ތަހުޤީޤަކަށް ބޭނުންވާ ލިޔެކިޔުން ހޯދުމަށް ތިނަދޫ ސިޓީ ކައުންސިލުގައި އެސީސީން ހަރަކާތްތެރިވި
-
ލިޔެކިޔުން ހޯދީ ޤާނޫނުތަކާ އެއްގޮތްވާ ގޮތުގެ މަތިން ހުރިހާ އިޖުރާއަތެއް ފުރިހަމަކުރުމަށްފަހު
-
ލިޔެކިޔުން ހޯދަން ދިޔުމުން ތިނަދޫ ސިޓީ ކައުންސިލުގެ އެއްބާރުލުން ލިބިފައިނުވޭ
ތަހުޤީޤަކަށް ބޭނުންވާ ލިޔެކިޔުން ހޯދުމަށް ތިނަދޫ ސިޓީ ކައުންސިލުގައި އެންޓި ކޮރަޕްޝަން ކޮމިޝަން، އެސީސީން ހަރަކާތްތެރިވިކަމަށް އެ ކޮމިޝަނުން ވިދާޅުވެއްޖެއެވެ.
އެ ކޮމިޝަނުން މިހެން ވިދާޅުވެފައި މިވަނީ އޭސީސީގެ ނަމުގައި އައި ބަޔަކު ތިނަދޫ ސިޓީ ކައުންސިލްގެ ގިނަ ޢަދަދެއްގެ ތަކެތި، ވަގަށް ނަގާފަވާކަމަށް އެ ސިޓީ ކައުންސިލުން ވިދާޅުވުމާ ގުޅިގެންނެވެ.
އޭސީސީން ނެރުނު ބަޔާނެއްގައި ވިދާޅުވީ ތިނަދޫ ސިޓީ ކައުންސިލާ ގުޅޭގޮތުން އެންޓި-ކޮރަޕްޝަން ކޮމިޝަން، އޭސީސީއިން ތަހުޤީޤުކުރަމުންދާ މައްސަލަތަކަކާ ގުޅިގެން އިއްޔެގެ ވަގުތެއްގައި އެ ކޮމިޝަނުގެ ޓީމެއް ކައުންސިލުގައި ހަރަކާތްތެރިވެފައިވާ ކަމަށެވެ.
އެގޮތުން ކޮމިޝަނަށް ހުށަހެޅިފައިވާ މައްސަލަތަކާ ގުޅޭގޮތުން ތަހުޤީޤަށް ބޭނުންވާ ލިޔެކިޔުން ހޯދުމުގެ މަސައްކަތް ކޮށްފައިވާކަމަށް ބަޔާނުގައިވެއެވެ. ނަމަވެސް މިކަމުގައި ކައުންސިލްގެ ފުރިހަމަ އެއްބާރުލުން ލިބިފައިނުވާ ކަމަށާއި ޤާނޫނުއަސާސީއާއި އެންޓި-ކޮރަޕްޝަން ކޮމިޝަންގެ ޤާނޫނާ އެއްގޮތްވާ ގޮތުގެ މަތިން އެންމެހާ އިޖުރާއަތްތައް ފުރިހަމަ ކުރުމަށްފަހު، ތަހުޤީޤަށް ބޭނުންވާ ލިޔެކިޔުންތައް ހޯދާފައިވާކަމަށް އޭސީސީގެ ބަޔާނުގައި ވިދާޅުވިއެވެ.
އޭސީސީން ވިދާޅުވީ މިކަމާ ގުޅޭގޮތުން ކައުންސިލުން ހާމަކޮށްފައިވާ މަޢުލޫމާތުތަކަކީ ދޮގު ވާހަކަތަކެއް ކަމަށެވެ. އަދި އޭސީސީއާ ގުޅޭގޮތުން ފަތުރަމުންދާ ހަޤީޤަތާ ޚިލާފު މަޢުލޫމާތަކީ ބަލައިގަނެވޭނެ ކަމެއް ނޫންކަމަށް ވިދާޅުވެ، އެ ކޮމިޝަނުން ވަނީ ކަންބޮޑުވުން ފާޅުކޮށްފައެވެ.
ތިނަދޫ ސިޓީ ކައުންސިލުން ސޯޝަލް މީޑިއާގައި ކޮށްފައިވާ ޕޯސްޓެއްގައި ބުނެފަވަނީ އޭސީސީގެ ނަމުގައި އައި ބަޔަކު ތިނަދޫ ކައުންސިލްގެ ގިނަ ޢަދަދެއްގެ ތަކެތި ވަގަށް ނަގާފަވާކަމަށެވެ. މިކަމާގުޅިގެން އެ މައްސަލަ ފުލުހަށް ހުށައަޅާފަވާކަމަށާއި އޭގެ ސަބަބުން ކައުންސިލްގެ ބައެއް ޚިދުމަތްތައް މެދުކެނޑިފަވާކަމަށްވެސް ސިޓީ ކައުންސިލުން ވިދާޅުވެފައިވެއެވެ.
ފުލުހުންވެސް ވަނީ ތިނަދޫ ސިޓީ ކައުންސިލުން ބައެއް ތަކެތި ވަގަށް ނަގާފައިވާކަމަށްބުނެ މައްސަލައެއް ހުށައަޅާފައިވަތީ ބެލި ބެލުމުން އެފަދަ ކަމެއް ހިނގާފައިނުވާކަމަށް ވިދާޅުވެފައެވެ. އަދި މި މައްސަލައާ ގުޅިގެން އިތުރަށް ބަލަންޖެހޭ ކަންކަން ބަލަމުންދާކަމަށްވެސް ފުލުހުން ވިދާޅުވިއެވެ.