ދިވެހިން ފަލަސްޠީނާއެކު ތިބިކަން އަންގާދިނުމަށް މާލޭގައި އެއްވުމެއް ބާއްވައިފި
-
އެއްވުން އޮތީ އާޓިފިޝަލް ބީޗް ސަރަހައްދުގައި
-
މިއި މަދަނީ ޖަމްޢިއްޔާތަކެއް ގުޅިގެން ބޭއްވި އެއްވުމެއް
ދިވެހިން ފަލަސްޠީނާއެކު ތިބިކަން އަންގާދިނުމަށް މާލޭގައި އެއްވުމެއް ބާއްވައިފިއެވެ.
"ޣައްޒާ ނަސްރު"ގެ ނަމުގައި ބޭއްވި މިއެއްވުމަކީ އިސްރާ އެސޯސިއޭޝަންގެ އިސްނެގުމާއެކު ފަލަސްޠީނުގެ ރައްޔިތުންނަށް އެހީވުމަށް ހަރަކާތްތެރިވާ އިތުރު އެހެން މަދަނީ ޖަމްޢިއްޔާތައް ގުޅިގެން ބޭއްވި އެއްވުމެކެވެ. އަދި މިއެއްވުން ބާއްވާފައިވަނީ އާޓިފިޝަލް ބީޗް ސަރަހައްދުގައެވެ.
އިސްރާ އެސޯސިއޭޝަނުން ބުނިގޮތުގައި މިއެއްވުމަކީ އެތައް ދުވަހެއް ވަންދެން ޣައްޒާގައި ހިންގަމުން ދިޔަ ނަސްލު ނައްތާލުމުގެ އަނިޔާވެރި ހަނގުރާމަ މެދުކަނޑާލުމުގެ ސަބަބުން އެ ޤައުމުގެ ރައްޔިތުންނަށް ލިބުނު ނަޞްރު ފާހަގަކުރުމުގެ ގޮތުން ބޭއްވި އެއްވުމެކެވެ. އަދި މި ހަނގުރާމައިން ޣައްޒާގެ ރައްޔިތުންނަށް ލިބުނު ނަޞްރުގެ ފަހަތުގައި ވަނީ އީމާންކަމާއި، އުޚުއްވަތްތެރިކަމާއި، ނުގުޑާފަދަ ޢަޒުމެއްގައި ބަދަހިކަމާއެކު ތިބެ، ﷲއަށް ވަކީލުކޮށްގެން ކުރި ބުރަ މަސައްކަތްކަމަށްވެސް އެ އެސޯސިއެޝަނުން ފާހަގަކުރިއެވެ.
އިސްރާ އެސޯސިއޭޝަނުން ބުނީ ޣައްޒާ ހަނގުރާމައިގެ ތެރޭގައި ފަލަސްޠީނުގެ ރައްޔިތުން ގާތްގަނޑަކަށް 471 ދުވަސް ހޭދަކޮށްފައިވާކަމަށެވެ. އަދި މިއެއްވުމަކީ އެދުވަސްތަކުގައިވެސް އަދި ކުރިއަށް އޮތް ދުވަސްތަކުގައިވެސް ޣައްޒާގެ ރައްޔިތުންނާއެކު ދިވެހިން ތިބިކަން ހާމަކޮށްދިނުމަށް ބޭއްވި އެއްވުމެއްކަމަށްވެސް އެ އެސޯސިއޭޝަނުން ފާހަގަކުރިއެވެ. އަދި ޣައްޒާ އަލުން އާރާސްތުކުރުމާއެކު އެ ފަރާތްތަކަށް އިންސާނީ އެހީތެރިކަން ފޯރުކޮށްދިނުމުގައި ދެމިތިބޭނެކަން ހާމަކޮށްދިނުމަކީވެސް މި އެއްވުން ބޭއްވުމުގެ ބޭނުމެއްކަމަށް އެ އެސޯސިއޭޝަނުން ބުނެއެވެ.
ޣައްޒާގެ ރައްޔިތުންނަށް އެހީތެރިވުމުގެ ގޮތުން އިސްރާ އެސޯސިއޭޝަނުން ވަނީ ތަފާތު ހަރަކާތްތަކެއް ކުރިއަށްގެންދަން ނިންމާފައެވެ. އެގޮތުން ޣައްޒާގެ ރައްޔިތުންނަށް އެހީތެރިވުމަށްޓަކައި ބޯހިޔާވަހިކަމުގެ މަޝްރޫއެއްކުރިއަށް ގެންދަން ނިންމާފައިވާކަމަށް އެއެސޯސިއޭޝަނުން ހާމަކުރެއެވެ. މިއީ ތުރުކީވިލާތުގެ ޖީޑީޑީ ނަމަކަށްކިޔާ ޖަމްޢިއްޔާއަކާ ގުޅިގެން ކުރިއަށްގެންދާ މަޝްރޫއެކެވެ. މީގެ އިތުރުންވެސް ބޯޑަރު ހުޅުވޭ ވަގުތުތަކުގައި އެގައުމުގެ ރައްޔިތުންނަށް ކާބޯތަކެތީގެ އެހީތެރިކަން ފޯރުކޮށްދިނުމަށް ފުޑް ޕްރޮޖެކްޓެއް ކުރިއަށް ގެންދާކަމަށްވެސް ހާމަކުރިއެވެ.
ދިވެހީންނަކީ އަބަދުވެސް ފަލަސްޠީނުގެ ރައްޔިތުންނާއެކު ސާބިތުކަމާއެކު އޮންނަ އިސްލާމީ ގައުމެކެވެ. އަދި ހަމައެގޮތުގައި ދެމިތިބުމަށްޓަކައި އަޒުމް ކަނޑައަޅައި، ދިވެހި ދަރިންނަށް ފަލަސްޠީނުގެ މުހިންމުކަން ބުނެދިނުމަށް އިސްރާ އެސޯސިއޭޝަނުން އިލްތިމާސްކޮށްފައިވެއެވެ.