މައުމޫން ފައުންޑޭޝަންގެ އެހީގައި މިހާތަނަށް 30 ޒުވާނަކު މަތީ ތަޢުލީމް ހާސިލްކޮށްފި

ކުރީގެ ރައީސް އަލްއުސްތާޛް މަޢުމޫން އަބްދުލްޤައްޔޫމް އުފައްދަވާފައިވާ، މައުމޫން ފައުންޑޭޝަނަށް 15 އަހަރު ފުރުން ފާހަގަކޮށްފިއެވެ.

އެ ފައުންޑޭޝަނުގެ އަހަރީ ދުވަހާއި ގުޅިގެން، ބޭއްވި ހަފްލާގައި މައުމޫން ފައުންޑޭޝަންގެ ޗެއަރމަން ރައީސް އަލްއުސްތާޛް މައުމޫން ޢަބްދުލްޤައްޔޫމް އާއި، ފައުންޑޭޝަންގެ ހިންގާކޮމެޓީގެ މެންބަރުންނާއި، ފައުންޑޭޝަންގެ އާންމު މެންބަރުން ބައިވެރިވެވަޑައިގެންނެވިއެވެ.

މީގެ އިތުރުން މައުމޫން ފައުންޑޭޝަންގެ ސްކޮލަރޝިޕްތަކުގައި ތަޢުލީމް ހާޞިލްކޮށްފައިވާ ދަރިވަރުންނާއި، ފައުންޑޭޝަނަށް އެކި ގޮތްގޮތުން އެހީތެރިވެވަޑައިގަންނަވާ ބައެއް ބޭފުޅުންނާއި ހެޔޮއެދޭ ބައެއް ބޭފުޅުން ބައިވެރިވެ ވަޑައިގެންފައިވެއެވެ.

މައުމޫން ފައުންޑޭޝަން އުފައްދާފައިވަނީ 26 ޖެނުއަރީ 2010ގައެވެ. ކުރީގެ ރައީސް، ރައީސް އަލްއުސްތާޛް މައުމޫން ޢަބްދުލް ޤައްޔޫމްގެ އިސްނަންގަވައިގެން އުފެއްދެވި މި ފައުންޑޭޝަންގެ މައިގަނޑު މަޤުޞަދުތަކުގެ ތެރޭގައި ދިވެހި ރައްޔިތުންގެ ދީނީ ހޭލުންތެރިކަން އިތުރުކުރުމާއި ޒުވާނުންނަށް މަތީ ތަޢުލީމުގެ ފުރުޞަތުތައް ހޯދައި ދިނުން ހިމެނެއެވެ.

މިގޮތުން 30 ޒުވާނަކު މައުމޫން ފައުންޑޭޝަންގެ އެހީގައި މަތީ ތަޢުލީމު ހާޞިލްކުރުމަށްފަހު މިހާރު ގެންދަވަނީ އެކި ދާއިރާތަކުން ޤައުމަށް ޚިދުމަތް ކުރައްވަމުންނެވެ. މީގެ ތެރެއިން 4 ދަރިވަރަކަށް މައުމޫން ފައުންޑޭޝަންގެ މެންބަރަކަށް ވުމަށް ރޭގެ ޙަފްލާގައި ވަނީ ދަޢުވަތު އަރުވާފައެވެ.

މައުމޫން ފައުންޑޭޝަނުން ކޮށްފައިވާ ފާހަގަކޮށްލެވޭ ކަންތައްތަކުގެ ތެރޭގައި ދަރިވަރުން މަތީ ތަޢުލީމް ހާސިލްކުރުމަށް ސްކޮލަރޝިޕް ފުރުސަތު ހޯދައިދުނުމާއި، ރަމަޟާންމަސް އިޙްޔާކުރުމުގެ ޕްރޮގްރާމްތައް ހިންގުމާއި، މައުމޫން ފައުންޑޭޝަންގެ ޗެއަރމަން ދީނީ އެކި މަޢުޟޫތަކަށް ފޮތް ލިޔުއްވާ، ޝާއިޢުކުރައްވާ، އާންމުންނަށް ލިބޭނޭގޮތް ހައްދަވައި ދެއްވުމާއި، ބައެއް ޔުނިވަސިޓީ އަދި ލައިބްރަރީ ފަދަ ތަންތަނަށް ފޮތް ހަދިޔާކުރުން ހިމެނެއެވެ. މީގެ އިތުރުން، ކޮލެޖް ޔުނިވާރސިޓީ ތަންނަނުން ހިންގާ ތަޢުލީމީ ޙަރަކާތްތަކުގައި ބައިވެރިވެ އެހީވެދިނުން ހިމެނެއެވެ. އަދި ދިވެހި ރައްޔިތުންގެ ފަރާތުން ފަލަސްތީނަށް އެހީވުމަށް ޕީ.އެސް.އެމް އިން އިސްނަގައިގެން ހިންގި ޕްރޮގްރާމަށް އެހީދެއްވުން ފަދަ ކަންކަން ވެސް ފާހަގަކޮށްލެވެއެވެ.