ޚަބަރު

ބަލިމީހުންގެ ރައްކާތެރިކަމާބެހޭ ސަމިޓުގައި ބައިވެރިވެވަޑައިގަތުމަށް ސިއްޙީ ވަޒީރު ފިލިޕީންސްއަށް


  • މި ސަމިޓު ކުރިއަށްދަނީ މިމަހުގެ 3 އިން 4 އަށް

  • ސަމިޓުގެ ތެރެއިން މި ދާއިރާއިން ރާއްޖެއަށް އެހީހޯދުމަށް މަޝްވަރާކުރާނެ

ހަތް ވަނަ ގްލޯބަލް މިނިސްޓީރިއަލް ސަމިޓް ފޯ ޕޭޝަންޓް ސޭފްޓީގައި ސިއްޙަތާބެހޭ ވަޒީރު އަބްދުﷲ ނާޡިމް އިބްރާހިމް ބައިވެރިވެވަޑައިގަންނަވައިފިއެވެ.

މި ސަމިޓް ކުރިއަށް ދާނީ ފިލިޕީންސްގެ މެނިލާގައި މިމަހުގެ 3 އިން 4 އަށެވެ. ޑިޕާޓްމަންޓް އޮފް ހެލްތު އޮފް ދަ ރިޕަބްލިކް އޮފް ފިލިޕީންސް އިން އިންތިޒާމްކުރާ މި ސަމިޓަކީ ދުނިޔޭގެ ސިއްޙީ ދާއިރާގެ ލީޑަރުންނާއި ތަޖުރިބާކާރުންނާއި ސްޓޭކްހޯލްޑަރުން އެއްތަނަކަށް އެއްވެ ސިއްޙީ ފަރުވާގެ ފެންވަރު ރަނގަޅުކުރުމާއި ބަލިމީހުންގެ ރައްކާތެރިކަން ކަށަވަރުކުރުމަށް ބައިނަލްއަގްވާމީ ގޮތުން މަސައްކަތްތައް ހަރުދަނާކުރުމަށް ބާއްވާ ވަޒީރުންގެ ފެންވަރުގެ ސަމިޓެކެވެ.

މި ސަމިޓްގައި މިނިސްޓަރުންނާއި ސިއްޙީ ދާއިރާގެ ފަންނީ ބޭފުޅުންނަށް ގްލޯބަލް ޕޭޝަންޓް ސޭފްޓީ އެކްޝަން ޕްލޭން (ޖީޕީއެސްއޭޕީ) 2021-2030 ގައި ކަނޑައަޅާފައިވާ ކަންކަން ކުރެވިފައިވާ މިންވަރު ބަލާ، ބަލިމީހުންގެ ރައްކާތެރިކަމުގައި އިސްކަންދޭ ދާއިރާތަކާ ބެހޭ ގޮތުން މަޝްވަރާކޮށް، އެކަންކަން ހާސިލްކުރުމަށް ކުރިމަތިވާ ގޮންޖެހުންތަކާ ގޮތުން މަޝްވަރާކޮށް ހައްލުހޯދާނެއެވެ.

މި ސަމިޓްގައި ހަވާސާގެ ތެރެއިން ބޭއްވޭ ބައްދަލުވުންތަކުގައި، ސިއްޙީ ދާއިރާގެ މުހިންމު ޖަމިއްޔާތަކާއި ބައިނަލްއަގްވާމީ ބައިވެރިންނާ ގުޅިގެން ބަލިމީހުންގެ ރައްކާތެރިކަމުގެ މަސައްކަތްތައް ކުރިއެރުވުމުގައި އެއްބާރުލުން ދެވޭނެ ދާއިރާތަކުން އެއްބާރުލުން ހޯދުމަށް މަޝްވަރާކުރާނެ ކަމަށް ސިއްޙަތާބެހޭ ވުޒާރާއިން ވިދާޅުވެއެވެ.

ބަލިމީހުންގެ ރައްކާތެރިކަން ކަށަވަރުކުރުމަށް ރާއްޖެއިން ކުރަމުންދާ މުހިންމު މަސައްކަތްތަކުގެ ތެރޭގައި ނޭޝަނަލް ޕޭޝަންޓް ސޭފްޓީ ޕްރޮގްރާމް، ހޮސްޕިޓަލްތަކުގައި ކޮލިޓީ އިމްޕްރޫވްމަންޓް އެންޑް ޑިވެލޮޕްމަންޓް (ކިއުއައިޑީ) ޔުނިޓްތައް ގާއިމްކުރުމާއި، 178 ސިއްހީ މަރުކަޒެއްގައި ޕޭޝަންޓް ސޭފްޓީ ފޯކަލް ޕޮއިންޓްތައް އައްޔަންކުރުން ހިމެނެއެވެ.