އަލަށް ޢަމަލުކުރަން ފެއްޓެވި އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ޤާނޫނުގައި އެކިއެކި ޖަލްސާތަކާއި ފޯރަމްތަކާއި ޕޯޑިއަމްތަކުގައި އެކިއެކި ފަރާތްތަކުން ދައްކާ ވާހަކަތައް، އޭގެ މާނަ ނުގެއްލޭގޮތަށް ރިޕޯޓްކުރެވިދާނެކަމަށް ބަޔާންކޮށްފައިވެއެވެ. އެގޮތުން އެވާހަކައެއް ރިޕޯޓްކުރުމުގައި ޚަބަރު ރައްދުވާ ފަރާތެއްގެ ބަހެއް ހޯދުމަށްފަހު ހަމަހަމަކަމާއެކު ރިޕޯޓްކުރުމަށް މިޤާނޫނުގެ ދަށުން ނޫސްވެރިންނަށް ލާޒިމުކުރެއެވެ. އެހެންނަމަވެސް ޚަބަރު ރައްދުވާ ފަރާތެއްގެ ބަހެއް ހޯދުމަށް އެކަށީގެންވާ ވަރަށް މަސައްކަތްކޮށް، ބަހެއް ނުލިބިއްޖެނަމަ އެފަރާތެއްގެ ރައްދު ނުހިމަނައިވެސް ޚަބަރު ޝާއިޢުކުރުމުގެ ޙައްޤު މިޤާނޫނުން ނޫސްވެރިންނަށް ލިބިދީފައިވެއެވެ.
އަބުރު ރައްކާތެރިކޮށްދިނުމާބެހޭ ޤާނޫނަށް ޢަމަލުކުރެއްވުމަށް ސަރުކާރުން ތައްޔާރު ނޫންކަމަށް ބައެއް މީޑިއާތަކުން ވަނީ ޚަބަރު ފަތުރާފައެވެ. ޕަބްލިކް ސަރވިސް މީޑިއާއަށް ދެއްވި ޚާއްޞަ އިންޓަރވިއުއެއްގައި ރައީސުލްޖުމްހޫރިއްޔާގެ އޮފީހުގެ ތަރުޖަމާނު އިބްރާހީމް މުޢާޒު ޢަލީ ވިދާޅުވީ އަބުރު ރައްކާތެރިކޮށްދިނުމާބެހޭ ޤާނޫނު ތަންފީޛް ކުރެއްވުމަށް ސަރުކާރުން އޮތީ މާކުރިންވެސް ތައްޔާރުވެފައިކަމަށެވެ.
"ސަރުކާރުން ނޫސްވެރިކަމުގެ މިނިވަންކަން ކަށަވަރުކުރާނެ، ހަމައެހެންމެ ދިވެހިރައްޔިތުންގެ އަބުރުގެ ރައްކާތެރިކަންވެސް ކަށަވަރުކުރާނެ. ޚިޔާލުފާޅުކުރުމާއެކުއެކީގައި މީސްތަކުންގެ އަބުރު ރައްކާތެރިކުރުން އެއީވެސް ހަމަ ދިވެހިދައުލަތުގެ އެންމެ މަތީވެރިޔާގެ ޒިންމާއެއްގޮތުގައި (ރައީސުލްޖުމްހޫރިއްޔާ) ޤަބޫލުކުރައްވަނީ. ސަރުކާރުން މިޤާނޫނަށް ތައްޔާރުތޯ ނޫންތޯ މިއީ ކުރައްވަން ޖެހޭވެސް ސުވާލެއް ނޫން. ކުރުގޮތަކަށް ދަންނަވާކަމަށްވާނަމަ އަޅުގަނޑަށް ދެންނެވޭނީ ސަރުކާރުން ވަރަށް ތައްޔާރޭ. ދިވެހިރާއްޖޭގެ ޤާނޫނުއަސާސީގައި ކަނޑައަޅުއްވާ ކޮންމެ ކަމަކަށް ސަރުކާރުން އަބަދުވެސް އޮންނާނީ ތައްޔާރަށް" ރައީސުލްޖުމްހޫރިއްޔާގެ އޮފީހުގެ ތަރުޖަމާނު އިބްރާހީމް މުޢާޒު ޢަލީ ވިދާޅުވިއެވެ.
