ފަރުމުލި އަދި ކާށިދޫ ފަޅުގައި ރިސޯޓު ތަރައްޤީކޮށް ހިންގުމަށް ހުޅުވާލައިފި

ކ. ކާށިދޫ ފަޅާއި ނ. ފަރުމުލީގައި ޓޫރިސްޓް ރިސޯޓު ތަރައްޤީކޮށް ހިންގާނެ ފަރާތެއް ހޯދުމަށް ފަތުރުވެރިކަމާއި ތިމާވެށްޓާބެހޭ ވުޒާރާއިން އިޢުލާނުކޮށްފިއެވެ. މި ދެ ސަރަހައްދަކީވެސް ފަތުރުވެރިކަމުގެ ސިނާޢަތް ފުޅާކުރުމަށް ސަރުކާރުން ކަނޑައަޅާފައިވާ މުހިންމު ދެ ސަރަހައްދެވެ.

ފަތުރުވެރިކަމާ ބެހޭ ވުޒާރާއިން ވިދާޅުވީ، ކާށިދޫ ފަޅުގައި ރިސޯޓެއް ތަރައްޤީކުރުމަށް ހަމަޖެހިފައިވަނީ އެރަށު ފަޅުން ބައެއް ހިއްކައިގެން ކަމަށެވެ. އެގޮތުން، 115.21 ހެކްޓަރުގެ ސަރަޙައްދެއްގައި، 10 ހެކްޓަރުގެ ރަށެއް ހިއްކައިގެން މި ރިސޯޓް ތަރައްޤީކުރެވޭނެ ކަމަށެވެ. އަދި ތަރައްޤީކުރެވޭ ރިސޯޓުގައި މަދުވެގެން 100 އެނދު ހުންނަން ޖެހޭނެ ކަމަށްވެސް އެ ވުޒާރާއިން ވިދާޅުވެއެވެ.

ކާށިދޫ ފަޅުގައި ރިސޯޓެއް ތަރައްޤީކުރުމަށް ހުޅުވާލާފައިވާއިރު، ފަރުމުލީގައިވެސް ޓޫރިސްޓް ރިސޯޓެއް ތަރައްޤީކުރުމަށް ބީލަން ހުށަހެޅުމަށްވެސް އެ ވުޒާރާއިން ވަނީ ހުޅުވާލާފައެވެ. އެގޮތުން 0.41 ހެކްޓަރު އޮންނަ ފަރުމުލީގައި 71.18 ހެކްޓަރުގެ ފަޅުގެ ސަރަހައްދާއިއެކު، 15 ހެކްޓަރަށްވުރެ ބޮޑުނޫން ރަށެއް ހިއްކައިގެން ރިސޯޓެއް ތަރައްޤީކުރެވޭނެ ކަމަށް އެ ވުޒާރާއިން މައުލޫމާތުދެއެވެ. އަދި ތަރައްޤީކުރެވޭ ރިސޯޓުގައި މަދުވެގެން 150 އެނދު ހުންނަން ޖެހޭނެ ކަމަށްވެސް އެ ވުޒާރާއިން ވިދާޅުވެއެވެ.

މި ފަޅުތައް 50 އަހަރަށް ކުއްޔަށް ދޫކުރުމަށް ހަމަޖެހިފައިވާއިރު، ބިން ދޫކުރެވޭތާ 36 މަސް ދުވަހުގެ ތެރޭގައި މަސައްކަތް ފަށަންޖެހޭނެ ކަމަށްވެސް އެ ވުޒާރާއިން ވިދާޅުވެއެވެ.

ފަތުރުވެރިކަމާ ބެހޭ ވުޒާރާއިން ވިދާޅުވީ، މިކަމަށް ޝައުގުވެރިވާ ފަރާތްތަކަށް މަޢުލޫމާތު ދިނުމަށް 2 ބައްދަލުވުމެއް ވަރޗުއަލްކޮށް ބޭއްވުމަށް ހަމަޖެހިފައިވާ ކަމަށެވެ. އެގޮތުން އަންނަ މަހުގެ 16 ވަނަ ދުވަހު ފުރަތަމަ ބައްދަލުވުން ބޭއްވުމަށް ހަމަޖެހިފައިވާއިރު، ދެވަނަ ބައްދަލުވުން އޮންނާނީ މާރިޗު މަހުގެ 3 ވަނަ ދުވަހުއެވެ. އަދި މި ބައްދަލުވުމުގައި ބައިވެރިވާން ބޭނުންވާ ފަރާތްތަކުން އެއް ބައްދަލުވުމެއް އޮންނަ ދުވަހުގެ ކުރިން އީމެއިލް ކުރަންޖެހޭނެއެވެ.

މީގެ އިތުރުން، ބީލަން ފޮތް ގަތުމުގެ ފުރުޞަތު އަންނަ މަހުގެ 1 ވަނަ ދުވަހުން ފެށިގެން 31 މާރިޗުގެ ނިޔަލަށް ބަންދުނޫން ކޮންމެ ދުވަހެއްގެ ހެނދުނު 09:00 އިން މެންދުރުފަހު 13:00 އަށް ފަތުރުވެރިކަމާބެހޭ ވުޒާރާގެ ރިސެޕްޝަނުން ލިބޭނެއެވެ. ބީލަން ފޮތަށް އެދޭ ފޯމު އެ ވުޒާރާގެ ވެބްސައިޓުން ލިބެން ހުންނާނެއެވެ.

މި މަޝްރޫޢުތަކަށް ބީލަން ހުށަހެޅުމުގެ އެންމެ ފަހު ސުންގަޑިއަކީ އަންނަ އެޕްރީލް މަހުގެ 1 ވާ ބުދަ ދުވަހުގެ ހެނދުނު 10:00 އެވެ. ބީލަން ހުށަހަޅަންޖެހޭނީ ފަތުރުވެރިކަމާއި ތިމާވެށްޓާބެހޭ ވުޒާރާއަށް ހާޟިރުވެގެންނެވެ. އިތުރު މަޢުލޫމާތު ސާފުކުރަން ބޭނުންވާ ފަރާތްތަކަށް 29 މާރިޗު 2026 ގެ ކުރިން އީމެއިލް މެދުވެރިކޮށް ސުވާލު ހުށަހެޅުމުގެ ފުރުޞަތު ވަނީ ހުޅުވާލާފައެވެ.