ޗެމްޕިއަންސް ޓްރޮފީ ކްރިކެޓް މުބާރާތުގެ ޓިކެޓްގެ ޑިމާންޑް ބޮޑުވެ، މުބާރާތުގެ ޓިކެޓް ވިއްކާ ވެބް ސައިޓް ޑައުންވެއްޖެ އެވެ.
މި މުބާރާތް ބާއްވާ ޕާކިސްތާނުގެ ކްރިކެޓް ބޯޑުން ނިންމާފައިވަނީ ޕާކިސްތާނުގައި ކުޅޭ މެޗުތައް ޕާކިސްތާނުގެ ގަޑިން ދޭއް ޖަހާއިރު ލައިވް ކުރުމަށެވެ. މިއާއެކު ޓިކެޓް ގަނެގެން މެޗު ބަލަން ވަނުމުގެ ފޯރި ގަދަވެ، ވެބްސައިޓަށް ވަން މީހުންގެ އަދަދު ގިނަވެ، ސައިޓް އެއްކޮށް ޑައުންވީ އެވެ.
މިކަން ހައްލު ކުރުމަށް ޕާކިސްތާނުން މިހާރު ވަނީ ސައިޓް ހޯސްޓް ކުރުމަށް ގިނަ ސާވާތަކެއް ބޭނުންކުރަން ފަށައިފަ އެވެ.
އަށް ގައުމު ވާދަކުރާ މުބާރާތުގެ ޓިކެޓެއް ވިއްކަމުން ދަނީ ޕާކިސްތާން ރުޕީސްގެ 1000 ރުޕީސް އާއި 25000 ރުޕީސްއާ ދެމެދުގެ އަގެއްގަ އެވެ. ޓިކެޓްތައް ބަހާލާފައިވަނީ ތަފާތު ގިނަ ކެޓަގަރީތަކަކަށެވެ.
މުބާރާތުގައި އެންމެ ބާރު ބޮޑުވެފައިވަނީ ޕާކިސްތާން ކުޅޭ މެޗުތަކަށެވެ. އަންނަ މަހުގެ 19 ވަނަ ދުވަހު ފަށާ މުބާރާތުގެ ގްރޫޕް އޭގައި ހިމެނެނީ އިންޑިޔާ އާއި ޕާކިސްތާން އަދި ބަނގްލަދޭޝް އާއި ނިއުޒީލޭންޑެވެ. ބީ ގްރޫޕުގައި ހިމެނެނީ އަފްގާނިސްތާނާއި ދެކުނު އެފްރިކާ އާއި އޮސްޓްރޭލިޔާ އާއި އިންގްލޭންޑެވެ.
މި މުބާރާތް ޕާކިސްތާނުގައި ބޭއްވި ނަމަވެސް އިންޑިޔާގެ މެޗުތައް ކުޅޭނީ ޑުބާއީގަ އެވެ. އެއީ ސިޔާސީ އަރައިރުންތަކުގެ ސަބަބުން އިންޑިޔާގެ ސަރުކާރުން އެ ގައުމުގެ ކުޅުންތެރިން ޕާކިސްތާނަށް ދިއުން މަނާކޮށްފައިވާތީ އެވެ.