ރައީސުލްޖުމްހޫރިއްޔާގެ އޮފީހުގެ ތަރުޖަމާނު ވިދާޅުވީ އަބުރުރައްކާތެރިކުރުމުގެ ޤާނޫނުގައިވާ ކަންކަން ރައްޔިތުންނަށް އޮޅުން އަރާގޮތަށް ބައެއް މީޑިއާތަކުން ޚަބަރު ފަތުރަމުންދާތީ ކަންބޮޑުވާކަމަށެވެ. އެގޮތުން އެއްވެސް ޤައުމެއްގައި ޚިޔާލުފާޅުކުރުމުގެ މިނިވަންކަން އެއްވެސް ހިފެހެއްޓުމެއް ނެތި ދޫކޮށްލާފައި ނޯންނާނެކަން ފާހަގަކުރައްވައި، މުޖުތަމަޢުގެ އަފުރާދުންގެ އަބުރާއި ކަރާމާތް ހިމާޔަތްކޮށްދިނުމަކީ ދައުލަތުގެ އެންމެ މަތީ ވެރިޔާގެ ޙައިޞިއްޔަތުން ރައީސުލްޖުމްހޫރިއްޔާގެ ޒިންމާއެއްކަމުގައި ރައީސުލްޖުމްހޫރިއްޔާ ދެކެވަޑައިގަންނަވާކަމަށާއި، މި ޤާނޫނުން އެކަން ކަށަވަރުކޮށްދޭކަމަށް މުޢާޒު ވިދާޅުވިއެވެ.
"އޮންލައިން ނޫހެއް ރަޖިސްޓްރީވެފައި އޮތުމަކީ ނުވަތަ ނޫސްއިދާރާއެއްގެ ވެރިއަކަށްވުމަކީ އަނެކާގެ އަބުރު ކަތިލުމަކަށް ލިބޭ ލައިސެންސެއް ނޫންކަން އެއީ އަޅުގަނޑުމެން ދައްކަމުންމިދާ ވާހަކައަކީ. ޤާނޫނުގައިވެސް މިބަޔާންކުރާ ކަމަކީ." ރައީސުލްޖުމްހޫރިއްޔާގެ އޮފީހުގެ ތަރުޖަމާނު އިބްރާހީމް މުޢާޒު ޢަލީ ވިދާޅުވިއެވެ.
މިޤާނޫނުން ނޫސްވެރިކަމުގެ މިނިވަންކަމަށް އެއްވެސް ޙާލެއްގައި ހުރަސް ނާޅާކަމަށާއި، ނޫސްވެރިކަމާއި ޚިޔާލުފާޅުކުރުމުގެ މިނިވަންކަން އެންމެ ފުރިހަމަގޮތުގައި އެންމެހާ ރައްޔިތުންނަށް ސަރުކާރުން ފަހިކޮށްދެއްވާނެ ކަމުގައި މުޢާޒު ވިދާޅުވިއެވެ.
އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ޤާނޫނަކީ ޤާނޫނު އަސާސީގައި ބަޔާންކޮށްފައިވާ ގޮތުގެ މަތިން ޚިޔާލުފާޅުކުރުމުގެ މިނިވަންކަމާއި އަބުރުރައްކާތެރިކުރުމުގެ މިނިވަންކަން އެންމެ އެކަށީގެންވާ މިންވަރަށް ލިބިދިނުން ކަށަވަރުކޮށްދެއްވުމުގެ މަޤްޞަދުގައި އެކުލަވާލެއްވި ޤާނޫނެކެވެ. މިޤާނޫނުގައި ނޫސްވެރިން މީހުންގެ އަބުރަށް ހުތުރުވާގޮތަށް ރިޕޯޓްކުރާ ޚަބަރުތަކުގައި އެކަން ރައްދުވާ ފަރާތެއްގެ ބަސް ހޯދައި ހަމަހަމަ ކަމާއެކު ރިޕޯޓްކުރުން ލާޒިމުކުރެއެވެ. މިއީ ނޫސްވެރިކަން ކުރުމުގެ ބައިނަލްއަޤްވާމީ ބެސްޓް ޕްރެކްޓިސްގައިވެސް ހިމެނޭ މުހިންމު އެއް ކަންތައްކަން ފާހަގަކޮށްލެވެއެވެ.