ހަނގުރާމައިގެ ސަބަބުން ފުޓްބޯޅަ ކުޅޭނެ މާހައުލެއް ނެތުމުން ފަލަސްތީނުގެ 17 އަހަރުން ދަށުގެ ގައުމީ ޓީމު ދިވެހިރާއްޖޭގައި ކޭމްޕް ކުރަން ނިންމައިފި އެވެ.
ގައުމީ ފުޓްބޯޅަ އިދާރާއިން ބުނީ ފަލަސްތީނުގެ ފުޓްބޯޅަ ފެޑަރޭޝަނުން އެ ގައުމުގެ ޓީމު ރާއްޖޭގައި ކޭމްޕް ކުރުމަށް އެދުމުން އަންނަ ނޮވެމްބަރު މަހުގެ އަށަކުން 19 އަށް އެ ފުރުސަތު ފަހިކޮށްދޭން ނިންމާފައިވާ ކަމަށެވެ.
އަދި ރާއްޖޭގައި ކޭމްޕް ކޮށްގެން ތިބޭއިރު ރާއްޖޭގެ 17 އަހަރުން ދަށުގެ ޓީމާއެކު އެކުވެރިކަމުގެ ދެ މެޗު ކުޅެން ނިންމާފައިވާ ކަމަށެވެ.
ފަލަސްތީނުގެ މި ޓީމު ތައްޔާރުވަމުން ދަނީ އޭއެފްސީ އޭޝިއަން ކަޕުގެ ކޮލިފައިންގައި ވާދަކުރުމަށެވެ. މި ކޮލިފައިންގައި ރާއްޖެ ވެސް ވާދަކުރާނެ އެވެ.
އެފްއޭއެމުން ބުނީ ފަލަސްތީނުގެ ގައުމީ ޓީމު ރާއްޖޭގައި ތިބޭއިރު އެކަމަށް ސަރުކާރުގެ އެހީތެރިކަން ހޯދުމަށާއި ދެ މެޗަށް ސްޕޮންސަރުން ހޯދުމަށް މަސައްކަތް ކުރާނެ ކަމަށެވެ.
ރާއްޖޭގެ 17 އަހަރުން ދަށުގެ ޓީމު މިހާރު ތައްޔާރުވަމުން އަންނަނީ އަންނަ މަހު ބާއްވާ ސާފް ޗެމްޕިއަންޝިޕުގައި ވާދަކުރުމަށެވެ. މި ޓީމުގެ ކޯޗަކީ ކުރީގެ ޑިފެންޑަރު ސޮބާހް މުހައްމަދެވެ.