މިޞްރުގައި ރޭލެއް ފުރޮޅާލައި ތިން މީހުން މަރުވެ 103 މީހުންނަށް އަނިޔާވެއްޖެއެވެ.
މިޞްރުގެ ނޭޝަނަލް ރެއިލްވޭސް އޮތޯރިޓީން ބުނީ އެ ހާދިޘާ ހިނގާފައި ވަނީ އޮގަސްޓު މަހުގެ 31ވަނަ ދުވަހު އެ ޤައުމުގެ މަތުރޫހު ޕްރޮވިންސުގައި ކަމަށެވެ. މަރްސާ މަތުރޫހުން ވެރިރަށް ކައިރޯއަށް ދަތުރުކުރި ރޭލު ފުރޮޅާލުމަށް މެދުވެރިވީ ރޭލު ދުއްވާ ޓުރެކުން ކަހައިލުމުގެ ސަބަބުންނެވެ.
މިޞްރުގެ ޞިއްޙީ ވުޒާރާއިން ބުނީ ޒަޚަމްވި މީހުންނަށް އެކި ވަރުގެ އަނިޔާތައް ލިބިފައިވާ ކަމަށާއި، މަތުރޫހާއި އަވަށްެޓެރި ޕްރޮވިންސުތަކުގެ ހަސްފަތާލުތަކަށް އެ މީހުން ގެންގޮސްފައިވާ ކަމަށެވެ. ފަރުވާ ދިނުމަށް ފަހު 98 މީހުން މިހާރު ހަސްފަތާލުން ދޫކޮށްލާފައިވާ ކަމަށް ވެސް އެ ވުޒާރާއިން ބުނެފައިވެއެވެ.
ހާދިޘާ ހިނގި ސަރަޙައްދުގައި ކަމާބެހޭ އިދާރާތަކުން ދަނީ ޙަރަކާތްތެރިވަމުންނެވެ. އެ ސަރަޙައްދު ސާފުކޮށް، ވީހާ ވެސް އަވަހަށް ރޭލުގެ ޚިދުމަތް އަލުން ފެށޭތޯ ދަނީ މަސައްކަތްކުރަމުންނެވެ.
މިޞްރުގެ ދަތުރުފަތުރާ ބެހޭ ވުޒާރާއިން ވަނީ އެކްސިޑެންޓު ހިނގުމަށް މެދިވެރިވި ސަބަބު ތަހުޤީޤުކުރުމަށް އަންގައި، މައްސަލައިގައި ކުށްވެރިވާ މީހުންނާ ދެކޮޅަށް އެންމެ ހަރުކަށި އަދަބު ދޭނެ ކަމަށް ބުނެފައެވެ.
މިޞްރުގެ ރޭލު ދުއްވާ މަގުތައް އިތުރަށް ތަރައްޤީ ކުރުމަށް އެ ޤައުމުން ފަހުގެ އަހަރުތަކުގައި ވަނީ އެތައް ބިލިޔަން ޑޮލަރެއް ޚަރަދުކޮށްފައެވެ. އެ ޤައުމުގެ ރޭލު ނިޒާމަކީ މެދުއިރުމަތީގެ އެންމެ ދުވަސްވީ ރޭލު ނިޒާމުތަކުގެ ތެރޭގައި ހިމެނޭ ނިޒާމެކެވެ.