ޚަބަރު

ގިނަ އަދަދެއްގެ ބަނގުރާ ފުޅިއާއެކު މީހަކު ހައްޔަރުކޮށްފި


  • ބަނގުރާކަމަށް ބެލެވޭ އެއްޗެއް ހުރި 500 މިލިލީޓަރުގެ 75 ފުޅި ފެނިފައިވޭ

  • ހައްޔަރުކޮށްފައިވަނީ ނޭޕާލްއަށް ނިސްބަތްވާ ތިރްތާ ބަހާދުރް ބީކޭ ނަމަކަށް ކިޔާ 37އަހަރުގެ ފިރިހެނެއް

ފުލުހުންނަށް ލިބުނު މަޢުލޫމާތާއި ގުޅިގެން ހުޅުމާލެއަށް ދަތުރުކުރަމުންދިޔަ ވޭނެއް ބަލައި ފާސްކޮށް ގިނަ އަދަދައްގެ ބަނގުރާ ފުޅިއާއެކު ނޭޕާލްގެ މީހަކު ހައްޔަރުކޮށްފިއެވެ.

ފުލުހުންގެ ޚިދުމަތުން ވިދާޅުވީ، ބަނގުރާކަމަށް ޝައްކުކުރެވޭ އެއްޗެއް ހުރި ފުޅިތަކެއް އަޅާފައި ހުރި ފޮށިތަކެއް އަރުވައިގެން ވޭންއެއް ހުޅުމާލެއަށް ދަތުރުކުރާކަމަށް ފުލުހުންނަށް ލިބުނު މައުލޫމާތަކާއި ގުޅިގެން އެ ވޭން ރޭ 21:46ހާއިރު ރީތިގަސްމަގުން ހުއްޓުވައި، ބަލައި ފާސްކޮށްފައިވާކަމަށެވެ.

އަދި އެ ވޭން ބަލައި ފާސްކުރިއިރު ބަނގުރާކަމަށް ބެލެވޭ އެއްޗެއް ހުރި 500 މިލިލީޓަރުގެ 75 ފުޅި ފެނިފައިވާކަމަށްވެސް ފުލުހުން ވިދާޅުވިއެވެ.

މި މައްސަލައާއި ގުޅިގެން، ވޭން ދުއްވި ނޭޕާލްއަށް ނިސްބަތްވާ ތިރްތާ ބަހާދުރް ބީކޭ ނަމަކަށް ކިޔާ 37އަހަރުގެ ފިރިހެނެއް ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. އަދި އެ ވޭންވެސް ވަނީ ޓޯރކޮށްފައެވެ.

މި މައްސަލަ ފުލުހުން ދަނީ ތަހުޤީޤުކުރަމުންނެވެ.