ދިވެހި އުފެއްދުންތައް ޗައިނާ މާކެޓަށް: ތަފާތު ފެންނަ ވަރުގެ ބޮޑު ފައިދާއެއް ދިވެހިންނަށްކުރާނެ

މިނިވަން ވިޔަފާރީގެ އެއްބަސްވުމުން ތަފާތު ފެންނަ ވަރުގެ ބޮޑު ފައިދާއެއް ދިވެހިންނަށްކުރާނެ ކަމުގައި ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ކޮންގް ޝިންހުއާ ވިދާޅުވެއްޖެއެވެ.

ރާއްޖެ-ޗައިނާ މިނިވަން ވިޔަފާރީގެ އެއްބަސްވުމަށް އަމަލުކުރަން ފެށީ މިއަހަރުގެ ޖެނުއަރީ މަހުގެ ފުރަތަމަ ދުވަހުއެވެ. މިއީ ރާއްޖެއާއި ޗައިނާއާއި ދެމެދު ވިޔަފާރިއާއި އިންވެސްޓްމަންޓްގެ ގިނަ ފުރުސަތުތަކަކަށް މަގު ފަހިވެގެންދާނެ އެއްބަސްވުމެކެވެ.

ޕީއެސްއެމް ނިއުސްއަށް ދެއްވި އިންޓަވިއުއެއްގައި ސަފީރު ކޮންގް ޝިންހުއާ ވިދާޅުވީ ޗައިނާއަކީ މަހާއި ކަނޑުގެ އެކި ބާވަތްތަކުން އުފައްދާ ކާނާ އެންމެ ގިނައިން އެތެރެކުރާ އެއް ޤައުމު ކަމަށެވެ. އަދި ރާއްޖެއަކީ ފުޅާ ދާއިރާއެއްގައި މަހުގެ އުފެއްދުންތައް އެކްޕޯޓްކުރާ ޤައުމަކަށްވާއިރު، ދެ ޤައުމުގެ ދެމެދުގައި މިނިވަން ވިޔަފާރީގެ އެއްބަސްވުން އެކުލަވާލުވުމުގެ ކުރިން ދިވެހި އުފެއްދުންތައް ޗައިނާ މާކެޓުން ނުފެންނަކަމަށް ސަފީރު ވިދާޅުވިއެވެ.

ނަމަވެސް، މިނިވަން ވިޔަފާރީގެ އެއްބަސްވުމާއެކު ދިވެހި އުފެއްދުންތައް ޗައިނާއަށް އެކްސްޕޯޓްކުރަން ފެށުމުން މާކެޓުގައި އެ އުފެއްދުންތަކަށް އޮންނަ ޑިމާންޑް ވަރަށް ބޮޑަށް އިތުރުވެފައިވާކަމަށް ސަފީރު ވިދާޅުވިއެވެ. އަދި ކުރިއަށް އޮތްތަނުގައި ޗައިނާގެ މާކެޓުން ވަރަށް ބޮޑު ފައިދާއެއް ދިވެހިންނަށްކުރާނެކަމަށް ސަފީރު ވިދާޅުވިއެވެ.

"މިހާރު އެބަ ފެނިގެންދޭ ބްރޭންޑެއްގެ ގޮތުގައި ދިވެހި އުފެއްދުންތައް ޗައިނާގެ މާކެޓުގައި. ދިވެހިންނާއި ޗައިނާގެ މީހުންނާއެކު ވިޔަފާރީގެ ގުޅުންތައްވެސް މިހާރު ދަނީ އެކުލަވާލަމުން. ތަފާތު ފެންނަ ވަރުގެ ބޮޑު ފައިދާއެއް ދިވެހިންނަށްކުރާނެ ޙަޤީޤަތުގައި." ސަފީރު ވިދާޅުވިއެވެ.

ޗައިނާގެ ސަފީރު ވިދާޅުވީ ދިވެހި އުފެއްދުންތައް ޗައިނާގައި އިސްތިހާރުކުރުމަށް އިޤުތިޞާދީ ވުޒާރާއާއެކު ވާރަށް ގާތުން މަސައްކަތްކުރަމުންދާ ކަމަށެވެ. އަދި މިކަމުގެ އަސަރު ކުރިއަށް އޮތް 1 ނުވަަތަ 2 އަހަރު ދުވަހުގެ ތެރޭގައި ފެންނާނެކަމަށް ސަފީރު ވިދާޅުވިއެވެ.

ރާއްޖެ-ޗައިނާ މިނިވަން ވިޔަފާރީގެ އެއްބަސްވުމާއިއެކު އެކްސްޕޯޓާއި ރީ-އެކްސްޕޯޓްގެ ދާއިރާ ފުޅާވެގެންދާނެކަމަށް ސަރުކާރުން މީގެކުރިން ވަނީ ވިދާޅުވެފައެވެ. ދިވެހި މަސްވެރިކަމުގެ އުފެއްދުންތަކާއި އެހެނިހެން މުދާ ރާއްޖޭގައި ޕްރޮސެސްކޮށް، އެކްސްޕޯޓްކުރުމަށް މަގުފަހިވެގެންދާއިރު މީގެ ސަބަބުން އައު ވިޔަފާރިތައް އުފަންވެ، ވަޒީފާގެ ގިނަ ފުރުސަތުތަކެއް ހުޅުވިގެންދާނެކަން ސަރުކާރުން ފާހަގަކުރައްވައެވެ.

ޗައިނާއަކީ 1.41 ބިލިޔަނަށްވުރެ ބޮޑު އާބާދީއެއް އޮތް ޤައުމަކަށްވާއިރު މިހާބޮޑު މާކެޓަކަށް ވަނުމުގެ ފުރުސަތު ދިވެހި ވިޔަފާރިވެރިންނަށް ހުޅުވިގެންދިއުމަކީ ރާއްޖޭގެ ވިޔަފާރިތަކާއި އިޤްތިޞާދު ކުރިއަރާ ދުވެލި ހަލުއިވެގެންދާނެ ކަމެއްކަން އިޤްތިޞާދީ މާހިރުން ފާހަގަކުރައްވައެވެ.