"ރަހުމަތްތެރިއަކަށް ނަގައިދިން ކުލާހާއިއެކު ޤުރުއާނު ޢިލްމުގެ އެންމެ އުހަށް"

ކޮންމެ އިންސާނެއްގެވެސް ހަޔާތުގެ މިސްރާބު ބަދަލުކޮށްލާ ފަދަ ހާދިސާއެއް ނުވަތަ ސަބަބެއް މެދުވެރިވެއެވެ. ބައެއް ފަހަރު އެއީ ވަރަށް އާދައިގެ ކަމެއްގެ ގޮތުގައި ފެށޭ ކަމެކެވެ. ރާއްޖޭގެ ޤުރުއާނުގެ ޢިލްމުގެ ދާއިރާގައި ފާހަގަކޮށްލެވޭ ފުންނާބުއުސް ބޭފުޅެއް ކަމަށްވާ އަލްޤާރީ މުޙައްމަދު ވަޙީދުގެ ހަޔާތްޕުޅު ބަދަލުކޮށްލީވެސް މިފަދަ އާދައިގެ ކަމަކުންނެވެ. އެއީ، މިއަދު އަޅުގަނޑުމެން މިދެކޭ ކާމިޔާބު ޢިލްމީ ދަތުރުގެ ބިންގަލެވެ.

ދާއިރާއަށް ވަދެވުނު ގޮތް:

އަލްޤާރީ މުޙައްމަދު ވަޙީދު ޤުރުއާނުގެ ދާއިރާއަށް ޝައުޤުވެރިކަން އުފެދި، މި މަސައްކަތުގެ ތެރެއަށް ވެދެވަޑައިގަތީ 1997 ވަނަ އަހަރުގައެވެ. އެއީ ވަރަށް ގާތް ރަހުމަތްތެރިއަކު އޭނާގެ އަމިއްލަ ކަމެއްގައި ރަށުން ބޭރަށް ދާންޖެހުމުން، އޭނާ ނަގައިދެމުން ދިޔަ ގަޑިތަކެއް ފުރިހަމަ ކޮށްދިނުމަށް "ނޫރުލް ޤުރުއާން" އަށް ދިޔަ ދިއުމުންނެވެ. އޭރު އެ މަރުކަޒު ހިންގެވުމުގައި އިސްކޮށް ހުންނެވީ، މަރްހޫމް ޝެއިޚް ފަރީދެވެ.

ވަޙީދުގެ ކިޔަވައިދެއްވުމުގެ ހުނަރާއި އުސޫލުތައް ފެނިވަޑައިގެން، ޝެއިޚް ފަރީދު އެކަމާއި ހިތްހަމަޖެހުނު ކަމަށް ވަޙީދު ވިދާޅުވިއެވެ. މިކަން ނޫރުލް ޤުރުއާނުގެ އެންމެ އިސްވެރިޔާ އުސްތާޛު ފައުޒީގެ ސަމާލުކަމަށް އައުމުން، ފައުޒީ ވަޑައިގެން ވަޙީދުގެ ކިޔަވައިދެއްވުން ބެއްލެވިއެވެ. އެއާއެކު، ނޫރުލް ޤުރުއާނުގެ ބައެއް ގަޑިތައް ނަގައިދިނުމަށް ވަޙީދުގެ ކިބައިން އެދިވަޑައިގަތެވެ. މިއީ، މިއަދު ޤުރުއާނުގެ ޢިލްމުގެ އުސްމިންތަކަށް ވަޙީދު ކުރެއްވި ދަތުރުގެ ފެށުމެވެ.

ތަޢުލީމީ ބިންގަލާއި ތަޖުރިބާ

ޢަރަބިއްޔާ ސްކޫލުން ތަޢުލީމު ހާސިލްކުރެއްވުމަށްފަހު، ވަޙީދު ވަނީ އޭރުގެ މައުހަދުން ޤާރީ ކޯސް ފުރިހަމަ ކުރައްވާފައެވެ. ރާއްޖޭގައި އެންމެ ފުރަތަމަ އިއުލާން ކުރި ޤުރުއާން ޑިޕްލޮމާ އިން ޓީޗިން ކޯހާއި، ޤުރުއާން ޓީޗިންގެ ފުރަތަމަ ޑިގްރީ ބެޗުގެ ދަރިވަރެއްގެ ގޮތުގައިވެސް ވަޙީދު ހިމެނި ވަޑައިގަތެކެވެ. ޤުރުއާނުގެ ޢިލްމީ ދާއިރާގައި ރާއްޖޭގައި ހިންގި ކޮންމެ މަރުހަލާއެއްގެވެސް ފުރަތަމަ ބެޗުގައި އޭނާގެ ޙިއްސާ އޮތުމަކީ ފާހަގަކޮށްލަންޖެހޭ ކަމެކެވެ.

ކުޑައިރު މިފަދަ ދާއިރާއަކުން ކުރިއަށް ދިއުމުގެ ވިސްނުމެއް ވަޙީދުގެ ނެތެވެ. އޭނާގެ ބައްޕައަކީ ގާޒީއެއް ކަމުން، ޤުރުއާނުގެ މި ދާއިރާއަށް ނުވަދެވުނުނަމަ އޭނާ ފެނިގެންދާނީ ޝަރީއާގެ ދާއިރާއިން ކަމަށް އޭނާ ޤަބޫލު ކުރައްވައެވެ.

