ރާއްޖެ އޮސްޓްރޭލިއާ ގުޅުމުގެ އަސާސަކީ ރައްޔިތުންގެ މެދުގައި އޮތް ގުޅުން: ޚާރިޖީ ވަޒީރު

ރާއްޖެއާއި އޮސްޓްރޭލިއާއާ ދެމެދު އޮތް ބަދަހި ގުޅުމުގެ މައިގަނޑު އަސާސަކީ، ރައްޔިތުންގެ މެދުގައި އޮންނަ ގުޅުންކަމަށް ޚާރިޖީ ވަޒީރު، ޑރ. ޢަބްދުﷲ ޚަލީލް ވިދާޅުވެއްޖެއެވެ. ޚާރިޖީ ވަޒީރު މިހެން ވިދާޅުވީ އޮސްޓްރޭލިއާ ދުވަހުގެ މުނާސަބަތުގައި އެޤައުމުގެ ޚާރިޖީ ވަޒީރު، ޕެނީ ވޮންގް އަށް ފޮނުވި ތަހުނިޔާގެ މެސެޖްގައެވެ.

ޚާރިޖީ ވަޒީރު، ޑރ. ޢަބްދުﷲ ޚަލީލްގެ މެސެޖްގައި ވަނީ ދިވެހި ސަރުކާރާއި ދިވެހި ރައްޔިތުންގެ ނަމުގައި، އަދި އެމަނިކުފާނުގެ އަމިއްލަ ނަމުގައި އޮސްޓްރޭލިއާގެ ޚާރިޖީ ވަޒީރާއި ރައްޔިތުންނަށް، އޮސްޓްރޭލިއާ ދުވަހުގެ ތަހުނިޔާ އަރިސްކޮށްފައެވެ.

ތަޢުލީމާއި ޞިއްޙީ ޚިދުމަތާއި މެރިޓައިމް ސެކިއުރިޓީ އަދި ތިމާވެށީގެ ދެމެހެއްޓެނިވިކަން ފަދަ ދާއިރާތަކުން އިޖްތިމާޢީ އަދި އިޤްތިޞާދީ ކުރިއެރުމަށް އެހީތެރިކަން ފޯރުކޮށްދިނުމުގައި އިސް ދައުރެއް އަދާކޮށްފައިވާ އިތުބާރުކުރެވޭ ތަރައްޤީގެ ބައިވެރިއެއް ކަމުގައިވާ އޮސްޓްރޭލިއާއާއެކު އޮތް ގާތްގުޅުމުގެ އަގު ރާއްޖެއިން އިޚްލާސްތެރިކަމާއެކު ފާހަގަކުރާކަމަށް ވަޒީރު ވިދާޅުވިއެވެ.

ދެޤައުމުގެ ދެމެދުގައި އޮތް ބަދަހި ގުޅުމުގެ މައިގަނޑު އަސާސަކީ، ރައްޔިތުންގެ މެދުގައި އޮންނަ ގުޅުންތައްކަން ވަނީ ފާހަގަކޮށްފައެވެ. އެގޮތުން އިންސާނީ ވަޞީލަތް ތަރައްޤީކުރުމަށް ޚާއްޞަކުރައްވައިގެން އޮސްޓްރޭލިއާ އެވޯޑްސް ޕްރޮގްރާމްގެ ދަށުން ދެއްވާ ސްކޮލަރޝިޕްތަކަކީ މިކަމުގެ ނަމޫނާ މިސާލެއްކަމަށް ވިދާޅުވިއެވެ.

ރާއްޖެއާއި އޮސްޓްރޭލިއާއާއި 2 ޤައުމުގެ ގުޅުން ބިނާވެފައިވަނީ ޙިއްޞާކުރެވިފައިވާ އަޚްލާޤާއި، ދެޤައުމުގެ ކުރިއެރުމަށް ކުރެވޭ އަހައްމިއްޔަތުކަމުގެ މައްޗަށްކަމަށާއި، މުސްތަޤްބަލަށް ބަލާއިރު، ދެޤައުމުގެ މަސްލަހަތު ހިމެނޭ ދާއިރާތަކުގައި އެއްބާރުލުން ދިނުމާއި، ވިސްނުން އިތުރުކޮށް، ރައްޔިތުންގެ ދުޅަހެޔޮކަމަށް އެހީތެރިކަން ފޯރުކޮށްދިނުމުގައި ދެމިތިބުމަކީ ލިބޭ ވަރަށް ބޮޑު އުފަލެއްކަމަށް ވަޒީރު ޚަލީލްގެ މެސެޖްގައި ވިދާޅުވިއެވެ.