މިދިޔަ އަހަރު ބީއެމްއެލްއަށް 2.1 ބިލިޔަން ރުފިޔާގެ ސާފު ފައިދާއެއް
-
ބީއެމްއެލްއަށް ފަހު ކުއާޓަރގައި 725 މިލިޔަން ރުފިޔާ ސާފު ފައިދާ ލިބިފައިވޭ
-
މިދިޔަ އަހަރު 5.2 ބިލިޔަން ރުފިޔާގެ ލޯނު ދޫކުރި
ބޭންކް އޮފް މޯލްޑިވްސްއަށް މިދިޔަ އަހަރު ސާފު ފައިދާ ގޮތުގައި 2 ބިލިޔަން ރުފިޔާ ލިބިފައިވާ ކަމަށް ބޭންކް އޮފް މޯލްޑިވްސް ތަފާސްހިސާބުތަކުން ދައްކައިފިއެވެ. އެ ބޭންކުންވަނީ މިދިޔަ އަހަރުގެ ފަހު ކުއާޓަރގެ މާލީ ތަފާސްހިސާބުތައް އާންމުކޮށްފައެވެ.
ބީއެމްއެލްއިން މިދިޔަ އަހަރު މާލީ ތަފާސްހިސާބުތައް އާންމުކޮށްފައިވާއިރު، ބޭންކުގެ ސާފު ފައިދާ ވަނީ މިދިޔަ އަހަރު އޭގެ ކުރީ އަހަރާއި އަޅައިބަލާ އިތުރުވެފައެވެ. އެގޮތުން މިދިޔަ އަހަރު 2.1 ބިލިއަން ރުފިޔާގެ ސާފު ފައިދާއެއް ލިބިފައިވާއިރު މިއިީ 2023 ވަނަ އަހަރާއި އަޅާބަލާޢިރު 4 އިންސައްތައިގެ ކުރިއެރުމެކެވެ.
ބޭންކުގެ ތަފާސްހިސާބުތައް ދައްކާގޮތުން މިދިޔަ އަހަރުގެ ފަހު ކުއާޓަރގައި އެކަނިވެސް، ހިންގުމުގެ ފައިދާ ގޮތުގައި 685 މިލިއަން ރުފިޔާ ހޯދާފައިވެއެވެ. އަދި މި ކުއާޓަރގައި ސާފު ފައިދާގެ ގޮތުގައި 725 މިލިއަން ރުފިޔާ ލިބިފައިވާއިރު، މިއީ ތިން ވަނަ ކުއާޓަރއާ އަޅައިބަލާއިރު 47% ކުރިއެރުމެކެވެ. ސާފު ފައިދާ އިތުރުވެފައިވަނީ ޕްރޮވިޜަންގެ ގޮތުގައި ބެހެއްޓިފައިވާ ނިސްބަތުން ބޮޑު އަދަދެއް ލިބުމުންކަން ބީއެމްއެލްއިން ފާހަގަކުރެއެވެ.
މީގެ އިތުރުން ބޭންކުގެ ޖުމްލަ އެސެޓް ވަނީ 2023 ވަނަ އަހަރަށްވުރެ 3 ބިލިއަން ރުފިޔާ އިތުރުވެފައިކަން ބީއެމްއެލްއިން ވަނީ ހާމަކޮށްފައެވެ. މިއާއެކު ބޭންކުން ދޫކުރަމުންދާ ލޯނުގެ ފެންވަރު ރަނގަޅުވެފައިވާއިރު، މިދިޔަ އަހަރު އާންމު ފަރުދުންނާއި ވިޔަފާރިތަކަށް 5.2 ބިލިއަން ރުފިޔާގެ އައު ލޯނު ދޫކޮށްފައިވެއެވެ. މިއާއެކު ބޭންކުގެ ރައުސުލްމާލާއި ލިކުއިޑިޓީ ރޭޝިއޯ ގާނޫނު ލާޒިމްކުރާ މިންވަރަށްވުރެ މަތީގައި ދެމެހެއްޓިފައިވާކަން ބީއެމްއެލްއިން ފާހަގަކުރެއެވެ.
މިދިޔަ އަހަރަކީ އެ ބޭންކަށް ކާމިޔާބު އަހަރެއްކަން ފާހަގަކޮށް ބޭންކުގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ވިދާޅުވީ، މިދިޔަ އަހަރު ލިބުނު ހަރުދަނާ މާލީ ނަތީޖާއިން ބޭންކުގެ ކުރިއެރުން ދައްކުވައިދޭ ކަމަށެވެ. އަދި މުޖުތަމައަށް ޚިދުމަތްކުރުމަށް ބޭންކުން ދޭ އަހުމިއްޔަތުކަން ހާމަވެގެންދާއިރު މިއަހަރު ބޭންކުން މަސައްކަތް ކުރާނީ މި ލިބުނު ނަތީޖާއާއެކު އިތުރު ކާމިޔާބީ ހޯދޭނެކަމުގެ ޔަގީންކަމާއެކުކަން އޭނާ ފާހަގަކުރެއްވިއެވެ.
މިދިޔަ އަހަރުގެ ފަހު ކުއާޓަރގައި ބޭންކުން ވަނީ 2025 ވަނަ އަހަރު ނިމެންވާއިރަށް ރާއްޖޭގެ ހުރިހާ ރަށެއްގައި އޭޓީއެމް ބެހެއްޓުމަށް "މުޅި ރާއްޖެއަށް ބީއެމްއެލް އޭޓީއެމް" މަޝްރޫޢު އިއުލާންކޮށްފައެވެ. އަދި ޖަމިއްޔާތައް ބާރުވެރިކުރުވައި، ރާއްޖޭގެ އެކި ކަންކޮޅުތަކުގައި ދެމެހެއްޓެނިވި ތަރައްގީގެ މަޝްރޫޢުތައް ހިންގުމަށް "ބޭންކް ފަންޑް" ލިބޭ 5 ފަރާތެއް ހޮވާފައިވެއެވެ.
މުޅި ރާއްޖެ ހިމެނޭ ބޭންކިންގ ވިއުގަޔަކާއެކު 20 އަތޮޅުގައި 39 ބްރާންޗް، 95 ސެލްފްސަރވިސް ބޭންކިންގ ސެންޓަރ، 150 އޭޓީއެމް، އޭޖެންޓު ބޭންކިންގ ހިދުމަތުގެ އިތުރުން އެންމެ ޒަމާނީ އޮންލައިން ބޭންކިންގ ހިދުމަތާއެކު ބޭންކް އޮފް މޯލްޑިވްސްގެ އަމާޒަކީ އާންމު ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުން ކަމަށް ބީއެމްއެލްއިން ވިދާޅުވެއެވެ.