އިޓާލިއަން ސެރިއާގައި ރޭ ފިއޮރެންޓީނާ އާއި ދެކޮޅަށް އިންޓަރ މިލާން ކުޅުނު މެޗު 2-1 ގެ ނަތީޖާއަކުން އިންޓަރ މިލާން މޮޅުވެ ތާވަލުގެ އެއްވަނައިގައި އޮތް ނާޕޮލީ އާއި ދެމެދުވާ ފަރަގު ޕޮއިންޓަކަށް ކުޑަކޮށްފި އެވެ.
މިލާނުގެ ސެންސީރޯ ސްޓޭޑިއަމްގައި ކުޅުނު މި މެޗުން އިންޓަރ މިލާން މޮޅުވުމާއެކު އެ ޓީމަށް ވަނީ މިހާތަނަށް ކުޅުނު 24 މެޗުން 54 ޕޮއިންޓާއެކު ތާވަލުގެ ދެވަނަ މަގާމު ލިބިފަ އެވެ. އެއްވަނައިގައި އޮތް ނަޕޮލީއަށް 24 މެޗުން ލިބިފައިވަނީ 55 ޕޮއިންޓެވެ.
އިންޓަރ މިލާން އިން މެޗު ކޮންޓްރޯލް ކޮށްގެން ކުޅެމުންދިޔަ މި މެޗުގެ ފުރަތަމަ މިނިޓުގައިވެސް އެ ޓީމަށް ވަނީ ލަނޑު ޖަހަން ރަގަޅު ފުރުސަތެއް ލިބިފަ އެވެ. އެގޮތުން ލައުޓާރީ އަރިމަތިން ނަގައިދިން ހުރަހެއް އޭރިޔާ ތެރޭގައި ހުރެ ލައުޓާރޯ މާޓިނޭޒް ފޮނުވާލިއިރު އެ ބޯޅަ ދިޔައީ ގޯލިގެ ދަނޑި ކައިރިން ބޭރަށެވެ.
އަދި އޭގެ ފަހުން ލައުޓާރޯ މާޓީނޯޒް ފޮނުވާލި ހަމަލައެއް ގޯލުގެ ހުރަސް ދަނޑީގައި ޖެހިފައިވާއިރު ބަރެއްލާ އާއި އޮގަސްޓޯ ފޮނުވާލި ދެ ހަމަލާ ވަނީ އަރިމަތިން ބޭރުވެފަ އެވެ.
މި މެޗުގައި އިންޓަރ މިލުން ޖެހި ފުރަތަމަ ލަނޑަކީ މެޗުގެ 28 ވަނަ މިނިޓުގައި އިންޓަރ މިލާނަށް ލިބުނު ކޯނަރެއް ލައުޓާރޯ ގޯލަށް ފޮނުވާލަން މަސައްކަތްކުރި ވަގުތު ފިއޮރެންޓީނާގެ ކުޅުންތެރިއެއްގެ އަތުން ބައިކޮޅަށް ވަދެފައިވާ ލަނޑެކެވެ.
ނަމަވެސް ފުރަތަމަ ހާފުގެ ކުޅުން ނިމެން މިނިޓަކަށް ވެފައިވަނިކޮށް ފިއޮރެންޓީނާ އިން ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ. މި ލަނޑަކީ އޭރިޔާ ތެރެއިން އިންޓަރ މިލާނުގެ ކުޅުންތެރިއެއްގެ އަތުގައި ބޯޅަ ޖެހުމާއި ގުޅިގެން ލިބުނު ޕެނަލްޓީ އަކުން މަންޑްރަގޯރާ ކާމިޔާބުކޮށްފައިވާ ލަނޑެކެވެ.
އިންޓަރ މިލާނުން މި މެޗުގައި ޖެހި ދެވަނަ ލަނޑު މެޗުގެ 52 ވަނަ މިނިޓުގައި އެ ޓީމަށް ކާމިޔާބު ކޮށްދީފައިވަނީ މާކޯ އަރްނައުޓޮވިޗް އެވެ.