އެތައްހާސް ބަޔަކު މައްކާގެ ބިމަށް، ރައްކާތެރިކަމަށް ސަމާލުވުން މުހިއްމު

ރަމަޟާން މަހާ ދިމާކޮށް ދުނިޔޭގެ އެކި ޤައުމުތަކުން ޢުމްރާގެ މަތިވެރި އަޅުކަން އަދާކުރުމަށް މައްކާއަށް ދަނީ ދަތުރު ކުރަމުންނެވެ. އާންމުގޮތެއްގައި ޙައްޖާއި، ޢުމްރާއަށް ދާ މީހުންނަށް ކުރިމަތިވާ އެންމެ ބޮޑު ކަމަކީ ދަތުރު ތެރޭގައި ބަލިވުމެވެ. މިކަން ވަރަށް ބޮޑަށް ގުޅިފައިވަނީ މާޙައުލު ބަދަލުވުމާއި، އެތަނެއްގެ މޫސުމާއި، އެކި ޤައުމުތަކުން އަންނަ މީހުންނާއެކު ދަތުރު ކުރާ ވައިރަސްތަކެވެ.

މައްކާއަށް އައުމުގެ ކުރިން ދިވެހީންނަށް ޖަހާ ވެކްސިނަކީ، މިފަދަ ވަރަށް ގިނަ ބަލިތަކުން ރައްކާތެރިވުމަށް އަޅާ ފިޔަވަޅެކެވެ. އެހެންނަމަވެސް ތަނާއި މާޙައުލު ބަދަލުވުމުގެ ސަބަބުން މާބޮޑެތި ކަންތައްތަކެއް ނުކުރެވިދާނެއެވެ. މިދުވަސްވަރު މައްކާގެ މޫސުމަށް ބަލާއިރު، ފިނި ހޫނުމިން އާންމުގޮތެއްގައި ހުންނަނީ، 28 ޑިގްރީއާއި 33 ޑިގްރީއާއި ދެމެދުގައެވެ. އަދި ރޭގަނޑު ފިނިހޫނުމިން އާންމުކޮށް 20 ޑިގްރީއަށް ދަށަށް ދާ ކަމަށް ވަނީ ރިކޯޑުކުރެވިފައެވެ.

މައްކާގައި ވައިގެ ތެއްކަން ބޮޑެވެ. އެހެންކަމުން ހަންގަނޑު ޑްރައިވުމާއި، ނޭފަތް ޑްރައިވުން ފަދަ ކަންކަން ކުރިމަތިވެދާނެއެވެ. ބޭރުގައި އުޅޭއިރު މިކަން ކަމަށް ސަމާލުވުމަކީ މުހިއްމު ކަމެކެވެ. އެގޮތުން މާސްކު ބޭނުން ކުރުމާއި، މޮއިސް ޗަރައިޒަރ އަދި ލޯޝަން ފަދަ ތަކެތި ބޭނުންކުރުން މުހިންމެވެ.

ދިވެހީން ޢާންމުކޮށް މައްކާގައި އުޅޭ ސަރަޙައްދުގައި އަވިދޭ މިންވަރު ކުޑަ ނަމަވެސް މެންދުރު ގަޑިއަށް ޙަރަމްފުޅަށް ދާއިރު، ބައެއް ސަރަޙައްދުތަކުން ވަރަށް ބޮޑަށް އަވީގައި އުޅެން ޖެހެއެވެ. އަވީގައި އުޅުން ދިވެހީންނަށް އާ ކަމަކަށް ނުވިނަމަވެސް މައްކާއަށް މާރިޗު މަހު ހޫނުވާން ފަށާއިރު، އިޙްސާސް ކުރެވޭ ހޫނުމިން މަތިވަމުންދާތީ، އަވީގައި އުޅޭއިރު ދިލަ ހޫނެއްގެ އިޙްސާސް ކުރެވެއެވެ. އެކަމުން ރައްކާތެރިވުމަށް ސަން ލޯޝަން ނުވަތަ ސަން ބްލޮކް ބޭނުން ކުރުމަކީ، ވަރަށް މުހިންމު ކަމެކެވެ.

ބައެއް ގަޑިތަކުގައި ހޫނުވިނަމަވެސް އިރުއޮއްސުމާއެކު ފިނިވާން ފަށައެވެ. އެހެންކަމުން ޢުމުރުން ދުވަސްވީ ބޭފުޅުންވެސް އަދި އާންމުކޮށް އެންމެންވެސް ތަންކޮޅެއް ބޯކޮށް ހުންނަ ހެދުން ބޭނުންކުރުމަކީ ރައްކާތެރިކަމަށްޓަކައި ކުރުން މުހިންމު ކަމެކެވެ.