ރަށްރަށުގެ ތަރައްޤީއަށް ސަރުކާރުން ކުރިއަށް ގެންދަވާ މަޝްރޫޢުތަކުގެ ތެރެއިން މުހިންމު އެއްމަޝްރޫޢަކީ އާބާދީ ބޮޑު ބިމުގެ ގޮތުން ބޮޑެތި ރަށްރަށުގެ މަގުތައް ރަނގަޅު ފެންވަރަކަށް ހެއްދެވުމުގެ މަޝްރޫޢުއެވެ. ރަށްރަށުގެ މަގު ހެދުމުގެ މަޝްރޫޢަކީ ސަރުކާރުން ވަރަށް އިސްކަމެއް ދެއްވައިގެން ކުރިއަށް ގެންދަވާ މަޝްރޫޢެކެވެ. ރަށްރަށުގެ މަގުހެދުމުގެ މަޝްރޫޢު ކުރިއަށް ގެންދަވަނީ މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަނާ ޙަވާލުކުރައްވައިގެނެވެ. މި ގޮތުން މަގުހައްދަވަން ދެން އެންމެ އަވަހަށް ފެށޭނެ އެއްރަށަކީ ބ. އަތޮޅު އޭދަފުށްޓެވެ.
އޭދަފުށީގައި ތާރުއަޅައިގެން 14 މަގެއް ހެދުމަށް ހަމަޖެހިފައިވެއެވެ. ޕީއެސްއެމް ނިއުސްއާ ވާހަކަދައްކަވަމުން އޭދަފުށީގައި އެމްއާރްޑީސީ އޮފީހުގެ ސައިޓް މެނޭޖަރ އަޙުމަދު ބަޝީރު ވިދާޅުވީ، އަންނަމަހު މަގު ހެދުމުގެ އަމަލީ މަސައްކަތް އަންނަމަހު ފަށްޓަވާނޭކަމަށާއި މަގުހެދުމުގެ ޢަމަލީ މަސައްކަތް ފެށުމަށް ތައްޔާރުވުމުގެ ގޮތުން ސައިޓު ހެދުމުގެ މަސައްކަތް ކުރަމުން އަންނަ ކަމަށެވެ.
އޭދަފުއްޓަކީ އާބާދީ ބޮޑު ރަށަކަށްވުމާއި، އަދި ކައިރި ރަށްރަށުން މީހުން ގިނައިން ޚިދުމަތް ލިބިގަތުމަށް އެރަށަށް ޒިޔާރަތްކުރެއެވެ. އެހެންކަމުން މަގު ބޭނުންކުރާ މީހުންވެސް ނިސްބަތުންވެސް ގިނައެވެ. އޭދަފުށީގެ ބައެއް ރައްޔިތުން ބުނީ، މަގުތަކުގައި އަޑިގުޑަންހެދި ވަޅުގަނޑު ހެދިފައި ހުރުމުން މަގުތައް ބޭނުންކުރުމުގައި ބޮޑެތި ދަތިތަކާ ކުރިމަތިވާ ކަމަށާއި ސައިކަލް ފަދަ ދުއްވާ އުޅަނދުތަކަށްވެސް ބޮޑެތި ގެއްލުން ލިބެމުންދާ ކަމަށެވެ.
އޭދަފުށީގައި ތާރުއަޅައިގެން 14 މަގެއް ހެދުމަށް ހަމަޖެހިފައިވާއިރު މިމަޝްރޫޢަށް 33 މިލިއަނަށްވުރެ ގިނަ ރުފިޔާ ޚަރަދުވާނެއެވެ. މަގު ހެދުމުގެ މަސައްކަތް ފަށާތާ އެއްއަހަރު ދުވަހުގެ ތެރޭގައި މިމަސައްކަތް ނިންމާ ގޮތަށް ހަމަޖެހިފައިވާ ކަމަށް އޭދަފުށީ އެމްއާރްޑީސީ އޮފީހުން ބުނެއެވެ.