ޚަބަރު

ފުލުހުންގެ 40 ވަނަ އަސާސީ ތަމްރީނު ކޯހުން އެންމެ މޮޅު ދަރިވަރަކަށް ސާޖަންޓް އަރުޝަދު


  • ސާޖަންޓް އަރުޝަދަށް ވަނީ ކޮމިޝަނަރސް އެކްސެލެންސް އެވޯޑުވެސް ލިބިފައި

  • މި ފަހަރު ކޯހުގައި 138 ދަރިވަރުން ބައިވެރިވިއިރު ކޯސް ނިންމާފައިވަނީ 116 ބައިވެރިން

ފުލުހުންގެ 40 ވަނަ އަސާސީ ތަމްރީނު ކޯހުން ހުރިހާ ގޮތަކުން އެންމެ މޮޅު ދަރިވަރަކަށް ސާޖަންޓް މުޙައްމަދު އަރުޝަދު ހޮވިއްޖެއެވެ. މި ކޯސް ކުރިއަށް ގެންގޮސްފައިވަނީ ދ. ވާނީގައި ހުންނަ ނޭޝަނަލް ކޮލެޖް އޮފް ޕޮލިސިން އެންޑް ލޯ އެންފޯސްމެންޓުގެ މަރުކަޒުގައެވެ.

ދ. ވާނީގައި ކުރިއަށް ގެންދިޔަ ފުލުހުންގެ 40 ވަނަ އަސާސީ ތަމްރީނު ކޯހުގެ ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވީ ދާޚިލީ ސަލަމަތާއި ފަންނިއްޔާތާ ބެހޭ ވަޒީރު ޢަލީ އިހުސާނެވެ. މި ރަސްމިއްޔާތުގައި ވަޒީރުގެ އިތުރުން ކޮމިޝަނަރ އޮފް ޕޮލިސް އިސްމާޢިލް ނާވީނާއި، ދަޢުވަތު އެރުވިގެން ވަޑައިގެންނެވި ބޭރުގެ ސަފީރުންނާއި، ފުލުހުންގެ މުއައްސަސާގެ އިސްވެރިން ބައިވެރިވެވަޑައިގެންނެވިއެވެ.

ފުލުހުންގެ 40 ވަނަ އަސާސީ ތަމްރީނު ކޯހުގެ ހުރިހާ ގޮތަކުން އެންމެ މޮޅު ދަރިވަރަކަށް ހޮވިފައިވަނީ ހާޖީ ސްކޮޑްގެ ސާޖަންޓް، ށ. ފީވަކަށް އުފަން މުޙައްމަދު އަރުޝަދެވެ. މުޅި ކޯހުގެ އެއްވަނަ ހޯދުމާއެކު، އޭނާއަށް ވަނީ ކޮމިޝަނަރސް އެކްސެލެންސް އެވޯޑުވެސް ލިބިފައެވެ. މި އެވޯޑު ހަވާލުކޮށްދެއްވީ ކޮމިޝަނަރ އޮފް ޕޮލިސް އިސްމާޢިލް ނަވީނެވެ.

މި ރަސްމިއްޔާތުގައި ކޯހުގެ ގަދަ 3 ހޮވުމުގެ އިތުރުން އިންޑޯ އަދި އައުޓްޑޯ މާއްދާތަކުން އެންމެ މޮޅު ދަރިވަރުން ވަނީ ހޮވާފައެވެ. ކޯހުގެ އިންޑޯ މާއްދާތަކުން އެންމެ މޮޅު ދަރިވަރަކަށް ހޮވިފައިވަނީ، ސާޖެންޓް އަހުމަދު ޝިބަމެވެ. އައުޓްޑޯ މާއްދާތަކުން އެއްވަނަ ހޯދީ، ކޮންސްޓަބަލް އައިޝަތު ހަމްޒާ ނިޔާޒެވެ.

މި ރަސްމިއްޔާތުގައި އެކި ސްކޮޑްތަކުންވެސް ގަދަ 3 ވަނީ ހޮވާފައެވެ. މިފަހަރުގެ ކޯހުގައި ހުރިހާ ގޮތަކުން އެންމެ ރަނގަޅު ސްކޮޑަކަށް ހޮވިފައިވަނީ، އައިނެއްލާ ސްކޮޑެވެ.

ފުލުހުންގެ އަސާސީ ތަމްރީނު ކޯހަކީ ފުލުހުންގެ ވަޒީފާއަށް ބޭނުންވާ ތަމްރީނާއި ތަރުބިއްޔަތު އުނގަންނައިދީ ފުލުހުންގެ މަސައްކަތަށް ބޭނުންވާ އިލްމީ ޤާބިލުކަމާއި ހުނަރާއި ތަޖުރިބާ ލިބިދިނުމަށް ކުރިއަށް ގެންދާ ކޯހެކެވެ. މި ކޯހުގައި ފިޒިކަލް ޓްރެއިނިންގ، އޮޕަރޭޝަނަލް ސޭފްޓީ އެންޑް ޓެކްޓިކްސް އަދި ގާނޫނާއި ގަވާއިދުތަކުގެ އިތުރުން ފުލުހުންގެ މަސައްކަތްތަކާ ގުޅުންހުރި ބައިތައް ކިޔަވައިދޭނެއެވެ.

މި ފަހަރު ކޯހުގައި 138 ދަރިވަރުން ބައިވެރިވިއިރު ކޯސް ނިންމާފައިވަނީ 116 ބައިވެރިންނެވެ.