ކުލަބު މޯލްޑިވްސް 2025 ގެ ސީޒަން ހުޅުވާ މުބާރާތް ކަމަށްވާ ކިންގްސް ކަޕް ލީގު އޮފް ޗެމްޕިއަންސްގައި ކުޅުނު ފުރަތަމަ މެޗުތައް ޓީމު ނައިވާދޫ އާއި، އައްޑޫ ސިޓީ މައިލޯ ސްޕޯޓްސް ކުލަބު އަދި ޖޯލި މޯލްޑިވްސްއިން ކާމިޔާބުކުރިއިރު، ކުލަބު ވެމްކޯ އާއި ކުޅިވަރު ވުޒާރާ ކުލަބު ބައްދަލުކުރި މެޗު އެއްވަރުވެއްޖެއެވެ.
ކުލަބު މޯލްޑިވްސް ފުޓްސަލް ސީޒަން ހުޅުވުމުގެ ރަސްމިއްޔާތު ރޭ ބޭއްވުނުއިރު، މި ރަސްމިއްޔާތު ޝަރަފުވެރިކޮށްދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުއެވެ. މި ފަހަރުގެ ކްލަބް މޯލްޑިވްސް ސީޒަންގައި ޖުމްލަ 6 މުބާރާތެއް ކުޅެވިގެންދާނެއެވެ.
މިގޮތުން ކުޅެވޭ ފުރަތަމަ މުބާރާތަކީ ރާއްޖޭގެ ފުޓްސަލް ޗެމްޕިއަނުންގެ މެދުގައި ކުޅެވޭ ކިންގްސް ކަޕެވެ. މި މުބާރާތުގައި އެންމެ ފަހުގެ ކުލަބު މޯލްޑިވްސް ކަޕުގެ ޗެމްޕިއަނުން ކުލަބު ވެމްކޯ އާއި ކުލަބު މޯލްޑިވްސް ކްލެސިކުގެ ޗެމްޕިއަނުން ކުޅިވަރު ވުޒާރާ ކުލަބު ވާދަކުރި މެޗު ނިމިގެންދިޔާއި ދެ ޓީމުން ކުރެ ޓީމަކަށް ލަނޑެއް ކާމިޔާބުނުކުރެވި އެއްވަރުވެގެންނެވެ.
އަދި އޭދަފުށި ކައުންސިލް މުބާރާތުގެ ޗެމްޕިއަނުން ކަމަށްވާ ކުލަބު ކޮންބިނޭޝަންއާ ވާދަކުރި މެޗު ގޯލްޑަން ފުޓްސަލް ޗެލެންޖުގެ އެންމެ ފަހުގެ ފައިނަލްގައި ވާދަކުރި ޓީމު ހދ. ނައިވާދޫން ކާމިޔާބުކުރީ 4-1 ގެ ނަތީޖާއަކުންނެވެ.
މީގެ އިތުރުން ރިސޯޓް ލީގުގެ ޗެމްޕިއަން ޖޯލި މޯލްޑިވްސްއިން ވަނީ ކުލަބު މޯލްޑިވްސް ކަޕުގެ ފައިނަލްގައި ވާދަކުރި ރޯޑް ރެކްރިއޭޝަން ކުލަބު 6-3 ގެ ނަތީޖާއަކުން ބަލިކޮށްފައެވެ. ގޯލްޑަން ފުޓްސަލް ޗެލެންޖުގެ ޗެމްޕިއަން ޓީމު ކާށިދޫއާ ދެކޮޅަށް ކުޅުނު މެޗު އައްޑޫ ސިޓީގެ ޗެމްޕިއަން މައިލޯ ސްޕޯޓްސް ކުލަބުން ކާމިޔާބުކުރީ 3-0 ގެ ނަތީޖާއަކުންނެވެ.
ދެ ގްރޫޕަކަށް ބަހާލެވިގެން ކުރިއަށްދާ މިމުބާރާތުގެ މެޗެއް ދެން އޮންނާނީ އަންނަ ބުދަ ދުވަހުގެރެއެވެ. މިރޭ ކުޅެވިގެންދާނީ އެއިޓީން ތާޓީ ކްލެސިކް މުބާރާތުގެ މެޗުތަކެވެ.