަން ޝަކުވާއެއްގެ ގޮތުގައި "ބޯހިޔާވަހިކަން" ޕޯޓަލް މެދުވެރިކޮށް ފަސޭހަކަމާއެކު ހުށައެޅޭނެ ކަމަށެވެ.
އެގޮތުން "ބޯހިޔަވާހިކަން އެންމެންނަށް" ޕޯޓަލްގެ މެއިން މެނޫއިން ޝަކުވާ ހުށައެޅުމަށް ޚާއްސަ ކޮށްފައިވާ ޓެބެއް ހިމަނާފަވާ ކަމަށެވެ.

ފޯމަށް ބަދަލު ގެނައުމަށް އެދި ކޮންމެ މީހަކަށްވެސް ދޭނީ، އިތުރު އެންމެ ފުރުޞަތެކެވެ. އަދި މި ޝަކުވާ ހުށައެޅޭނީ، ފޯމު ހުށައެޅުމުގެ ސުންގަޑީގެ ގޮތުގައި މިނިސްޓްރީން ހަމަޖައްސާފައިވާ މުއްދަތުގެ ތެރޭގައެވެ.

އެ ވުޒާރާއިން މިހާރު ވަނީ، "ބޯހިޔާވަހިކަން އެންމެންނަން" ސްކީމްގެ ދަށުން، ގޯއްޗާއި ފްލެޓަށް ފޯމު ހުށައެޅޭ މުއްދަތު އިތުރުކޮށްފައެވެ. އެގޮތުން ގޯއްޗާއި ފްލެޓަށް އެދި ހުށައެޅުމުގެ މުއްދަތު އޭޕްރިލް މަހުގެ 30ގެ ނިޔަލަށް ވަނީ އިތުރުކޮށްފައެވެ.

"އާއިލީ ބޯހިޔާވަހިކަން" ޕްރޮގްރާމުގެ ދަށުން ފޯމު ހުށަހެޅުމުގައި މަޢުލޫމާތު ފުރިހަމަ ނުކޮށް ނުވަތަ ނުބައި މަޢުލޫމާތު ހުށަހެޅިފައިވާ ފަރާތްތަކަށް ފޯމާއި ގުޅޭގޮތުން ޝަކުވާ ހުށަހެޅުން;

ޕޯޓަލްގެ މެނޫ ޓެބުން ޝަކުވާ ހުށަހެޅުމަށް ޙާއްސަކުރެވިފައިވާ ޓެބެއް ފެންނާނެ. pic.twitter.com/0azoUkqPv5

— Ministry of Construction, Housing & Infrastructure (@MoCImv) March 2, 2026

ކުރިން ނިންމާފައިވަނީ ފޯމު ހުށައެޅުމަށްފަހު، ފޯމަށް އެއްވެސް ބަދަލެއް ނުގެނެވޭނެ ގޮތަށެވެ. ނަމަވެސް ފަހުން ފުރުޞަތެއް ދޭން ނިންމީ، ބައެއް މީހުންގެ ބައެއް އަސާސީ މަޢުލޫމާތު ހިމެނުމުގައި މައްސަލަތައް ހުރުމުން އެކަން ބަދަލުކުރަން ބޭނުންވެގެން ހުށައަޅަމުންދާތީ ކަމަށް އެ ވުޒާރާއިން ވިދާޅުވިއެވެ. އެގޮތުން މެއިލް މެދުވެރިކޮށް މިހާރުވެސް އެކަމަށް ހުށައަޅަމުންދާތީ، މި ބަދަލު ގެންނަން ނިންމީ ކަމަށް ވުޒާރާއިން ވިދާޅުވިއެވެ.

ސަރުކާރުގެ ބޯހިޔާވަހިކަމުގެ ސްކީމްގައި މިހާތަނަށް ކުރިމަތިލުމަށް ހުޅުވާލާފަވަނީ، 15،000 ގޯއްޗާއި 7،900 ފްލެޓަށް ކުރިމަތިލުމަށެވެ.

އިމާރާތް ކުރުމާއި ގެދޮރުވެރިކަމާ ބިނާރާ ބެހޭ ވުޒާރާއިން އެންމެ ފަހުން ހާމަކުރި މަޢުލޫމާތަށް ބަލާއިރު، މިހާތަނަށް ޖުމުލަ 5067 މީހުން ވަނީ ފޯމު ހުށައަޅާފައެވެ. މީގެތެރެއިން ގިނަ މީހުން ފޯމު ހުށައަޅާފަވަނީ، ފްލެޓަށް އެދިއެވެ. ފްލެޓަށް އެދި މިހާތަނަށް 3434 މީހުން ފޯމު ހުށައަޅާފަވެއެވެ. އަދި ގޯއްޗަށް އެދި 1633 މީހުން ވަނީ ފޯމު ހުށައަޅާފައެވެ.