"ކުޑައިރު އެހާ ބޮޑަކަށް ޤުރުއާން ކިޔަވާކަށް ނޭނގޭ. އެއްދުވަހު ބޮޑުދައިތައަކު އައިސް ކިޔަވަން ބުނީމާ، ނޭނގިގެން ރުއި ހަނދާންވޭ،" މާޒީގެ ހަނދާންތައް އައު ކުރައްވަމުން ވަޙީދު ވިދާޅުވިއެވެ.

ދާއިރާއަށް ގެނައި އިންޤިލާބީ ބަދަލު

ޤުރުއާނުގެ ޢިލްމު ރާއްޖޭގައި ފެތުރުވުމުގައި ވަޙީދު ވަނީ، ނުހަނު ބުރަ މަސައްކަތްތަކެއް ކުރައްވާފައެވެ. އޭނާ ދެކޭ ގޮތުގައި ރާއްޖޭގެ ޤުރުއާނުގެ ދާއިރާއަށް އައި އެންމެ ބޮޑު އިންޤިލާބަކީ، ކީރިތި ޤުރުއާނާ ބެހޭ މަރުކަޒުން ޤާރީ ކޯސް ސެޓްފިކެޓް ލެވެލް 1 އަދި 2 ފެށިގެން ދިއުމެވެ. މި ޕްރޮގްރާމްތައް އެންމެ ފުރަތަމަ ފެށުނީ، ވަހީދުއާއި އުސްތާޛު ތައުފީޤުގެ ނުހަނު ބޮޑު ޤުރުބާނީއަކާ އެކުގައެވެ.

ކިޔަވައިދެއްވުމުގެ ތެރޭގައި އަބަދުވެސް އައު ކަންތައްތަކެއް ތަޢާރަފް ކުރެއްވުމަކީ، ވަޙީދު ކުރަން ބޭނުންވާ ކަމެކެވެ. އެގޮތުން 2006 ވަނަ އަހަރު ޖަމާލުއްދީން ސްކޫލާ ގުޅިވަޑައިގެން، އޭރު ސްކޫލްތަކުގައި ބާއްވާ ކޭމްޕްތަކުގެ ފިކުރު ބަދަލު ކޮށްލައްވައި، ރާއްޖޭގައި ފުރަތަމަ ފަހަރަށް "ޤުރުއާން ކޭމްޕް" އެއް ބޭއްވެވިއެވެ. މިއީ، އޭރު އެސުކޫލުގެ ޕްރިންސިޕަލަށާއި ދަރިވަރުންނަށް ވަރަށް ބޮޑު މަޤުބޫލު ކަމެއް ލިބުނު ކަމެއްކަން އޭނާ ފާހަގަކުރެއްވިއެވެ.

މިއަދުގެ މަޤާމާއި މުސްތަޤުބަލުގެ އުންމީދު

މިއަދު އަލްޤާރީ މުޙައްމަދު ވަޙީދަކީ، ދިވެހިރާއްޖޭގެ އިސްލާމީ ޔުނިވަރސިޓީގައި ކީރިތި ޤުރުއާނާއި، ޙަދީޘް ޢިލްމާއި ގުޅުންހުރި ކުއްލިއްޔާގެ އެންމެ އިސްވެރިޔާއެވެ. އޭނާގެ އެންމެ ބޮޑު އުއްމީދަކީ ދައުލަތާއި، ރާއްޖެ ބައިނަލްއަޤުވާމީ މައިދާނުގައި ތަމްސީލު ކުރާނެ މޮޅު ހާފިޒުންތަކެއް އުފެދިގެން ދިއުމެވެ.

ދަރިވަރުންނަށް ދެއްވާ މެސެޖަކީވެސް ވަރަށް މުހިންމު މެސެޖެކެވެ.

"މުބާރާތަކުން ވަނަ ހޯދުމެއް ނޫން މުހިންމީ. ރީތިކޮށް ކިޔަވާލުމަކީ ހިތްހަމަޖެހުމެއް. އެކަމަކު އެންމެ މުހިންމު ކަމަކީ ޤުރުއާން ކިޔަވާއިރު އެއަށް އަމަލުކުރުން،" ވަޙީދު ވިދާޅުވިއެވެ.

ރަހުމަތްތެރިއަކަށް ކޮށްދިން އެހީތެރިކަމަކުން ފެށުނު މި ދަތުރަކީ، މިއަދު މުޅި ޤައުމަށް އޭގެ މަންފާ ކުރަމުންދާ ޢިލްމީ ބޮޑު ޚިދުމަތެކެވެ. އަލްޤާރީ މުޙައްމަދު ވަޙީދަކީ ޤުރުއާނުގެ ޢިލްމުގެ ދާއިރާގައި ދިވެހިން ފަޚުރުވެރިވާ ފަދަ ނަމޫނާ ޝަޚުސިއްޔަތެކެވެ.