ތައިލެންޑް މާސްޓާސް ގޭމްސްގެ ޓޭބަލް ޓެނިސް މުބާރާތުގައި ވާދަކޮށް ރާއްޖޭގެ ކުރީގެ އެއްވަނަ ކުޅުންތެރިޔާ އަހުމަދު ލަތީފް (ސީވީޑް ލަތީފް) ރިހި މެޑަލް ހޯދައިފިއެވެ.
މުބާރާތުގައި އަޙްމަދު ލަތީފް ރިހި މެޑަލް ހޯދާފައިވަނީ 70 އަހަރުން މަތީ ކުޅުންތެރިންގެ ސިންގަލްސް ބައިންނެވެ. ގްރޫޕް ސްޓޭޖުގެ ދެ މެޗު ކާމިޔާބުކޮށް އޭނާ މުބާރާތުގެ ކުއާޓާ ފައިނަލުން ޖާގަ ހޯދިއެވެ. އެއަށްފަހު ސެމީ ފައިނަލުގައި ބަލިވީ ތައިލެންޑް ކުޅުންތެރިއެއް އަތުންނެވެ.
ރާއްޖޭގެ ޓީޓީގެ ކުރީގެ މަޝްހޫރު ގިނަ ކުޅުންތެރިންތަކެއް މި މުބާރާތުގައި ވަނީ ވާދަކޮށްފައެވެ. އޭގެތެރޭގައި އަލީ އާދަމް، އަހުމަދު އިބްރާހީމް، ފަދަ ކުޅުންތެރިން ހިމެނެއެވެ. ނަމަވެސް އެހެން ކުޅުންތެރިންނަށް މި މުބާރާތުގައި ރަނގަޅު ހިސާބަކަށް ނުދެވެއެވެ.
ރާއްޖޭގެ އިތުރުން އޮސްޓްރޭލިއާ ، އޮސްޓްރިއާ، އިނގިރޭސިވިލާތް، މެލޭޝިއާ، އިންޑޮނޭޝިއާ އަދި ސިންގަޕޫރާއި ތުރުކީން ކުޅުންތެރިން ވަނީ މި މުބާރާތުގައި ވާދަކޮށްފައެވެ.
އިސްތަންބޫލް ވެޓެރަންސް ޓޭބަލް ޓެނިސް އެސޯސިއޭޝަނުން ބޭއްވި ފްރެންޑްޝިޕް ޓޭބަލް ޓެނިސް މުބާރާތުގައި ވާދަކޮށް ލަތީފް ވަނީ 60 އަހަރުން މަތީގެ ޗެމްޕިއަންކަން ހޯދާފައެވެ.
ގައުމީ ސިންގަލްސް ޗެމްޕިއަންކަން 1973، 1974، އަދި 1981 ގައި ހޯދި ލަތީފް ވަނީ ރާއްޖޭގެ އިތުރުން ބައިނަލްއަގްވާމީ ގިނަ މުބާރާތްތަކެއްގައި ގައުމު ތަމްސީލުކޮށްފައެވެ. އޭގެ ތެރޭގައި 1973 ގައި ޗައިނާގައި އޮތް ތުރީއޭ ގޭމްސް އާއި 1979 ވަނަ އަހަރު ރީޔޫނިއަންގައި އޮތް އިންޑިއަން އޯޝަން އައިލެންޑް ގޭމްސް ހިމެނެއެވެ.