ސްޕެނިޝް ލީގުގައި 3-1 ގެ ނަތީޖާއަކުން ޑިޕޯޓިވޯ އަލަވޭޒް ބަލިކޮށް، ތާވަލުގެ އެއްވަނައަށް ބާސެލޯނާ ޖެހިލައިފިއެވެ.
ބާސެލޯނާއަށް 126 އަހަރު ފުރުމާ ދިމާކޮށް އަމިއްލަ ދަނޑުގައި ކުލަގަދަ ރަސްމިއްޔާތަކަށް ފަހު ކުޅުނު މެޗުގައި އެ ޓީމުގެ ތިން ލަނޑުގެ ތެރެއިން ދެ ލަނޑު ޖެހީ މިޑްފީލްޑަރު ޑެނީ އޮލްމޯ އެވެ. އަނެއް ލަނޑު ޖެހީ ލަމީން ޔަމާލެވެ.
މި ނަތީޖާއާއެކު ބާސެލޯނާ އެއްވަނާގައިވަނީ 34 ޕޮއިންޓާއެކުގަ އެވެ. މިއީ ދެ ވަނާގައިވާ ރެއާލް މެޑްރިޑަށް ވުރެ ދެ ޕޮއިންޓް ގިނަ އަދަދެކެވެ. މިހެންކަމުން މިރޭ ޖިރޯނާ އަތުން ރެއާލް މޮޅުވެއްޖެނަމަ 35 ޕޮއިންޓާއެކު އެ ޓީމަށް އަލުން އެއްވަނަ ލިބޭނެ އެވެ.
މެޗަށް ފަހު ވާހަކަ ދައްކަމުން ކޯޗު ހެންސީ ޕްލިކް ބުނީ މެޗުގައި ބާސެލޯނާ އަށް ފުރަތަމަ ހާފުގައި ގޯލު ޖަހަން ގިނަ ފުރުސަތުތަކެއް ލިބުނު ކަމަށެވެ.
"ދެ ވަނަ ހާފުގައި އެ މީހުން ވެސް ވަރަށް ރަނގަޅު ކަވަރުކޮށްގެން ކުޅުނީ. އަހަރެން ކުޅުންތެރިން ގާތުގައި މި ބުނަނީ އަބަދުވެސް އަހަރުމެންނަށް އަދިވެސް ކުޅުން ރަނގަޅު ކުރެވޭނެ ވާހަކަ. މެޗު ނިންމާފައި ރަފީނިއާ ވެސް އަހަރެން ގާތުގައި ބުނީ އެހެން. މިއަށްވުރެ ވެސް އަހަރުމެންނަށް އަދި ރަނގަޅު ކުރެވޭނެ،" ފްލިކް ބުންޏެވެ.
ބާސެލޯނާއިން ހުސްވި ސީޒަނުގައި ތިން ތަށި ހޯދި އެވެ. އޭރު ދެއްކި މޮޅު ކުޅުން ނުދެއްކޭތީވެ ޓީމަށް ވަނީ ފާޑުކިއުން އަމާޒުވެފަ އެވެ. ނަމަވެސް ފްލިކް ބުނީ އަނިޔާގައި ތިބި ކުޅުންތެރިން އެނބުރި އައިސް މުޅި ޓީމު އެއްކޮށް ކުޅެން ފެށުމުން ތަފާތު ބާސެލޯނާ އެއް ފެނިގެންދާނެ ކަމަށެވެ.