މަޝްހޫރު ފުޓްބޯޅަ ކޯޗު ސާންތީ ނިޔާވުމަކީ ކުޅިވަރު ދާއިރާއަށް ލިބުނު ބޮޑު ހުސްކަމެއް: ރައީސް

މަޝްހޫރު ފުޓްބޯޅަ ކޯޗު އިޙްސާން ޢަބްދުލްޣަނީ (ސާންތީ) ނިޔާވުމަކީ، ދިވެހި ކުޅިވަރުގެ ދާއިރާއަށް ލިބުނު ބޮޑު ހުސްކަމެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ، އިޙްސާން ޢަބްދުލްޣަނީ ނިޔާވުމާގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ކުޅިވަރުގެ ރޮނގުން، ވަކީން ޚާއްޞަކޮށް ފުޓްބޯޅައިގައި ބައިނަލްއަޤްވާމީ އަދި ޤައުމީ ފެންވަރުގައިވެސް ދިވެހިރާއްޖެ ފަޚުރުވެރިވާ ޚިދުމަތްތަކެއް ޤައުމަށް ކޮށްދެއްވާފައިވާ މަޝްހޫރު ފުޓްބޯޅަ ކޯޗު އިޙްސާން ޢަބްދުލްޣަނީ (ސާންތީ) އަވަހާރަވުމަކީ، ދިވެހި ކުޅިވަރުގެ ދާއިރާއަށް ލިބުނު ބޮޑު ހިތާމައެއް އަދި ހުސްކަމެއްކަމަށެވެ.

ހިތާމައިގެ މިވަގުތު ކުޅިވަރުގެ ދާއިރާގެ ހުރިހާ ޚިދުމަތްތެރީންނަށް އަދި މަރުޙޫމްގެ ލޮބުވެތި ޢާއިލާއަށް ރައީސުލްޖުމްހޫރިއްޔާ ވަނީ ތަޢުޒިޔާ ދަންނަވާފައެވެ.

إِنَّا ِللهِ وَإِنَّآإِلَيْهِ رَاجِعُون

ކުޅިވަރުގެ ރޮނގުން، ވަކީން ޚާއްޞަކޮށް ފުޓްބޯޅައިގައި ބައިނަލްއަޤްވާމީ އަދި ޤައުމީ ފެންވަރުގައިވެސް ދިވެހިރާއްޖެ ފަޚުރުވެރިވާ ޚިދުމަތްތަކެއް ޤައުމަށް ކޮށްދެއްވާފައިވާ މަޝްހޫރު ފުޓްބޯޅަ ކޯޗު އިޙްސާން ޢަބްދުލްޣަނީ (ސާންތީ) އަވަހާރަވުމަކީ،… pic.twitter.com/nUD9JzqBXw

— Dr Mohamed Muizzu (@MMuizzu) March 22, 2025

ރާއްޖޭގެ ފުޓްބޯޅައަށް ގިނަ ޚިދުމަތްތަކެއް ކޮށްދެއްވި ކޯޗު އިޙްސާން އަބްދުލްޣަނީ (ސާންތީ) ނިޔާވީ ޓްރީ ޓޮޕް ހޮސްޕިޓަލުގައި ކެންސަރު ބައްޔަށް ފަރުވާ ހޯއްދަވަމުން ގެންދަވަނިކޮށް މިރޭގެ ވަގުތެއްގައެވެ.

އޭނާއަކީ ކުރީގެ ފުޓްބޯޅަ ކުޅުންތެރިއެކެވެ. އެއަށްވުރެ ބޮޑަށް އޭނާގެ ޚިދުމަތް އޮތީ ކޯޗިންގެ ދާއިރާގައެވެ. ޚާއްސަކޮށް އެފްއޭއެމުގެ ޔޫތު ޑިވެލޮޕްމަންޓް ޕްރޮގްރާމް ފައްޓައި އެ ޕްރޮގްރާމް ކުރިއަށް ގެންދިއުމުގައި އޭނާގެ ދައުރު ވަރަށް ބޮޑެވެ.

ގިނަ ބަޔަކަށް ސާންތީ އެންމެ ބޮޑަށް ފާހަގަވެފައިވަނީ ޤައުމީ ފުޓްބޯޅަ ޓީމުންނެވެ. އޭނާއަކީ ރާއްޖެއަށް އެންމެ ފުރަތަމަ ފުޓްބޯޅައިން ތައްޓެއް ހޯދައިދިން ޤައުމީ ޓީމުގެ އެސިސްޓެންޓް ކޯޗެވެ. 2008 ވަނަ އަހަރު ރާއްޖެއާއި ލަންކާގައި ބޭއްވި ސާފް ޗެމްޕިއަންޝިޕް ފުޓްބޯޅަ މުބާރާތް ދިވެހިންނަށް ކާމިޔާބުކޮށްދިނުމުގައި އޭނާ އަދާކޮށްފައި ވަނީ ވަރަށް ފުރިހަމަ ޒިންމާއެކެވެ.

އޭނާ އެންމެ ފުރަތަމަ ޤައުމީ ޓީމާ ގުޅުނީ 2001 ވަނަ އަހަރެވެ. އެއަށްފަހު 2008 ވަނަ އަހަރާ ހަމައަށް އެސިސްޓެންޓް ކޯޗެއްގެ ގޮތުގައި މަސައްކަތް ކުރުމަށްފަހު ދެން ފެނިގެން ދިޔައީ ކުލަބު ފުޓްބޯޅައިގެ ސީނިއާ ކޯޗެއްގެ ގޮތުގައެވެ.

މިގޮތުން ކުލަބު އީގަލްސްއާއި ޔުނައިޓެޑް ވިކްޓަރީއަށް ކޯޗުކޮށްދީ އޭނާ ވަނީ އީގަލްސްއަށް ޤައުމީ ފުޓްބޯޅަ މުބާރާތްވެސް ކާމިޔާބުކޮށްދީފައެވެ. ފުޓްބޯޅަ އެސޯސިއޭޝަން އޮފް މޯލްޑިވްސްގެ ޓެކްނިކަލް ޑައިރެކްޓަރުކަންވެސް އަދާކުރި ސާންތީ ވަނީ ކުޅިވަރަށް ޚިދުމަތް ކުރުމުގެ ދާއިރާއިން ޒުވާނުންގެ ޤައުމީ އިނާމް ހާޞިލުކުރައްވާފައެވެ.

އޭނާއަކީ ޕީއެސްއެމްގެ ކުޅިވަރު ޕްރޮގްރާމްތަކަށް ވަރަށް ބޮޑު އެހީތެރިކަމެއް ވެދެއްވައި ވަރަށް ގިނަ ގޮތްގޮތުން ފަންނީ އެހީތެރިކަން ދެއްވި ފަރާތެވެ. އަޅުގަނޑުމެންގެ ދުޢާއަކީ ސާންތީގެ ފުރާނައަށް މާތް ﷲ ސުވަރުގޭގެ ދާއިމީ ނިޢުމަތް މިންވަރުކޮށްދެއްވާ އާއިލާއަށް ކެތްތެރިކަން ދެއްވުމެވެ.