ޚަބަރު

ފިޔޯރީ ބަނދަރުގެ އެއްގަމު ތޮށީގެ ބީމްތައް ޖަހައި ނިންމާލައިފި


  • މިއީ 38 މިލިއަނަށްވުރެ ގިނަ ރުފިޔާގެ މަޝްރޫޢެއް

  • މިހާރު ކުރިއަށްދަނީ ކުއޭ ވޯލް ކެޕިން ބީމް އެޅުމުގެ މަސައްކަތް

ހުވަދުއަތޮޅު ދެކުނުބުރީ ފިޔޯރީ ބަނދަރު ތަރައްޤީކުރުމާއި، ގޮންޑުދޮށް ހިމާޔަތްކުރުމުގެ މަޝްރޫޢުގެ މަސައްކަތް ބާރު ދުވެއްޔެއްގައި ކުރިއަށްދާ ކަމަށް އެ މަޝްރޫޢުގެ ކޮންޓްރެކްޓަރ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީއިން ވިދާޅުވެއްޖެއެވެ. ފިޔޯރީގެ ރައްޔިތުންނަށާއި އެރަށަށް ޒިޔާރަތްކުރާ ފަރާތްތަކަށްވެސް ދިމާވާ އެންމެ ބޮޑު އެއް ގޮންޖެހުމަކީ ލަފާ ފުރުމުގެ ދަތިކަމެވެ.

ގދ. ފިޔޯރީގައި މިހާރު ބޭނުންކުރަނީ 2009ވަނަ އަހަރުގެ ބޭނުންކުރަންފެށި ބަނަދަރެކެވެ. އޭރު ބަނދަރު ތަރައްޤީކޮށްފައިވާގޮތުން ލަފާފުރުމުގެ މައްސަލައަށް ހައްލެއްވަނީ ނުލިބިފައެވެ. އެހެންކަމުން ބަނދަރު ތަރައްޤީކުރުމުގެ މަސައްކަތް ފެށުމަށް ޕްލޭންތަކެއްކޮށް އެ މަސައްކަތް ސަރުކާރުން ވަނީ ފަށްޓަވާފައެވެ.

ގދ. ފިޔޯރީ ބަނދަރު ތަރައްޤީކުރުމުގެ މަޝްރޫޢު ފެށުމަށް ސަރުކާރުން، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ އެމްޓީސީސީއާ ޙަވާލުކޮށްފައިވަނީ މިއަހަރުގެ އޭޕްރިލްމަހުގެ ތެރޭގައެވެ.

ފިޔޯރީ ބަނދަރު ތަރައްޤީކުރުމުގެ މަޝްރޫޢުގެ ކޮންޓްރެކްޓަރ އެމްޓީސީސީން ވިދާޅުވީ، ފިޔޯރީ ބަނދަރު ތަރައްޤީކުރުމުގެ މަޝްރޫޢުގެ ދަށުން އެއްގަމުތޮށީގެ ބީމްތައް ތައް ޖެހުމުގެ މަސައްކަތް މިމަހުގެ 26ވަނަ ދުވަހުގެ ނިޔަލަށް އެއްކޮށް ނިންމާފައިވާކަމަށެވެ. އަދި މިހާރު ކުރިއަށްދަނީ އެއްގަމު ތޮށީގެ ކެޕިން ބީމް އެޅުމުގެ މަސައްކަތް ކަމަށްވެސް އެމްޓީސީސީއިން ވިދާޅުވެއެވެ.

ފިޔޯރީ ބަނަދަރު ތަރައްޤީކުރުމުގެ މަޝްރޫގެ ދަށުން ނެރު ބައްތިއާއި މަގު ބައްތި ޖެހުމަށްވެސް ވަނީ ހަމަޖެހިފައެވެ.

މި މަޝްރޫޢު ސަރުކާރުން އެމްޓީސީސީއާ ޙަވާލުކުރީ 38 މިލިއަނަށްވުރެ ގިނަ ރުފިޔާއަށެވެ.

ފިޔޯރީ ބަނދަރު ތަރައްޤީކުރުމުގެ މަޝްރޫޢު ނިމޭއިރު ޒަމާންތަކެއް ވަންދެން ރަށުގެ ރައްޔިތުން އުފުލަމުންދިޔަ ލަފާފުރުމުގެ ދަތިކަމަށް ދާއިމީ ހައްލެއް ލިބޭނެކަމަށް ސަރުކާރުން ޤަބޫލުކުރައްވައެވެ.