މާކުރަތު ތަރައްޤީކޮށް ނަތީޖާ ނެރެދޭނަން: ރައީސް

ރ. މާކުރަތުގައި ތަރައްޤީގެ މަޝްރޫޢުތައް ހިންގައި، ރައްޔިތުން އެދޭފަދަ ނަތީޖާއެއް ނެރެދޭނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ. އެމަނިކުފާނު މިޔަޤީންކަން ދެއްވީ އެރަށު ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

ރ. މާކުރަތު ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، މާކުރަތުގެ ތަރައްޤީގައި ކުލަ ޖެއްސުމަށް ގިނަ މަސައްކަތްތަކެއް އެބަހުރިކަމަށާއި، ދެއްވާނެ ޔަޤީންކަމަކީ ނަތީޖާ ނެރެދޭނެކަންކަމަށެވެ.

ރައީސް ވިދާޅުވީ، އެމަނިކުފާނު ހައުސިންގ މިނިސްޓަރުކަމުގައި ހުންނެވިއިރު ބަނދަރު ތަރައްޤީކުރުންފަދަ ކަންކަން ރާއްޖޭގެ އެކިކަންކޮޅުތަކުގައި ހިންގިކަމަށާއި، ނަމަވެސް މިދިޔަ ދައުރުގައި އެކި ސަބަބުތަކާހުރެ އެ މަޝްރޫޢުތައް ނުހިނގިނަމަވެސް، އެމަނިކުފާނު ފެށި މަސައްކަތްތައް އަލުން ނިންމަން ފުރުޞަތު ލިބިވަޑައިގެންފައިވާކަމަށެވެ.

އެގޮތުން މާކުރަތުގެ ބަނދަރުގެ މަސައްކަތް މިއަހަރު ފުރިހަމަކޮށްދެއްވާނެކަމަށް ވިދާޅުވިއެވެ. އަދި އެރަށުގައި ކުރިން ފެށި ޕަބްލިކް ވޯކްސް ސަރަހައްދު ތަރައްޤީކޮށް ނިންމަވައިދެއްވާނެކަމަށް ރައީސް ވިދާޅުވިއެވެ. ޕަބްލިކް ވޯކްސް ސަރަހައްދަކީ މަރާމާތުކުރުމާއި ތަންތަން ބެލެހެއްޓުމުގެ ކަންކަމަށް މުހިންމު ސަރަހައްދެއްކަމަށާއި ކޮންމެ އަތޮޅެއްގައިވެސް އެފަދަ ސަރަހައްދުތައް ތަރައްޤީކުރެއްވުމަށް ނިންމަވާފައިވާކަން ރައީސް ފާހަގަކުރެއްވިއެވެ. ރައީސް ވިދާޅުވީ ޢުމްރާނީ މަޝްރޫޢުތައް ހިންގަނީ ވަރަށް ބޮޑު ޚަރަދެއްކޮށްގެންކަމުން، އެތަންތަން މަރާމާތުކޮށް ބެލެހެއްޓުމަކީ ޕަބްލިކް ވޯކްސްއިން ކުރިއަށްގެންދާ މަސައްކަތެއްކަމަށެވެ.

"އަޅުގަނޑު ކަނޑައަޅާފައިވަނީ ކޮންމެ އަތޮޅެއްގައި އެއް ތަން ހެދުމާއި، އެއްތަނުން އަނެއްތަނަށް ގެންދެވޭ މޯބައިލް ސައިޓް ހެދުމަށް. އެކަން މިއަހަރު ބަޖެޓުގައި ވާނީ ހިމަނާފައި. މިއަތޮޅުގެ މޯބައިލް ޕަބްލިކް ވޯކްސް ސަރވިސް ސައިޓް ޤާއިމްކުރާނީ މިރަށުގައި". ރައީސުލްޖުމްހޫރިއްޔާ ވިދާޅުވިއެވެ.

ރައީސް ވިދާޅުވީ މިއަހަރު ރާއްޖޭގެ ކޮންމެ ރަށެއްގައި، ހުރިހާ މެޝިނަރީތަކާއި ވަސީލަތްތައް ހަމަ ޕަބްލިކް ވޯކްސް ސައިޓް ޤާއިމްކޮށް ނިންމަވާނެކަމަށެވެ. މިއީ ބޭކާރު ޚަރަދެއްނޫންކަމަށާއި، މީގެ ސަބަބުން ކޮންމެ ރަށެއްގެ ޢުމްރާނީ ތަރައްޤީގެ މަޝްރޫޢުތައް ބެލެހެއްޓުމުގެ ޚަރަދު ވަރަށް ބޮޑަށް ކުޑަކުރެވޭނެކަމަށް ރައީސް ވިދާޅުވިއެވެ.

މާކުރަތުގެ ތަރައްޤީއަށް އަލިއަޅުއްވާލައްވަމުން ރައީސް ވަނީ ސިއްޙީ މަރުކަޒު ތަރައްޤީކުރައްވާނެކަން ފާހަގަކުރައްވައި، އެދާއިރާއަށް ބޭނުންވާ މުވައްޒަފުންނާއި ވަސީލަތްތައް ހަމަކޮށްދެއްވާނެކަމަށް ވިދާޅުވެފައެވެ. އެކަން މިއަހަރުގެ ބަޖެޓުގައި ކުރިއަށްދާނެކަމަށާއި، ސްކޫލަށްވެސް ބޭނުންވާ ވަސީލަތް ހޯދުމުގެ މަސައްކަތްވެސް މިއަހަރު ކުރިއަށްދާނެކަމަށް ރައީސް ވިދާޅުވިއެވެ.

މީގެ އިތުރުން ޒުވާނުންނަށް ކުޅިވަރުގެ ވަސީލަތްތައް ހޯދާދެއްވުމަށް ކުރައްވަމުންދާ މަސައްކަތުގެ ދަށުން މާކުރަތުގައި ފުޓްބޯޅަ ދަނޑެއް ތަރައްޤީކޮށްދެއްވާނެކަމުގެ ޔަޤީންކަންވެސް ރައީސް ދެއްވިއެވެ. އަދި ޒުވާނުންގެ މަރުކަޒާއި، އިތުރު ކުޅިވަރުގެ ވަސީލަތްތައްވެސް ޤާއިމްކުރުމުގެ ކަންކަން ކުރިއަށްގެންދަވާނެކަމަށް ވިދާޅުވިއެވެ.

މުޅި ރާއްޖެއަށްވެސް ބޯހިޔާވަހިކަމުގެ ދަތިކަން އޮތުމުން، އެކިކަންކޮޅުތަކުގައި އެ މަޝްރޫޢުތައް ކުރިއަށްދާނެކަމަށާއި، އަންނަ އަހަރު ގެދޮރުވެރިކަމުގެ މަޝްރޫޢެއް މާކުރަތުގައި ހިންގަވާނެކަމަށް ރައީސް ވިދާޅުވިއެވެ.

މާކުރަތުގެ ތަރައްޤީގެ ގިނަ ކަންކަން މިއަހަރު ހިންގައި، ހުއްޓިފައިވާ މަޝްރޫޢުތައް ފަށައި، އެކަމުގައި ނަތީޖާ ނެރެދީ ފުރިހަމަކޮށްދެއްވާނެކަމަށްވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.