މެންޗެސްޓާ ސިޓީގައި އެ ޓީމުން ނެރެމުންދާ ދަށް ނަތީޖާތައް ބަދަލުކުރަން ބޭނުންވާ ފެންވަރުގެ ހަތިޔާރު އެބަހުރި ކަމަށް ޑިފެންޑަރު ރުބެން ޑިއާސް ބުނެފިއެވެ.
ޕޯޗުގަލްގެ ޑިފެންޑަރު މިހެން ބުނީ ޗެމްޕިއަންސް ލީގުގެ ގަދަ 16 އަށް ދިއުމަށް މިރޭ ސްޕޭނުގެ ރެއާލް މެޑްރިޑާ ދެކޮޅަށް ކުޅެން ޖެހޭ މެޗާ ބެހޭ ގޮތުން ވާހަކަ ދައްކަމުންނެވެ. ގަދަ 16 އަށް ދާނީ ރެއާލް އާއި ސިޓީ ހޯމް އެންޑް އަވޭ އުސޫލުން ކުޅެގެން މޮޅުވާ ޓީމެކެވެ.
"އަހަރުމެންގެ އެންމެ ގޯސް ސީޒަން މިއީ. އަހަރެން މި ކުލަބަށް ކުޅެނިކޮށް މިހާ ގޯސްވި ފަހަރެއް ނުދެކެން. މި ފަދަ ހާލަތެއް ބަދަލު ކުރަން ބޭނުންވާ ހުރިހާ ވަޒަނެއް ޗޭންޖިން ރޫމުގައި އެބަހުރި. އަހަރުމެން ޖެހޭނީ ވަރަށް ވިސްނުންތެރިކަމާއެކު ރަނގަޅު ވަގުތުގައި އެ ހަތިޔާރުގެ ބޭނުން ކުރަން،" ޑިއާސް ބުންޏެވެ.
އިނގިރޭސި ޕްރެމިއާ ލީގުގައި ސިޓީ މިވަގުތު އޮތީ އެއްވަނާގައިވާ ލިވަޕޫލަށްވުރެ 15 ޕޮއިންޓް ފަހަތުގަ އެވެ. ޗެމްޕިއަންސް ލީގުގެ ގްރޫޕް ސްޓޭޖް ފަހަނަ އަޅައި ދެވުނީ ކިރިޔަ ކިރިޔާ އެވެ.
ސިޓީގެ ވައިސް ކެޕްޓަން އަދި 2023 ވަނަ އަހަރުގެ ޗެމްޕިއަންސް ލީގު ސިޓީ އަށް ކާމިޔާބުކޮށްދިން ޓީމުގައި ކުޅުނު ޑިފެންޑަރު ބުނީ މި ހާލަތުގައި ރެއާލް މެޑްރިޑް ކަހަލަ ޓީމެއް ބަލިކުރުމަކީ ފަސޭހަކަމެއް ނޫން ކަމަށެވެ.
މިއީ ޗެމްޕިއަންސް ލީގުގައި ޖެހިޖެހިގެން ސިޓީ އާއި ރެއާލް ކުޅެން ޖެހުނު ހަތަރު ވަނަ ސީޒަނެވެ. އަދި މިއީ ނޮކްއަުޓް ބުރުގައި ރެއާލްއާ ވާދަކުރަން ޖެހުނު ފަސް ވަނަ ފަހަރެވެ.
ޑިއާސް ބުނީ މިދިޔަ ސީޒަނުގެ ބެލޮންޑީއޯ އެވޯޑް ސިޓީގެ ރޮޑްރީ އަށް ލިބުމުން ރެއާލް މެޑްރިޑުން އެކަމާ ދެކޮޅަށް އިހްތިޖާޖް ކުރި ނަމަވެސް އޭގެ އަސަރު މި މެޗުން ނުފެންނާނެ ކަމަށެވެ.
ޓީމުގެ ކުޅުންތެރިން މޮޅުވުމުގެ ރޫހުގައި ތިބި ނަމަވެސް ސިޓީގެ ކޯޗު ޕެޕް ގާޑިއޯލާ ބުނީ ރެއާލް ބަލިކުރެވޭނެކަމަށް ބުނަން އޭނަ އަށް ދަތި ކަމަށެވެ.