ދިވެހިރާއްޖޭގެ ފަޚުރުވެރި 51 ވަނަ މިނިވަންދުވަސް ފާހަގަކުރެއްވުމަށް ހިންގަވާ ރަސްމީ ޙަރަކާތްތައް މިރޭ ފަށްޓަވާނެއެވެ. މިއަހަރުގެ މިނިވަންދުވަހުގެ ރަސްމީ ޙަރަކާތްތައް އިންތިޒާމްކުރައްވައި ވިލަރެސްކުރައްވަނީ ހޯމް މިނިސްޓްރީގެ ބެއްލެވުމުގެ ދަށުންނެވެ.
މިއަހަރުގެ މިނިވަންދުވަހުގެ ޙަރަކާތްތައް ފެއްޓެވުމަށް ހަމަޖެހިފައިވާނީ މިރޭ ބޭއްވެވުމަށް ހަމަޖެހިފައިވާ ދިދަނެގުމުގެ ރަސްމިއްޔާތުންނެވެ. އެއަށްފަހު ޖުލައި ސައްބީސްވާ އަންގާރަދުވަހުގެ ރޭ ކުރިއަށްގެންދަވަން ހަމަޖެހިފައިވަނީ މިނިވަންދުވަހުގެ މުނާސަބަތުގައި ރައީސްޖުމްހޫރިއްޔާގެ ދެކަނބަލުން ބާއްވާވާ ރަސްމީ ޖާފަތެވެ. މި ޖާފަތް އިންތިޒާމްކުރެއްވުމުގެ ހުރިހާ މަސައްކަތެއް ކުރައްވަމުން ގެންދަވަނީ ރައީސުލްޖުމްހޫރިއްޔާގެ އޮފީހުގެ ބެއްލެވުމުގެ ދަށުންނެވެ.
މި ޖާފަތުގައި ރައީސުލްޖުމްހޫރިއްޔާގެ ދެކަނބަލުންގެ އިތުރުން ދައުލަތުގެ އެކި މުއައްސަސާތަކުގެ އިސްވެރިންނާއި، ދައުލަތަށް ގިނަދުވަހު ޚިދުމަތްކުރައްވާފައި ތިއްބެވި ޢިއްޒަތްތެރިން ބައިވެރިވެވަޑައިގަންނަވާނެއެވެ. އަދި ބޭރުގެ ދައުލަތްތަކުން ދަޢުވަތުގެ އެރުވިގެން ވަޑައިގަންނަވާ ޑިޕްލޮމެޓުންވެސް ބައިވެރިވެވަޑައިގަތުމަށް ވަނީ ހަމަޖެހިފައެވެ. މިއީ މިނިވަންދުވަހުގެ މުނާސަބަތުގައި މިހާތަނަށް ބޭއްވެވި ރަސްމީ ޖާފަތްތަކުގެ ތެރެއިން އެންމެ ގިނަ ބަޔަކަށް ދަޢުވަތު އެރުއްވި ޖާފަތްކަމަށް ރައީސުލްޖުމްހޫރިއްޔާގެ އޮފީހުން ވިދާޅުވިއެވެ. ރަސްމީ ޖާފަތަށް އިސްލާމީ މަރުކަޒު މައިދާން ތައްޔާރުކުރެއްވުމުގެ މަސައްކަތް މިހާރުވެސް ދަނީ ކުރައްވަމުންނެވެ.
img:http://s1.psmnews.mv/images/660x400/dhidha-negun.jpg|މިނިވަންދުވަހުގެ ދިދަ ނެގުމުގެ ރަސްމިއްޔާތުގެ ތެރެއިން- ފޮޓޯ: ރައީސް އޮފީސް
27 ވަނަ ދުވަހުގެ ރޭ ކުރިއަށްދާނީ މާލޭގެ މަގުތައްމަތީގައި ފުޅަނދުބުރުގެ ޙަރަކާތްތަކެވެ. ފުޅަނދު ބުރުގައި ސަރުކާރުގެ އެކި ކުންފުނިތަކާއި އަމިއްލަކުންފުނިތަކާއި އެކި މުއައްސަސާތަކުން ވަނީ ބައިވެރިވެވެޑައިގެން، ވަރަށް ކުރިއްސުރެ ތައްޔާރީތައް ފަށްޓަވާފައެވެ. ރައީސުލްޖުމްހޫރިއްޔާ ފުޅަނދުބުރު ބައްލަވާލައްވައި، ފުޅަނދުބުރުގެ ބައިވެރިންނާ ބައްދަލުކުރެއްވުމަށް ހަމަޖެހިފައިވަނީ 27 ވަނަ ދުވަހުގެރޭ 10 ޖަހާއިރު މުލީއާގެ ކުރިމަތިންނެވެ.
މިނިވަންދުވަހުގެ މުނާޞަބަތުގައި ކުރިއަށް ގެންދެވުމަށް ހަމަޖެހިފައިވާ ފަންނާނުންގެ މިއުޒިކީ ޢީދު ކުރިއަށް ގެންދެވުމަށް ހަމަޖެހިފައިވަނީ 28 ޖުލައި ވަނަ ދުވަހުގެރެއެވެ. މިޝޯ 29 ވަނަ ދުވަހުގެ ރޭވެސް ކުރިއަށް ގެންދެވުމަށް ވަނީ ހަމަޖެހިފައެވެ. މި ޝޯގައި ރާއްޖޭގެ ނަންމަޝްހޫރު ފަންނާނުންގެ ހުށައެޅުންތައް ފެނިގެންދާނެއެވެ.
މިނިވަންދުވަހު ހިންގަވާ ރަސްމީ އެންމެ ފަހު ޙަރަކާތަކީ 30 ވަނަ ދުވަހު ކުރިއަށް ގެންދެވުމަށް ހަމަޖެހިފައިވާ ހެވިކަމާއި ކުޅިވަރުގެ ޢީދެވެ. ގަލޮޅު ސްޓޭޑިއަމްގައި ބޭއްވެވުމަށް ހަމަޖެހިފައިވާ މި ޙަރަކާތަށް ތައްޔާރުވެވަޑައިގަތުމުގެ މަސައްކަތް ކުރިއަށްދާއިރު، މި ޙަރަކާތުގައި އެމް.އެން.ޑީއެފާއި އެކި ސްކޫލްތަކާއި ކުންފުނިތަކުން ބައިވެރިވެ ހުށައެޅުންތައް ހުށައަޅައިދިނުމަށް ވަނީ ހަމަޖެހިފައެވެ.