ކުޅިވަރު

ނޭމާ ފިޓްވާން އަންޗެލޯޓީ ދިނީ ހަ މަސް ދުވަސް


އަންނަ އަހަރުގެ ވޯލްޑްކަޕް ފުޓްބޯޅަ މުބާރާތަށް ދާ ބްރެޒިލް ޓީމުގައި ހިމެނުމަށް ފޯވަޑް ނޭމާ ސަންޓޯސް ހަ މަސް ދުވަހުގެ މުހުލަތެއް ކޯޗު ކާލޯ އަންޗެލޯޓީ ދީފި އެވެ.

ބްރެޒިލާ ހަވާލުވުމަށްފަހު ރަނގަޅު ނަތިޖާތަކެއް ނެރެމުން އަންނަ ކޯޗު ބުނީ އަނިޔާގެ ގައުމީ ސަބަބުން ގައުމީ ޓީމަށް ނުކުޅެވި ހުންނަތާ ދެ އަހަރުވެފައިވާ ފޯވަޑުގެ ވާހަކަ އަކީ ހަމައެކަނި ބްރެޒިލްގައި އޮތް ކަންބޮޑުވުމެއް ނޫން ކަމަށެވެ. މިހާރު ވެސް އޭނާ ގެންދަނީ ކުޑަހުޅަށް ލިބިފައިވާ ހާނިއްކައަކަށް ފަރުވާ ކުރަމުންނެވެ.

"އަހަރެންނަށް ހީވަނީ ނޭމާގެ ވާހަކަ އަކީ ބްރެޒިލްގައި އޮތް މުހިންމު ވާހަކައެއްހެން. އެކަމަކު އަހަރެންގެ ނަޒަރުގައި އެއީ މުޅި ދުނިޔޭގައި އޮތް ވާހަކަ އެއް. މައްސަލައެއް. ނަސީބަތުން އޭނާ އެ ވަނީ އަނިޔާއިން ސަލާމަތްވެފައި. މިހާރު އޭނާ އަށް ހަ މަސް ދުވަސް އެބައޮތް ޓީމުގައި ހިމެނެން،" އަންޗެލޯޓީ ބުންޏެވެ.

ޔޫރަޕުގެ އެންމެ ނަން މަޝްހޫރު ޓީމުތަކަށް ކާމިޔާބު ހޯދައިން ޔޫރަޕުގެ އެންމެ ކާމިޔާބު އެއް ކޯޗު ބުނީ ނޭމާ އަކީ ވޯލްޑް ކަޕަށް ގެންދަން ބްރެޒިލްގެ ވިސްނުމުގައި އޮތް ނަމެއް ކަމަށެވެ.

"އޭނާގެ ނަން ލިސްޓުގައި އެބައޮތް. ފައިނަލް ލިސްޓުގައި ހިމެނެން އޭނާ އަށް ބާކީ އޮތީ ހަ މަސް ދުވަސް. މި މުއްދަތުގައި އަހަރުމެން ދާނީ އޭނާ އާއި އެހެން ކުޅުންތެރިންގެ ހާލަތު ވެސް ގަވާއިދުން ބަލަމުން. ފައިނަލް ލިސްޓުގައި މައްސަލައެއް ނޫޅޭ ވަރަށް އަހަރުމެން ދާނީ ކުޅުންތެރިން މޮނިޓަރ ކުރަމުން،" އަންޗެލޯޓީ ބުންޏެވެ.

އުމުރުން މިހާރު 33 އަހަރުގެ ނޭމާ އަކީ ބްރެޒިލްގެ ގައުމީ ޓީމަށް އެންމެ ގިނަ ގޯލު ޖަހައިދިން ކުޅުންތެރިޔާ އެވެ. ބާސެލޯނާއިން ދުނިޔޭގެ ރެކޯޑް އަދަދަކަށް ފްރާންސްފެ ޕީއެސްޖީ އަށް ބަދަލުވުމަށްފަހު މިއަދާ ހަމައަށް އޭނާ އަށް ކުރިމަތިވާ މައިގަނޑު މައްސަލައަކީ ގާތްގާތުގައި އަނިޔާވުމެވެ. މިހެންވެ ކުޑައިރު ކުޅުނު ކުލަބު ސަންޓޯސް އަށް ބަދަލުވީ މިކަމުން އަރައިގަނެ ކުރީގެ ކުޅުންތެރިން ދެއްކުމަށެވެ. ނަމަވެސް މިހާތަނަށް ކުޅުނު 16 މެޗުން ޖެހުނީ އެންމެ ތިން ގޯލެވެ.
އަދި އަނިޔާގެ މައްސަލަތަކާހެދި ގިނަ މެޗުތަކެއް ވެސް ދަނީ ގެއްލެމުންނެވެ.

އަންޗެލޯޓީ ބުނީ އޭނާ މިދިޔަ މޭމަހު ބްރެޒިލްގެ ގައުމީ ޓީމާ ހަވާލުވި ފަހުން ނޭމާ ވަރަށް ބޮޑަށް ބަލަމުން އަންނަ ކަމަށެވެ.

"ބްރެޒިލްގެ ޗެމްޕިއަންޝިޕް ޑިސެމްބަރު ހަތެއްގައި ނިމޭނެ. ދެން އޭނާ ޗުއްޓީ ހޭދަ ކުރުމަށްފަހު އަލުން ލީގުގައި ކުޅެން ފަށައި ބާކީ އޮތް ދުވަސްތަކުގައި އޭނާގެ ފެންވަރާއި ފިޓްނަސް ސާބިތުކޮށްދޭން ވާނެ. އޭނާގެ ނަމަކީ ޓީމުގައި އޮތް ނަމެއް،" އަންޗެލޯޓީ ބުންޏެވެ.

އޭނާގެ ހަވާލުވި ފަހުން ބްރެޒިލް ޓީމަށް ވަރަށް ބޮޑެތި ބަދަލުތަކެއް އައިސް މޮޅުވުމުގެ ރޫހު އަށަގެންފައިވާ ކަމަށް ކުޅުންތެރިން ވެސް ވަނީ ބުނަން ފަށައިފަ އެވެ.