އައްޑޫ އެކުއެޓޯރިއަލް ހޮސްޕިޓަލުގައި ނާރުގެ ބަލިތަކަށް ފަރުވާދޭން ފަށަނީ

އައްޑޫ ސިޓީ އެކުއެޓޯރިއަލް ހޮސްޕިޓަލް އޭއީއެޗުން، ފޯރުކޮށްދެމުންދާ ޞިއްޙީ ޚިދުމަތްތައް އިތުރަށް ފުޅާކޮށްފިއެވެ. އައްޑޫ އެކުއެޓޯރިއަލް ހޮސްޕިޓަލުގައި ނިއުރޮލޮޖީގެ ޚިދުމަތް ފޯރުކޮށްދިނުމަށް ތައްޔާރުވަމުންދާއިރު، އެންޑޮކްރިނޮލޮޖީ އަދި ނެފްރޮލޮޖީގެ ޚިދުމަތް މިހާރު ދަނީ ފޯރުކޮށްދެމުންނެވެ.

އައްޑޫ އެކުއެޓޯރިއަލް ހޮސްޕިޓަލުން ވިދާޅުވީ މިހާރު އެހޮސްޕިޓަލުން ނާރުގެ ބަލިތަކަށް ޚާއްސަ (ނިއުރޮލޮޖީ) ޑޮކްޓަރުންގެ ޚިދުމަތް ތަޢާރަފްކުރުމަށް ތައްޔާރުވެފައިވާ ކަމަށެވެ. ހޯމޯންއާއި މެޓަބޮލިކް ބަލިތަކަށް ފަރުވާ ދިނުމަށް އެންޑޮކްރިނޮލޮޖީގެ ޚިދުމަތް މިދިޔަ މަހުން ފެށިގެން ދެމުންދާކަމަށާއި، ކިޑްނީއާ ގުޅުންހުރި ބަލިތަކަށް ޚާއްސަ ނެފްރޮލޮޖީގެ ޚިދުމަތްވެސް މިހާރު ލިބެމުންދާނެ ކަމަށް އެހޮސްޕިޓަލުން މައުލޫމާތުދެއްވައެވެ.

ނިއުރޮލޮޖީގެ ޚިދުމަތް ފެށުމާއެކު، ސިކުނޑިއާއި، ނާރުތަކާއި، ނާރުކައްޓާއި ގުޅުންހުރި ބަލިތަކަށް ދެވޭ ފަރުވާގެ ފެންވަރު ވަރަށް ބޮޑަށް ރަނގަޅުވެގެންދާނެއެވެ. އަދި ވަކިން ޚާއްސަކޮށް ސްޓްރޯކް (ފަޅައިގެންދާ ބަލި)، އެޕިލެޕްސީ (ފިޓުޖެހުން)، ނާރު ދުޅަވުން، އަދި ބޮލުގެ ރިހުން ފަދަ ބަލިތަކަށް އައްޑޫއާއި ކައިރީގައިވާ އަތޮޅުތަކުގެ ރައްޔިތުންނަށް މާލެއަށް ދަތުރުނުކޮށް ގާތުން ޚިދުމަތް ލިބޭނެ މަގު ފަހިވެގެންދާނެއެވެ. މިކަމުގެ ސަބަބުން ވަގުތާއި ފައިސާގެ ގޮތުން ރައްޔިތުންނަށް ބޮޑު ލުއިފަސޭހައެއް ލިބިގެންދާނެ ކަމަށް އެހޮސްޕިޓަލުން ފާހަގަކުރެއްވިއެވެ.

މިދިޔަ މަހުން ފެށިގެން އެހޮސްޕިޓަލުން ފޯރުކޮށްދޭން ފަށާފައިވާ އެންޑޮކްރިނޮލޮޖީގެ ޚިދުމަތަކީވެސް މުޖުތަމަޢުގައި އާންމުވެފައިވާ ހޯމޯންއާއި މެޓަބޮލިކްގެ ބަލިތަކަށް ވަރަށް ބޭނުންތެރި ޚިދުމަތެކެވެ. މި ބަލިތަކުގެ ތެރޭގައި ހަކުރުބަލި (ޑައިބެޓީސް)، ތައިރޮއިޑްބަލި އަދި ހޯމޯންއާ ގުޅުންހުރި އެހެނިހެން ބަލިތައް ހިމެނެއެވެ. މި ޚިދުމަތްތައް ފަސޭހައިން ލިބެން ހުރުމުން، މިފަދަ ބަލިތައް ކުރިން ދެނެގަނެ، ފަރުވާ ދިނުމަށް ބޮޑެތި ފަސޭހަތަކެއް ލިބިގެންދާނެ ކަމަށް އެހޮސްޕިޓަލުން ވިދާޅުވެއެވެ.

އެހޮސްޕިޓަލުގައި ވަނީ ކިޑްނީއާ ގުޅުންހުރި ބަލިތަކަށް ޚާއްސަ ނެފްރޮލޮޖީގެ ޚިދުމަތްވެސް މިހާރު އަލުން ފެށާފައެވެ. މި ޚިދުމަތް މެދުކެނޑުމުގެ ސަބަބުން ގިނަ ބަޔަކަށް ދަތިތަކާ ކުރިމަތިވި ނަމަސް، މި ޚިދުމަތް އަލުން ފެށުމަކީ ރައްޔިތުންނަށް ބޮޑު ހިތްހަމަޖެހުމެއް ވަނީ ލިބިގެން ގޮސްފައެވެ. ކިޑްނީގެ ބަލިތަކަށް ފަރުވާ ދިނުމާއި، ޑައިލަސިސް ކުރަންޖެހޭ މީހުންނަށް ދެވޭ ޚިދުމަތްތައް މިހާރު ފުރިހަމައަށް ލިބެމުންދާނެ ކަމަށް އެހޮސްޕިޓަލުން މައުލޫމާތުދެއްވައެވެ.

އައްޑޫ އެކުއެޓޯރިއަލް ހޮސްޕިޓަލަކީ ދެކުނުގެ ޞިއްޙީ ޚިދުމަތްތަކުގެ މައި މަރުކަޒު ކަމަށް ވާތީ، މިފަދަ ޚާއްސަ ޚިދުމަތްތައް ތަޢާރަފްކުރުމަކީ ރާއްޖޭގެ ދެކުނު ސަރަހައްދުގެ ޞިއްޙީ ދާއިރާއަށް ލިބިގެންދާނެ ބޮޑު ކުރިއެރުމެއް ކަމަށް އެހޮސްޕިޓަލުން ވިދާޅުވެއެވެ. އަދި މިކަމުގެ ސަބަބުން ރައްޔިތުންނަށް ފަސޭހަކަމާއެކު މަތީ ފެންވަރުގެ ފަރުވާ ހޯދުމުގެ ފުރުސަތު އިތުރަށް ފުޅާވެގެންދާނެ ކަމަށްވެސް އެހޮސްޕިޓަލުން ވިދާޅުވެއެވެ.