އިނގިރޭސި އެފްއޭ ކަޕްގެ ފަސްވަނަ ބުރުގައި މެންޗެސްޓަރ ސިޓީ އާއި ދެކޮޅަށް ޕްލައިމަތު ކުޅެން ޖެހިއްޖެ އެވެ.
އެފްއޭ ކަޕްގެ ހަތަރުވަނަ ބުރުގެ މެޗުތައް ނިމުމާއިއެކު ފަސްވަނަ ބުރުގެ ގުރުއަތުލުން އިއްޔެ ބޭއްވިއިރު ޕްލައިމަތު އަށް އަނެއްކާވެސް ވަނީ ވަރުގަދަ އިމްތިހާނަކާއި ކުރިމަތިލާން ޖެހިފަ އެވެ. އެ ޓީމުން މި މުބާރާތުގެ ފަސްވަނަ ބުރުގެ ޖާގައެއް ހޯދާފައިވަނީ މި ސީޒަނުގައި ތަފާތު މޮޅު ކުޅުމެއް ދައްކަމުން އަންނަ ލިވަޕޫލް 1-0 ގެ ނަތީޖާއަކުން ބަލިކުރުމަށްފަހުގަ އެވެ.
ޕްލައިމަތުގެ ވާހަކަ މިހާރު ގަދަވެފައިވަނީ ލިވަޕޫލްގެ މައްޗަށް އެ ޓީމުން ހޯދި ތާރީޚީ ކާމިޔާބުގެ އިތުރުން މީގެ 30 ވަރަކަށް އަހަރު ކުރިން ރެފިއުޖީއެއްގެ ގޮތުގައި ބޮސްނިއާ ދޫކޮށް ދިޔަ މުސްލިޗް އެ ޓީމާއި ހަވާލުވެ ހޯދާފައިވާ ނަތީޖާތަކާއި އެކުގަ އެވެ.
ޕްލައިމަތުގެ ކޯޗު ކަމާއި މުސްލިޗު ހަވާލުވެފައިވަނީ އިނގިރޭސިވިލާތުގެ ކުރީގެ އެއްވަނަ ފޯވަޑް ވޭން ރޫނީ އެ މަގާމުން ދުރު ކުރުމަށްފަހުގަ އެވެ. އަދި އޭނާ ވަނީ ދިރިއުޅުމުގައި ކިތަންމެ ދަތި އުނދަގޫ ތަކަކާއި ކުރިމަތިލާން ޖެހުނު ނަމަވެސް އެކަންތައްތަކުން އަރައިގަނެ ހީނުކުރާފަދަ ރަގަޅު ކާމިޔާބީތަކެއް ހޯދިދާނެކަމަށް ލިވަޕޫލް އާއި ދެކޮޅަށް ނިކުތުމުގެ ކުރިންވެސް ބުނެފަ އެވެ. އަދި ލިވަޕޫލް އަތުން އެ ޓީމު މޮޅުވުމާއެކު އޭނާއަށް ގިނަބަޔަކު ވަނީ ތައުރީފު ކޮށްފަ އެވެ.
މި މުބާރާތުގެ ފަސްވަނަ ބުރުގައި އެންމެ ފަހުގެ ޗެމްޕިއަން މެންޗެސްޓަރ ޔުނައިޓެޑާއި ދެކޮޅަށް ފުލަމް ކުޅޭއިރު ނިއުކާސަލް ޔުނައިޓެޑް ނިކުންނާނީ ބްރައިޓަން އާއި ދެކޮޅަށެވެ.
މި މުބާރާތުގެ ފަސްވަނަ ބުރުގެ މެޗުތައް ކުޅުމަށް ހަމަޖެހިފައިވަނީ އަންނަ މާޗު މަހުގެ 1 އަދި 2 ގައެވެ.
އެފްއޭ ކަޕުގެ ފަސްވަނަ ބުރުގެ މެޗުތައް
- ޕްރެސްޓަން ނޯތުއެންޑް – ބާންލީ
- އެސްޓަން ވިލާ – ކާޑިފް ސިޓީ
- ކްރިސްޓަލް ޕެލަސް – މިލްވޯލް
- މެންޗެސްޓާ ޔުނައިޓެޑް – ފުލަމް
- ނިއުކާސަލް ޔުނައިޓެޑް – ބްރައިޓަން
- ބޯންމަތު – ވުލްވްސް
- މެންޗެސްޓާ ސިޓީ – ޕްލައިމަތު
- އެކްސްޓާ ސިޓީ/ނޮޓިންހަމް – އިޕްސްވިޗް