އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ޤާނޫނުގައި ޚިޔާލުފާޅުކުރުމުގެ މިނިވަންކަން ހަނިކުރެވޭނެ 4 ޙާލަތެއް ބަޔާންކުރައްވާފައިވެއެވެ. އެގޮތުން ފާޅުކުރާ ޚިޔާލަކީ އިސްލާމްދީނުގެ އަސްލަކާ ޚިލާފު ޚިޔާލަކަށް ވުމާއި، އެ ޚިޔާލަކީ ޤައުމީ ސަލާމަތައް ނުރައްކާވެދާނެ ފަދަ ޚިޔާލަކަށް ވުމާއި، އެހެން މީހެއްގެ ޙައްޤަކަށް ނުވަތަ އަބުރަށް ގެއްލުން ދެނިވި ޚިޔާލަކަށްވުމާއި، ޢާންމު އިޖްތިމާޢީ ޒިންމާތަކާ ޚިލާފު ޚިޔާލަކަށްވުން ހިމެނެއެވެ. މި 4 ޙާލަތް ފިޔަވައި ކޮންމެ ޙާލަތެއްގައި އެމީހަކު ބޭނުން ޚިޔާލެއް ފާޅުކުރުމުގެ ފުރިހަމަ މިނިވަންކަން މި ޤާނޫނުން ލިބިދެއެވެ. މީގެތެރެއިންވެސް މިޤާނޫނުގައި އެންމެ ބޮޑު އިސްކަމެއްދެއްވައި އެންމެ ފުރަތަމަ މަނާކުރައްވާފައިވަނީ އިސްލާމް ދީނުގެ އަޞްލަކާ ޚިލާފުވާ ގޮތަށް ޚިޔާލު ފާޅުކުރުމެވެ.
ޕަބްލިކް ސަރވިސް މީޑިއާއަށް ދެއްވި ޚާއްޞަ ބަސްދީގަތުމެއްގައި ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު އަދި ރައްޔިތުންގެ މަޖިލީހުގެ މެޖޯރިޓީ ލީޑަރ އަޙްމަދު ނިހާން ޙުސައިން މަނިކު ވިދާޅުވީ، މި ޤާނޫނުގެ ސަބަބުން އިސްލާމް ދީނުގެ އުޞޫލުތައް ރާއްޖޭގެ އިޖްތިމާޢީ ނިޒާމުގައި ވަރުގަދަ ކުރެވި، އިސްލާމް ދީނާ ދެކޮޅު ޚިޔާލު ފާޅުކުރުން މުޅިން ހުއްޓުވިގެން ދާނެކަމަށެވެ. ސައްތައިން ސައްތަ އިސްލާމީ ޤައުމެއްގެ ގޮތުގައި އޮވެ، އިސްލާމް ދީން ނޫން އެހެން ދީނަކަށް ރާއްޖޭގައި ފުރުޞަތު ނުދެއްވުމުގެ ސިޔާސަތައް މިކަމުގެ ސަބަބުން އިތުރު ބާރެއް ލިބިގެން ދާނެކަމުގައި ނިހާން ވިދާޅުވިއެވެ.
img:http://s4.psmnews.mv/images/660x400/2077.jpg|ޕީޕީއެމްގެ ޕާލިމެންޓްރީ ގްރޫޕްގެ ލީޑަރ އަހްމަދު ނިހާން ހުސައިން މަނިކު- (ފޮޓޯ: އެމްބީސީ ނިއުސް)
އަބުރު ރައްކާތެރިކޮށްދިނުމުގެ ޤާނޫނު ރައްޔިތުންގެ މަޖިލީހުން ފާސްކުރައްވާފައިވަނީ މުޖުތަމަޢުގައި ހުރި އެތަކެއް މައްސަލަތަކަކަށް މިޤާނޫނުގެ ސަބަބުން ޙައްލު ލިބޭނެކަމަށް ޤަބޫލުކުރެވޭތީ ކަމަށް ނިހާން ވިދާޅުވިއެވެ.
އަބުރު ރައްކާތެރިކުރުމާބެހޭ ޤާނޫނުގެ ދަށުން އިސްލާމް ދީނުގެ އަޞްލަކާ ޚިލާފު ޚިޔާލެއް ފާޅުކޮށްފިކަމަށް ސާބިތުވެއްޖެނަމަ އެމީހެއްގެ މައްޗަށް އަދަބު ކަނޑައަޅާފައިވަނީ ޤާނޫނުލްއުޤޫބާތުގައި ބަޔާންކުރާ ގޮތެއްގެ މަތިންނެވެ. މި ޤާނޫނު ބަޔާންކުރާ ގޮތުން ފާޅުކުރާ ޚިޔާލަކީ ތެދު ނުވަތަ ޙަޤީޤަތެއް ކަމުގައި ވުމަކީ އަބުރާ ބެހުމުގެ ހުރިހާ ދަޢުވާއަކަށް އޮތް ފުރިހަމަ ދިފާޢެކެވެ. އެހެންކަމުން އަބުރު ރައްކާތެރިކޮށްދިނުމާބެހޭ ޤާނޫނު ޤާނޫނު އަސާސީގައި ލިބިދޭ ޚިޔާލުފާޅުކުރުމުގެ މިނިވަންކަމާ ތައާރުޒްވާނެ އެއްވެސް ފުރުޞަތެއްނެތެވެ. ސަބަބަކީ ޚިޔާލުފާޅުކުރުމުގެ މިނިވަންކަމުގެ ނަމުގައި ދޮގު ވާހަކަތައް ދައްކައި، އަނެކާގެ އަބުރު ކިލަނބުކޮށް، އަނެކާއަށް ލިބިދޭ އަބުރު ރައްކާތެރިކުރުމުގެ ޙައްޤު ނަގާލުކަމީ ޤާނޫނު އަސާސީގެ ރޫޙާއި، މުޅި ދިވެހިރާއްޖޭގެ ދުސްތޫރީ ސިޔާސަތުތަކާއި، މުޖުތަމަޢުގެ ޢާންމު އަޙްލާޤީ މިންގަނޑާއި، އިސްލާމް ދީނުގެ އުސޫލުތަކާ ކަނޑައެޅިގެން ޚިލާފުކަމެއް ކަމުގައިވުމެވެ. މިޤާނޫނުން ހަޤީޤަތާއެއްގޮތައް ވާހަކަދައްކައި ޚަބަރު ފެތުރުން އެއްވެސް ވަރަކަށް މަނައެއް ނުކުރެއެވެ.