އަހަރުގެ ފުރަތަމަ 3 މަސް ދުވަހު މަސްވެރިންނަށް 379 މިލިޔަން ރުފިޔާ
-
މާރިޗު މަހު މަސްވެރިންނަށް 81.9 މިލިޔަން ރުފިޔާ ވަނީ ދޫކޮށްފައި
-
މަސްވެރިންނަށް ދަނީ ޤަވާއިދުން 48 ގަޑިއިރު ތެރޭ ފައިސާ ދޫކުރަމުން
މިއަހަރުގެ ފުރަތަމަ ތިން މަސްދުވަހު މަސްވެރިންނަށް 379 މިލިޔަން ރުފިޔާ ދޫކޮށްފައިވާ ކަމަށް މިފްކޯގެ ތަފާސްހިސާބުތަކުން ދައްކައިފިއެވެ.
މިފްކޯއިން މަސްވެރިންނަށް ޤަވާއިދުން 48 ގަޑިއިރު ތެރޭގައި ފައިސާ ދޫކުރަން ފަށާފައިވަނީ މިދިޔަ އަހަރުގެ މަސްވެރިންގެ ދުވަހާ ދިމާކޮށެވެ. މިއީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ވަޢުދުފުޅެކެވެ. މަސްވެރިންނަށް ޤަވާއިދުން ފައިސާ ދޭން ފެށިފަހުން މިހާތަނަށް 409.1 މިލިޔަން ރުފިޔާ މަސްވެރިންނަށް ދޫކޮށްފައިވާކަމަށް މިފްކޯގެ ތަފާސްހިސާބުތަކުން ދައްކައެވެ.
މިއާއެކު މިއަހަރު ފުރަތަމަ ތިން މަސް ދުވަހު އެކަނިވެސް 379 މިލިޔަން ރުފިޔާ މަސްވެރިންނަށް ވަނީ ދޫކޮށްފައެވެ.
ކިރުވި މަހަށް މަސްވެރިންނަށް ދޫކޮށްފައިވާ ފައިސާ
- ޖަނަވަރީ - 177 މިލިޔަން ރުފިޔާ
- ފެބްރުއަރީ - 120 މިލިޔަން ރުފިޔާ
- މާރިޗު - 81.9 މިލިޔަން ރުފިޔާ
މިދިޔަ މަހު މަސްވެރިންނަށް ދޫކުރި ފައިސާ އޭގެ ކުރީ މަހާ އަޅާބަލާއިރު ވަނީ ދަށްވެފައެވެ. ރޯދަމަހާ ދިމާކޮށް މަސްވެރިންނަށް ދޫކުރި ފައިސާ ދަށްވީ، އެވްރޭޖްކޮށް ރޯދަމަހު މަހަށް ނިކުތް ދޯނިފަހަރުގެ އަދަދު މަދުވީމައެވެ.
މިފްކޯއިން މަސްވެރިންނަށް ފައިސާ ދެމުންދަނީ އެކުންފުންޏާއި ބޭންކް އޮފް މޯލްޑިވްސް އަދި މާލީ ވުޒާރާގެ މެދުގައި ވެފައިވާ އެއްބަސްވުމެއްގެ ދަށުންނެވެ. މި އެއްބަސްވުމުގެ ދަށުން، މިފްކޯއިން މަސް އެކްސްޕޯޓް ކޮށްގެން ލިބޭ ބޭރުފައިސާ މާރުކުރަނީ ބޭންކަށެވެ.
ފަހުގެ ތާރީޚެއްގައި އެންމެ ގިނަ އަދަދަކަށް މިފްކޯއަށް މަސް ކިރުވާފައިވަނީ މިދިޔަ ފެބްރުއަރީ މަހުގެ 12ވަނަ ދުވަހުއެވެ. އެގޮތުން އެދުވަހު 546 ޓަނުގެ މަސް ކިރުވާފައިވެއެވެ. މިފްކޯއިން ވަނީ 48 މަސްދޯންޏަކަށް 7.6 މިލިޔަން ރުފިޔާ ދޫކޮށްފައެވެ.
މަސްވެރިކަމުގެ ސިނާއަތް އިތުރަށް ފުޅާކޮށް، ރާއްޖެއަށް އެންމެ ބޮޑު އާމްދަނީއެއް ލިބޭ އެއް ސިނާއަތަށް މަސްވެރިކަން ހެދުމަކީ ސަރުކާރުގެ އަމާޒެކެވެ. އެގޮތުން މިސިނާއަތަށް ދިމާވެފައިވާ މައްސަލަތަކަށް ސަރުކާރުގެ ފުރަތަމަ 3 އަހަރުގެ ތެރޭގައި ހައްލު ގެނެސްދިނުމަށް މަސްވެރިކަމުގެ ފެސިލިޓީތައް ތަރައްޤީކުރުމުގެ މަސައްކަތް ދަނީ ކުރަމުންނެވެ.